အနည်းဆုံး အခကြေးငွေအား အလုပ်သမားက ဒီလောက်ယူ အလုပ်ရှင်က ဒီလောက်ပေးဆိုရုံ နှင့် မပြီးသေးဘဲ အလုပ်သမား တောင်းသည့်နှုန်း အလုပ်ရှင်ပေးနိုင်ရေးအတွက် အစိုးရ လုပ်ဆောင်ပေးရန် လိုကြောင်းဆို

အနည်းဆုံး အခကြေးငွေအား အလုပ်သမားက ဒီလောက်ယူ အလုပ်ရှင်က ဒီလောက်ပေးဆိုတာ နှင့်မပြီးသေးဘဲ အစိုးရအနေဖြင့် အလုပ်သမား တောင်းသည့်နှုန်းထားအား အလုပ်ရှင်ပေးနိုင်ရေးအတွက် ကြီးကြီးမားမား ပါဝင်ဆောင်ရွက်စေလိုကြောင်း မြန်မာနိုင်ငံ တောင်သူလယ်သမားနှင့် စိုက်ပျိုးရေး အလုပ်သမားသမဂ္ဂများ အဖွဲ့ချူပ်(AFFM-IUF) မှ အထွေထွေအတွင်းရေးမှူးချုပ် ဦးဇာနည်သွေးက ပြောသည်။
 
အဆိုပါကိစ္စနှင့်ပတ်သက်ပြီး ဇန်န၀ါရီ ၁၀ ရက် မွန်းလွဲပိုင်းက လှိုင်သာယာမြို့နယ် We Generation Network ရုံးခန်းတွင် ကျင်းပပြုလုပ်သည့် အဆိုပြု အနည်းဆုံး အခကြေးငွေ ထုတ်ပြန်ကြေညာခြင်းနှင့် ပတ်သက်၍ အနည်းဆုံး အခကြေးငွေနှင့် အလုပ်သမား အခွင့်အရေးဆိုင်ရာ ပူးပေါင်းဆောင်ရွက်ရေး ကော်မတီ(MWWRCC)၏ ကန့်ကွက်ကြောင်း သတင်းစာရှင်းပွဲတွင် ပြောသွားခြင်းဖြစ်သည်။
 
အစိုးရအနေဖြင့် အလုပ်သမားများ တောင်းဆိုသည့် နှုန်းထားတစ်ခုအား အလုပ်ရှင်မှ ပေးနိုင်ရေးအတွက် အစိုးရ အနေဖြင့် အလုပ်ရှင်များ ပေးဆောင်ရမည့် အခွန်ငွေလျော့ချပေးခြင်း၊ လျှပ်စစ်မီး အပြည့်အ၀ရရှိရေး ကဲ့သို့သော စသည့် အစိုးရပိုင်းမှ ဖြေလျော့ပေးနိုင်သည့် အခြေအနေများ ဖြေလျော့ပေးခြင်းအားဖြင့် တစ်ဖက်က ပါဝင်ဆောင်ရွက် လိုအပ်ကြောင်း ဆိုသည်။
 
ဦးဇာနည်သွေးက “သုံးပွင့်ဆိုင် အလုပ်သမားက ဒီလောက်ယူ အလုပ်ရှင်ဒီလောက်ပေးဆိုတဲ့ အခြေအနေမျိုးမှာ နိုင်ငံတော် အစိုးရကလည်း ဘာတွေဆောင်ရွက်ပေးမှာလဲ ကောင်းမွန်တဲ့ လူမှုလုပ်ငန်းဝန်းကျင်တစ်ခုကို အကောင်းဆုံး တည်ဆောက်ရင် နိုင်ငံတော်က ရင်းနှီးမြုပ်နှံမှု အသစ်တွေ ကုန်ထုတ်စွမ်းအားစု အသစ်တွေ ပဋိပက္ခ ထိပ်တိုက်ရင်ဆိုင်ရမှာ တွေကို ရှောင်လွဲနိုင်မယ် ဆိုရင် တိုင်းပြည်ငြိမ်းချမ်း သွားလိမ့်မယ်။ အဓိကပြောချင်တဲ့ ပြသ၁နာက ဒီနေ့ဘက်ပေါင်းစုံက စိန်ခေါ်မှု ရင်ဆိုင်ရတယ်ဆိုတာ နားလည်ပါတယ်။ ဒီလုပ်ငန်းဝန်းကျင် တကယ်ကောင်းနေဖို့ တကယ်တည်ငြိမ်နေဖို့ အတွက်ကတော့ နိုင်ငံတော်အစိုးရက သတ်မှတ်ပေးရုံ တစ်ခုတည်းနဲ့ တွေ့ဆုံဆွေးနွေးပေးရုံ တခုတည်းမဟုတ်ဘဲ နိုင်ငံတော်အစိုးရ ကိုယ်တိုင် အလုပ်ရှင်ကိုယ်တိုင်က အလုပ်သမားတွေ တောင်းတာပေးနိုင်စွမ်းရှိအောင် နိုင်ငံတော်အစိုးရ ဘာလုပ်ပေးမလဲ တောင်းဆိုတာဖြစ်တယ်”ဟု ပြောသည်။
 
လက်ရှိ အနည်းဆုံး အခကြေးငွေ သတ်မှတ်ရေး အမျိုးသားကော်မတီမှ သတ်မှတ်လိုက်သည့် နှုန်းထားဖြစ်သည့် တစ်ရက် ၈ နာရီလုပ်ခ ၄၈၀၀ ကျပ်သည် ၎င်းတို့ ပူးပေါင်းကော်မတီမှ တောင်းဆိုထားသည့် အလုပ်သမားများ အမှန်တကယ် အဆင်ပြေစေမည့် နှုန်းထားဖြစ်သည့် ၅၆၀၀ ကျပ် မဟုတ်သည့်အတွက် အလုပ်သမားများ အနေဖြင့် အဆင်ပြေမည် မဟုတ်ကြောင်း ကန့်ကွက်ကြောင်းဆိုသည်။
 
ရောင်ခြည်ဦး အဖွဲ့မှ ကိုမျိုးမင်းမင်းက “အဖွဲ့ချုပ်က အဆိုပြုနှုန်းထားက ၄၈၀၀ လို့ ပြောသွားတယ်ပြောတယ်။ ကျွန်တော် ဥာဏ်မီသလောက် တွက်ထားတာပါ။ တစ်နေ့ ၄၈၀၀ ဆိုရင် တစ်နေ့ကို နာရီ ၈ နာရီရှိပါတယ်။ စားလိုရှိရင် ၆၀၀ ရပါတယ်။ ၆၀၀ ကို တစ်နာရီမှာ မိနစ် ၆၀ ရှိပါတယ်။ ၆၀နဲ့စားကြည်ပ့ါ အလုပ်သမားတစ်ယောက် အတွက် လုပ်ခသည် တစ်မိနစ်ကို ၁၀ ကျပ်ပဲရပါတယ်။ ကျွန်တော်တို့ အွန်လိုင်းသုံးမယ်။ ၁ မဂ်ကို ၆ ကျပ်ကျပါတယ်။ ဖုန်းဟယ်လိုဆက်ရင် တစ်မိနစ်ကို ၂၅ လောက် ကျပါတယ်။ အဲ့ဒီတော့ ကျွန်တော်တို့လုပ်အားခနဲ့ လုပ်ရတဲ့ အချိန်နဲ့ ကျွန်တော်တို့ ရရှိလာတဲ့ အခကြေးငွေနဲ့ တန်၏မတန်၏ဟု အားလုံးစဉ်းစားလို့ ရပါတယ်”ဟု ပြောသည်။
 
၎င်းတို့ကွန်ရက်အနေဖြင့် မြန်မာနိုင်ငံ တစ်ဝန်းလုံးရှိ အလုပ်သမားများ၊ အလုပ်သမားသမဂ္ဂများ၊ အလုပ်သမား အဖွဲ့ချုပ်များ၊ အရပ်ဖက် အဖွဲ့အစည်းများ အနေဖြင့် အနည်းဆုံး အခကြေးငွေ ဥပဒေပုဒ်မ ၁၀ နှင့် နည်းဥပဒေ ၃၇ ပြဌာန်းချက်များ နှင့်အညီ အမျိုးသားကော်မတီ၏ အဆိုပြုနှုန်းထားကို ကန့်ကွက်ကြောင်းနှင့် ပြင်ဆင်အဆိုပြု လိုကြောင်းကို သတ်မှတ်ထားသည့် ပုံစံအတိုင်းဖြည့်စွက်လျှက် နည်းဥပဒေ-၄၀အရ အများပြည်သူသိရှိရန် ကြေညာပြီးနောက် ကန့်ကွက်ချက် သို့မဟုတ် ပြင်ဆင်ရန် အဆိုပြုချက်များကို သက်ဆိုင်ရာ တိုင်းဒေသကြီး ကော်မတီနှင့် ပြည်နယ်ကော်မတီများသို့ပေးပို့ပြီး မိတ္တူကို အမျိုးသားကော်မတီနှင့် အလုပ်သမား ညွန်ကြားမှု ဦးစီးဌာနသို့ ပေးပို့ရန် အနည်းဆုံး အခကြေးငွေနှင့် အလုပ်သမား အခွင့်အရေးဆိုင်ရာ ပူးပေါင်းဆောင်ရွက်ရေး ကော်မတီ (MWRCC)က တိုက်တွန်းထားသည်။
 
ထိုသို့ တိုက်တွန်းထားသော်လည်း အစိုးရအနေဖြင့် မူလက ရက်ပေါင်း ၆၀ ကြေညာထားသော်လည်း ရက်သတ္တပတ် နှစ်ပတ်အတွင်း ကန့်ကွက်ရန် ပြင်ဆင်ကြေညာချက် ထုတ်ပြန်ခြင်းများရှိကြောင်း ယင်းအတွက် အလုပ်သမား အဖွဲ့အစည်းအနေဖြင့် ကန့်ကွက်ခြင်း သို့မဟုတ် ပြင်ဆင်ရန် အဆိုပြုခြင်းစာအား အချိန်မီမပေးပို့နိုင်ပါက ကန့်ကွက်သူ နည်းသည့်အတွက် အတည်ပြုလိုက်မည်ဆိုပါက ၃၆၀၀ သတ်မှတ်လိုက်စဉ်က ပြသ၁နာများ စိုးရိမ်ကြောင်း မြန်မာနိုင်ငံ စက်မှုလက်မှုနှင့် ၀န်ဆောင်မှုလုပ်ငန်းပေါင်းစုံ အလုပ်သမားသမဂ္ဂများ အဖွဲ့ချုပ် MICS –TusFမှ အထွေထွေ အတွင်းရေးမှူးချူပ် ဦးသက်နှင်းအောင်ကပြောသည်။
 
ယင်းက “၄၈၀၀ အတည်ဖြစ်သွားခဲ့ရင် ဘာဖြစ်နိုင်သလဲဆိုရင် ၃၆၀၀ ဖြစ်သလိုပါပဲ။ ထူးမခြားနားတွေပဲ လာမှာပေါ့။ ဥပမာ အလုပ်ရှင်က တိုင်တွေ လျော့လိုက်တယ်လို့။ ဖယ်ရီကြေးတွေ မပေးတော့ဘူးလို့ ဒါတွေပဲ တ၀ဲလည်လည်နဲ့ လိုက်ရှင်းရမယ်။ သေချာတာက ကုန်ဈေးနှုန်း တက်လိမ့်မယ်။ စီမံကိန်းနှင့် ဘဏ္ဍာရေးဝန်ကြီး ကလည်း ပြောထားတာ ရှိတယ်။ ကုန်ဈေးနှုန်း မထိန်းထားနိုင်ပါဘူးဆိုတော့ ကျွန်တော်တို့ နင်းပြားက နင်းပြားဖြစ်နေဦးမှာပဲ” ဟု ပြောသည်။
 
စိုင်းဟန်
The Ladies News
 

 

Vote: 
No votes yet

Add new comment