ကျူးကျော်သူများ နှင့်စပ်လျဉ်းပြီး ဌာနဆိုင်ရာ ဝန်ထမ်းများနှင့် ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးမှူးများ ပါဝင်ပတ်သက်မှုရှိက အရေးယူမည်

ရန်ကုန်တိုင်းဒေသကြီးအတွင်း မြို့နယ်များရှိ မြေကွက်လပ်များ၌ ဝင်ရောက် ကျူးကျော်သူများ နှင့်စပ်လျဉ်းပြီး ဌာနဆိုင်ရာ ဝန်ထမ်းများနှင့် ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးမှူးများ ပါဝင်ပတ်သက် မှုများ ရှိပါက နိုင်ငံ့ဝန်ထမ်း ဥပဒေ၊ နည်းဥပဒေ၊ စည်းမျဉ်းစည်းကမ်း များနှင့် အညီ အရေးယူ ဆောင်ရွက် သွားမည်ဖြစ်ကြောင်း ပြည်ထဲရေး ဒုဝန်ကြီး ဗိုလ်ချုပ်အောင်စိုး က နိုဝင်ဘာ ၁၅ ရက်တွင် ပြောသည်။
 
ပြည်သူ့လွှတ်တော် အစည်းအဝေး တွင် ဒဂုံမြို့သစ် (မြောက်ပိုင်း) မဲဆန္ဒနယ်မှ ဒေါက်တာဦးခင်မောင်မောင် က ရန်ကုန်တိုင်းဒေသကြီး အတွင်းရှိ မြို့နယ်များတွင်ရှိသော မြေကွက်လပ် များကို စီးပွားရေးအရ ဝင်ရောက် ကျူးကျော်သူများကို သက်ဆိုင်ရာ ရပ်ကွက်အုပ်ချုပ်ရေးမှူးနှင့် သက်ဆိုင်ရာ စည်ပင်သာယာရေး ဝန်ထမ်းများက ကျူးကျော်ခွင့် ပြုနေခြင်းကို ဥပဒေအရ ထိရောက်စွာ အရေးယူရန် အစီအစဉ်ရှိ၊ မရှိ မေးမြန်းခဲ့မှုကို ယင်းသို့ ပြန်လည် ဖြေကြားပေးခဲ့ခြင်း ဖြစ်သည်။
 
မြို့နယ်များရှိ မြေကွက်လပ်များတွင် မည်သည့်ပုဂ္ဂိုလ် တစ်ယောက်မှ တရားဝင် ခွင့်ပြုချက်မရှိဘဲ ကျူးကျော် ဆောက်လုပ်ခြင်း၊ ခြံစည်းရိုး ခတ်ခြင်းများ ဆောင်ရွက်ခြင်း မရှိစေရန် မြို့နယ် စည်ပင်သာယာ အုပ်ချုပ်ရေးမှူးရုံး အပါအဝင် မြို့နယ်အဆင့် ဌာနဆိုင်ရာများ၊ ရပ်ကွက်အုပ်ချုပ်ရေးမှူး အဖွဲ့များနှင့် ဒေသခံပြည်သူများအဖြစ် ပူးပေါင်း ဆောင်ရွက်လျက် ရှိသည်။
 
ထိုသို့ဆောင်ရွက်နေစဉ် အတွင်း ကျူးကျော်နေအိမ် ဆောက်လုပ်မှုကို သက်ဆိုင်ရာ ရပ်ကွက်အုပ်ချုပ်ရေးမှူးမှ ခွင့်ပြုနေပါက စုံစမ်းစစ်ဆေးရေး အဖွဲ့ဖြင့် စစ်ဆေးပြီး မှန်ကန်ပါက လုပ်ထုံးလုပ်နည်းများနှင့် အညီ သက်ဆိုင်ရာ ရပ်ကွက် အုပ်ချုပ်ရေးမှူးကို တာဝန်မှရပ်စဲသည်အထိ လည်းကောင်း၊ မြို့နယ် စည်ပင်သာယာရေး ဝန်ထမ်းမှ ကျူးကျော်မှုနှင့် ပတ်သက်၍ ခွင့်ပြုနေပါက အဆိုပါဝန်ထမ်းကို သက်ဆိုင်ရာဌာနမှ နိုင်ငံ့ဝန်ထမ်းဥပဒေ၊ နည်းဥပဒေ၊ လုပ်ထုံးလုပ်နည်း၊ စည်းမျဉ်း စည်းကမ်းများနှင့်အညီ အရေးယူဆောင်ရွက် သွားမည်ဖြစ်ကြောင်း ဒုတိယ၀န်ကြီး ဗိုလ်ချုပ်အောင်စိုးက ပြောကြားခဲ့သည်။
 
ရန်ကုန်တိုင်းဒေသကြီး ဖွံ့ဖြိုးရေး သုတေသန စီမံကိန်းအရ ဌာနဆိုင်ရာမြေပေါ်တွင် ကျူးကျော်နေသူများနှင့် ပုဂ္ဂလိကပိုင်မြေပေါ် ကျူးကျော်နေသူများဟူ၍ ခွဲခြားပြီး စာရင်းကောက်ခံထားရှိပြီး အဆိုပါကျူးကျော် နေထိုင်သူများကို ရန်ကုန်တိုင်းဒေသကြီး အစိုးရအဖွဲ့၏ အစီအစဉ်နှင့် ကျူးကျော်နေထိုင်သူများ စာရင်း ကောက်ယူပြီး ကျူးကျော် သက်သေခံလက်မှတ် (Smart Card)များကို မြို့နယ်အလိုက် ထုတ်ပေးထားသည်။
 
ထပ်မံကျူးကျော်မှုရှိပါက တစ်တဲကျူး တစ်တဲရှင်းစနစ်ဖြင့် စီစဉ် ဆောင်ရွက်လျက်ရှိပြီး မြို့နယ်များအတွင်းရှိ မြေကွက်လပ်များကို စီးပွားရေးအရ ဝင်ရောက် ကျူးကျော်သူများ ရှိပါက မြေပိုင်ဆိုင်မှု အခြေအနေအရ ပုဂ္ဂလိက ပိုင်မြေပေါ် တွင် ကျူးကျော်နေပါက မြေပိုင်ရှင်များမှ တရားဥပဒေနှင့် အညီ တရားစွဲဆိုခြင်းများကိုလည်း ဆောင်ရွက်သွား မည်ဖြစ်ကြောင်း ဒုတိယ၀န်ကြီး ဗိုလ်ချုပ်အောင်စိုးက ပြောကြားခဲ့သည်။
 
ဇော်မင်းထွန်း
The Ladies News
 

 

Vote: 
No votes yet

Add new comment