အသင်းသားများအား လစာပုံမှန်ပေးချေနိုင်ခြင်း မရှိသည့် နေပြည်တော် အသင်းအား လိဂ်ကော်မတီက ပြိုင်ပွဲမှ ထုတ်ပယ်

အသင်းသားများအား လစာ ပုံမှန်ပေးချေနိုင်ခြင်း မရှိသည့် နေပြည်တော် အသင်းအား လိဂ်ကော်မတီက ပြိုင်ပွဲမှ ထုတ်ပယ်ပြီး ကစားသမားများနှင့် အသင်းနည်းပြများအား ကော်မတီရန်ပုံငွေမှ သုံးလစာ စိုက်ထုတ်ပေး လိုက်ကြောင်း မြန်မာနေရှင်နယ်လိဂ် သတင်းထုတ်ပြန်ချက်အရ သိရ သည်။
 
၂၀၁၇ ခုနှစ် ဘောလုံးရာသီ မြန်မာနေရှင်နယ်လိဂ် ပြိုင်ပွဲဝင် အသင်းတစ် သင်းဖြစ်သည့် နေပြည်တော်အသင်း အနေဖြင့် ကစားသမားများနှင့် အုပ်ချူပ်၊ နည်းပြများ၏ လုပ်ခလစာကို ဧပြီလမှ စတင်ကာ သြဂုတ်လ အထိ ၅ လစာ ပေးချေခဲ့ခြင်း မရှိသဖြင့် ကစားသမားများနှင့် နည်းပြများ မှာ ပုံမှန်လေ့ကျင့်ရေး မပြုလုပ်နိုင်သည့်အတွက် လွန်ခဲ့သည့် ရက် သတ္တပတ်က ကစားရမည့် MNL Week 17 ပွဲစဉ်ကို လာရောက် ယှဉ်ပြိုင် ခြင်း မပြုခြင်းများရှိကြောင်း ဆိုသည်။
 
အဆိုပါကိစ္စနှင့် ပတ်သက်ပြီး စက်တင်ဘာ ၁၂ ရက်နေ့ မွန်းလွဲပိုင်းတွင် ကျင်းပခဲ့သည့် မြန်မာနေရှင်နယ်လိဂ် ကော်မတီ အစည်းအဝေးတွင် ဆွေးနွေးဆုံးဖြတ်ခဲ့မှု အရ နေပြည်တော်အသင်းအား ယခုအပတ် ပွဲစဉ်မှ စတင်ကာ မြန်မာနေရှင်နယ်လိဂ် ပြိုင်ပွဲတွင် ၀င်ရောက်ယှဉ်ပြိုင်ခွင့် မပြုတော့ဘဲ ထုတ်ပယ်ရန် အများသဘောတူ ဆုံးဖြတ် အတည်ပြုခဲ့ကြောင်း သတင်းထုတ်ပြန်ထားသည်။
 
ယခုရာသီတွင် နေပြည်တော်အသင်းနှင့် ယှဉ်ပြိုင်ကစားရန် ကျန်ရှိနေသေးသည့် ပွဲစဉ် ၅ ပွဲ ရလဒ်ကိုလည်း ပြိုင်ဘက်အသင်းများအား သုံးဂိုး၊ သုံးမှတ်ဖြင့် သတ်မှတ် ဆုံးဖြတ်ခဲ့ကြောင်း သိရသည်။
 
၂၀၁၀ မှ စတင်ကာ မြန်မာနေရှင်နယ်လိဂ် ပြိုင်ပွဲတွင် ငွေကြေးမြောက်မြားစွာ အကုန်ခံ၍ ပြိုင်ပွဲဝင်ခဲ့သည့် နေပြည်တော် အသင်းသည် နေပြည်တော် ပေါင်းလောင်းကွင်းကို တရားဝင် ငှားရမ်းခွင့်ပြုချက်ဖြင့် အဆင့်မြှင့်တင် ပြုပြင်ကာ အိမ်ကွင်းအဖြစ် နှစ်ရှည်ငှားရမ်း၍ အောင်မြင်စွာ လက်ခံကျင်းပခဲ့သည့် အသင်းဖြစ်သော်လည်း ယခုနှစ်အတွင်း ဒေသခံအချို့ တောင်းဆိုချက်အရ သက်ဆိုင်ရာ အစိုးရဌာနသို့ ကွင်းအား ပြန်လည်ပေးအပ် ခဲ့ရသောကြောင့် အားကစားနှင့် ကာယပညာဦးစီးဌာနပိုင် ၀ဏ္ဏသိဒ္ဓိအားကစားကွင်းကို ယာယီငှားရမ်းကာ အိမ်ကွင်းပွဲစဉ်များကို လက်ခံကျင်းပခဲ့ရသည်။ အသင်းပိုင်ရှင် အနေနှင့် မြန်မာ့ဘောလုံးအတွက် ငွေကုန်ကြေးကျ များစွာကျခံကာ ယခုရာသီကုန်အထိ ပြိုင်ပွဲဝင်နိုင်ရန် ကြိုးစားခဲ့သော်လည်း အခြေအနေအကြောင်း အမျိုးမျိုးကြောင့် အသင်းကို ဆက်လက်ရပ်တည်နိုင်ခြင်း မရှိတော့ဘဲ ကစားသမားများနှင့် အုပ်ချုပ်၊နည်းပြများ၏ လစာကိုပင် ၅ လခန့် ပေးချေနိုင်ခြင်း မရှိတော့၍ မြန်မာနေရှင်နယ်လိဂ် ကော်မတီမှ အစည်းအဝေးထိုင်ကာ ယခုကဲ့သို့ ပြိုင်ပွဲမှ ထုတ်ပယ်ခဲ့ခြင်း ဖြစ်သည်။
 
သို့သော် အသင်း၏ ကစားသမားများ၊ အုပ်ချုပ်၊ နည်းပြများ၏ အခက်အခဲကို လူမှုရေး ရှုထောင့်မှ စာနာ နားလည်သော အားဖြင့် မြန်မာနေရှင်နယ်လိဂ် ကော်မတီ အနေနှင့် နေပြည်တော် စီနီယာ အသင်း အပါအ၀င် ယူ-၂၁ အသင်းနှင့် ယူ-၁၉ အသင်းတို့မှ ကစားသမားများ၊ အုပ်ချုပ်၊ နည်းပြများအား အသင်းတာဝန်ရှိသူများနှင့် အတူ တွေ့ဆုံညှိနှိုင်း၍ မြန်မာနေရှင်နယ်လိဂ် ကော်မတီ ရန်ပုံငွေထဲမှ ၄င်းတို့အတွက် အချိုးကျလစာများ ထုတ်ပေးသွားရန် တွေ့ဆုံညှိနှိုင်းမှု ကော်မတီကို ဖွဲ့စည်းတာဝန်ပေးအပ်ခဲ့သည်။
 
၎င်း ကော်မတီဝင်များမှ ယနေ့ (စက်တင်ဘာ ၁၃ရက်) နံနက် ၉း၃၀ တွင် မြန်မာနိုင်ငံ ဘောလုံးအဖွဲ့ချုပ်ရုံး အစည်းအဝေး ခန်းမ၌ နေပြည်တော်အသင်း၏ ယူ-၂၁ အသင်းနှင့် ယူ-၁၉ အသင်းသားများကို ဦးစွာခေါ်ယူတွေ့ဆုံ ဆွေးနွေးညှိနှိုင်းခဲ့သည်။
 
ယင်းကော်မတီ၏ တွေ့ဆုံဆွေးနွေးညှိနှိုင်းမှုအရ နေပြည်တော်ယူ-၂၁ အသင်းနှင့် ယူ-၁၉ အသင်းသားအားလုံးက အသင်းပိုင်ရှင်ထံမှ ၄င်းတို့ ရရှိရန် ကျန်ရှိနေသည့် ၅ လစာအနက် ၃ လစာအား လက်ခံရယူ၍ ကျေအေး သဘောတူကြောင်း ၀န်ခံကတိပြုခဲ့ရာ တွေ့ဆုံညှိနှိုင်းမှု ကော်မတီ၏ ထောက်ခံချက်ဖြင့် မြန်မာနေရှင်နယ်လိဂ် ရန်ပုံငွေထဲမှ ယင်း ၃ လစာငွေအား စိုက်ထုတ် ပေးချေသွားမည် ဖြစ်သည်။ ဆက်လက်ပြီး စက်တင်ဘာ ၁၄ ရက်နေ့ နံနက် ၉း၃၀ အချိန်တွင်လည်း နေပြည်တော်အသင်းကြီးမှ အသင်းသားများကို တွေ့ဆုံညှိနှိုင်းမှုကော်မတီက ထပ်မံတွေ့ဆုံဆွေးနွေးကာ အချိုးကျလစာများကို လိဂ်ကော်မတီရန်ပုံငွေက စိုက်ထုတ်ပေးရန် စီစဉ်ဆောင်ရွက် သွားမည်ဖြစ်သည်။
 
အလားတူပင် ကစားသမားများအား လစာပုံမှန် ပေးချေနိုင်ခြင်းမရှိသည့် ချင်းယူနိုက်တက်အသင်းနှင့် ပတ်သက်၍ မြန်မာနေရှင်နယ်လိဂ် ကော်မတီ အစည်းအဝေးတွင် ဆွေးနွေးခဲ့ပြီး အသင်းပိုင်ရှင်၊ အသင်းဥက္ကဌနှင့် ဒုတိယဥက္ကဌ တို့မှ စိုက်ထုတ်ကျခံရန် ၀န်ခံကတိပြု ဆုံးဖြတ်ထားသည့်အတိုင်း အမြန်ဆုံးရရှိရေးကို ညှိနှိုင်းဆောင်ရွက်သွားပြီး ယခုရာသီကုန်အထိ ပြိုင်ပွဲများ ဆက်လက်ယှဉ်ပြိုင်ကစားရန် လိဂ်ကော်မတီ အစည်းအဝေးက အတည်ပြု ဆုံးဖြတ်ခဲ့ကြောင်း သိရသည်။
 
စိုင်းဟန်
ဓာတ်ပုံ- Myanmar National League (FB)
The Ladies News
 

 

Vote: 
No votes yet

Add new comment