ကော့မှူးမြို့နယ် သရက်တောကျေးရွာတွင် Multipurpose Terminal ဆိပ်ကမ်းတည်ဆောက်ရန် အစီရင်ခံစာအား ရခိုင်တိုင်းရင်းသား လူမျိုးရေးရာဝန်ကြီး လွှတ်တော်သို့ရှင်းလင်း

ကော့မှူးမြို့နယ်၊ သရက်တောကျေးရွာတွင် Multipurpose Terminal ဆိပ်ကမ်းကို တည်ဆောက်ခြင်းဖြင့် ပြည်ပဝင်ငွေ တိုးတက်ရရှိလာနိုင်ခြင်း၊ ဆိပ်ကမ်းသစ်တွင် အလုပ်အကိုင် အခွင့်အလမ်းအသစ်များ ရရှိလာနိုင်ပြီး အလုပ်လက်မဲ့ဦးရေ လျော့နည်းလာနိုင်ခြင်း၊ စက်သုံးဆီတင်ပို့သည့် မူရင်းနိုင်ငံများမှ သင်္ဘောကြီးဖြင့် တိုက်ရိုက် တင်သွင်းနိုင်သည့်အတွက် ကမ္ဘာ့ပေါက်ဈေးနှင့်အညီ စက်သုံးဆီ ဈေးနှုန်းများကို အများပြည်သူ ဝယ်ယူ အသုံးပြုနိုင်ခြင်း၊ ကုန်စည်စီးဆင်းမှုတွင် ဝန်ဆောင်မှု စရိတ်စခ သက်သာလာသည့်အတွက် ကုန်ဈေးနှုန်းများ တည်ငြိမ်စေနိုင်ခြင်းတို့ ဖြစ်ပေါ်စေမည် ဖြစ်ကြောင်း ရခိုင်တိုင်းရင်းသား လူမျိုးရေးရာဝန်ကြီး ဦးဇော်အေးမောင်က ဇွန်လ ၅ ရက် ရန်ကုန်တိုင်းဒေသကြီး လွှတ်တော်အစည်းအဝေးတွင် ရှင်းလင်းခဲ့သည်။
 
`ကုန်စည်စီးဆင်းမှု ပမာဏနဲ့အညီ ရန်ကုန်၊ မန္တလေး၊ ဗန်းမော်၊ မြစ်ကြီးနားနှင့် ရန်ကုန်၊ မန္တလေး၊ လားရှိုး၊ မူဆယ်လမ်းများကို အသုံးပြုပြီး မြန်မာနိုင်ငံနဲ့ ထိစပ်နေတဲ့ တရုတ်နိုင်ငံရဲ့ ကုန်းတွင်းပိတ် ပြည်နယ်များမှ ကုန်စည်များကိုပါ ယခုဆိပ်ကမ်းသစ်မှ တစ်ဆင့် ပြည်ပကို သယ်ယူပို့ဆောင် ဖြန့်ဖြူးပေးခြင်းဖြင့် ပြည်ပဝင်ငွေ တိုးတက် ရရှိလာနိုင်ခြင်း၊ ဆိပ်ကမ်းသစ်မှာ အလုပ်အကိုင်အခွင့်အလမ်း အသစ်များ၊ ရရှိလာနိုင်ပြီး အလုပ်လက်မဲ့ဦးရေ လျော့နည်းလာနိုင်ခြင်း၊ စက်သုံးဆီတင်ပို့တဲ့ မူရင်း နိုင်ငံများမှ သင်္ဘောကြီးဖြင့် တိုက်ရိုက် တင်သွင်းနိုင်တဲ့အတွက် ကမ္ဘာ့ပေါက်ဈေးနဲ့အညီ စက်သုံးဆီ ဈေးနှုန်းတွေကို အများပြည်သူဝယ်ယူ အသုံးပြုနိုင်ခြင်း၊ ကုန်စည်စီးဆင်းမှုတွင် ဝန်ဆောင်မှု စရိတ်စခ သက်သာလာသည့်အတွက် ကုန်ဈေးနှုန်းများ တည်ငြိမ်စေနိုင်ခြင်း၊ ဆိပ်ကမ်းသစ်နဲ့ ထိစပ်နေသော ဒေသများ ဖွံ့ဖြိုးတိုးတက်လာခြင်းစတဲ့ အကျိုးကျေးဇူးများ ရရှိလာနိုင်မှာဖြစ်ပါတယ်။ အောင်မြင်မယ့် အလားအလာကောင်းများကိုလည်း တွေ့ရှိရတဲ့အတွက် ကော့မှုးမြို့နယ်၊ သရက်တော ကျေးရွာတွင် စက်သုံးဆီသိုလှောင်ဖြန့်ဖြူးခြင်းကို အဓိကထား၍ အခြားပြည်ပ ပို့ကုန်၊ သွင်းကုန်များကိုပါ လက်ခံဆောင်ရွက်နိုင်မယ့် ဆိပ်ကမ်းများပါဝင်သော Multipurpose Terminal ဘက်စုံသော ဆိပ်ကမ်းသစ်တစ်ခု တည်ဆောင်နိုင်ရန်အတွက် လွှတ်တော်သို့ လုပ်ငန်းစီမံကိန်း အစီအရင်ခံစာအား တင်ပြခြင်းဖြစ်ပါတယ်” ဟု ဝန်ကြီးဦးဇော်အေးမောင်က ပြောသည်။
 
ကွမ်းခြံကုန်းနှင့် ကော့မှုးမြို့နယ်ကြား မြေနေရာကို စက်သုံးဆီ သိုလှောင် စခန်းနှင့် ဘက်စုံသုံးဆိပ်ကမ်း ဆောင်ရွက်ခဲ့ရာ နိုင်ငံတကာ အတွေ့အကြုံရှိ ကုမ္ပဏီများဖြစ်သည့် Royal Haskoning ကုမ္ပဏီ၊ Surbana Jurong ကုမ္ပဏီစသည့် ကုမ္ပဏီိကြီးများနှင့် ပဏာမ ဖြစ်နိုင်ခြေ လေ့လာခြင်း၊ လက်တွေ့ ကွင်းဆင်းဆောင်ရွက်ခြင်းတို့ ကိုဆောင်ရွက်ခဲ့ပြီး ဖြစ်သည်။
 
`ယခုတည်ဆောက်မယ့် ဆိပ်ကမ်းသစ်ဟာ ဘက်စုံသုံးဆိပ်ကမ်းဖြစ်တာနဲ့အညီ ပြည်တွင်းမှ ထွက်ရှိတဲ့ ဆန်စပါး၊ ဂျုံ၊ ပဲအမျိုးမျိုး ကိုတင်ပို့ခြင်း၊ စက်မှုဇုန်များက ထွက်ရှိတဲ့ ပြည်ပပို့ကုန်များတင်ပို့ခြင်း၊ ကုန်ကြမ်းများ တင်သွင်းခြင်း၊ ပြည်တွင်း လိုအပ်ချက်ရှိသည့် စက်သုံးဆီတင်သွင်းခြင်း၊ သယ်ယူပို့ဆောင်ရေး ကဏ္ဍအတွက် လိုအပ်တဲ့ စက်သုံးဆီ တင်သွင်းခြင်းစတဲ့ ဆိပ်ကမ်းများပါဝင်မှာ ဖြစ်ပါတယ်’’ ဟု ၄င်းကပြောသည်။
 
မြန်မာနိုင်ငံသည် ပင်လယ်ရေကြောင်းနှင့် ကမ်းရိုးတန်းတစ်လျှောက်တွင် အဓိကအားဖြင့် ဆိပ်ကမ်း(၉)ခုဖြင့် ကုန်သွယ်မှု ဆောင်ရွက်လျှက် ရှိပြီး ရန်ကုန်ဆိပ်ကမ်းသည် ပင်လယ်ရေကြောင်း ကုန်သွယ်မှုတွင် အဓိက တံခါးပေါက်ဖြစ်၍ ရေကြောင်းမှ သယ်ယူပို့ဆောင်သည့် ထုတ်ကုန်၊ သွင်းကုန်၏ (၉၅%)ကို စီမံခန့်ခွဲလျှက်ရှိကာ ရန်ကုန်အတွင်းပိုင်း ဆိပ်ကမ်းနှင့် ရန်ကုန်မြို့မှ (၁၆)ကီလိုမီတာ ကွာဝေးသော သီလဝါဆိပ်ကမ်းဟူ၍ အဓိက နှစ်ပိုင်းခွဲခြားနိုင်သည်။ ရန်ကုန်ရှိဆိပ်ကမ်းများသည် လက်ရှိတွင် သင်္ဘော(၄၆)စီး တစ်ပြိုင်နက် ဝင်ရောက် ဆိုက်ကပ်နိုင်ပြီး ရန်ကုန်ဆိပ်ကမ်းများတွင် (၂၆)စီးနှင့် သီလဝါ(၂၀)စီး ဆိုက်ကပ်နိုင်ကာ ကုန်သွယ်ရေး သင်္ဘောလိုင်းပေါင်း(၂၀)မှ သင်္ဘော(၄၆)စီးသည် ရန်ကုန်ဆိပ်ကမ်းကို အသုံးပြုလျှက်ရှိပြီး စင်္ကာပူ၊ မလေးရှား၊ အိန္ဒိယ၊ တရုတ်၊ သီရိလင်္ကာ၊ အင်ဒိုနီးရှား၊ ဗီယက်နမ်၊ ဘင်္ဂလားဒေ့ရှ်၊ ထိုင်းနိုင်ငံတို့နှင့် တိုက်ရိုက် ကုန်သွယ်လျှက်ရှိကြောင်း ရန်ကုန်တိုင်းဒေသကြီးအစိုးရအဖွဲ့၏ သတင်းထုတ်ပြန်မှုတွင် ဖော်ပြခဲ့သည်။
 
The Ladies News
 

 

Vote: 
No votes yet

Add new comment