ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး၏ “လူသားမျိုးနွယ်စု အပေါ် ကျူးလွန်သည့်ပြစ်မှု”၊ “လူမျိုးသုဉ်း သတ်ဖြတ်မှု” စသည့် အသုံး အနှုန်းများအား မြန်မာအမြဲတမ်း ကိုယ်စားလှယ် သံအမတ်ကြီး ပြန်လည်ချေပ

စက်တင်ဘာလ ၁၁ ရက်နေ့က ဂျီနီဗာမြို့၌ ကျင်းပခဲ့သည့် လူ့အခွင့်အရေး ကောင်စီ၏ ၃၆ ကြိမ်မြောက် အစည်းအဝေးတွင် ကုလသမဂ္ဂ လူ့အခွင့် အရေးဆိုင်ရာ မဟာမင်းကြီးက ရခိုင်ပြည်နယ်တွင် ဖြစ်ပေါ်နေသည့် အခြေအနေများကို “လူသားမျိုးနွယ်စုအပေါ် ကျူးလွန်သည့် ပြစ်မှု” “လူမျိုးသုဉ်းသတ်ဖြတ်မှု” စသည့် စကားလုံး များအား အသုံးပြုကာ တစ်ဖက်သတ် ပြောကြားခဲ့ခြင်းနှင့် ပတ်သက်၍ မြန်မာအမြဲတမ်း ကိုယ်စားလှယ် သံအမတ်ကြီးက ကန့်ကွက်ကြောင်း ပြန်လည်တုန့်ပြန် ပြောကြားခဲ့ကြောင်း သိရသည်။
 
ယင်းသို့ တစ်ဖက်သတ် ပြောကြားမှုများအပေါ် မြန်မာ သံအမတ်ကြီးက “လူသားမျိုးနွယ်စုအပေါ် ကျူးလွန်သည့် ပြစ်မှု” “လူမျိုးသုဉ်းသတ်ဖြတ်မှု” ဆိုသည့် စကားရပ်များတွင် ဆိုးရွားပြင်းထန်သည့် နောက်ဆက်တွဲ အဓိပ္ပာယ်များ ရှိကြောင်း၊ ၎င်းတို့မှာ အလွယ်တကူ သုံးနှုန်းသင့်သည့် စကားလုံးများ မဟုတ်ဘဲ အထူးသတိထား သုံးနှုန်းသင့်သည့် စကားများ ဖြစ်ကြောင်း၊ ဥပဒေကြောင်းနှင့် တရားရေးရာဆိုင်ရာ လေ့လာသုံးသပ် ဆန်းစစ်မှုများ အပေါ်တွင်သာ မူတည်ပြီး အသုံးပြုသင့်သည့် စကားရပ်များဖြစ်ကြောင်း တုန့်ပြန်ပြောကြားခဲ့ကြောင်း သိရသည်။
 
ယင်းအပြင် သံအမတ်ကြီးက ဒီမိုကရေစီနိုင်ငံ တစ်နိုင်ငံဖြစ်သည့် မြန်မာနိုင်ငံအနေဖြင့် အဆိုပါကိစ္စရပ်မျိုး ဖြစ်ပေါ်လာမည်ကို မည်သို့မျှ လက်ခံမည် မဟုတ်ကြောင်း၊ မြန်မာနိုင်ငံအနေဖြင့် အဆိုပါ စကားရပ်များ သုံးနှုန်းမှုကို လုံးဝလက်မခံ ပြင်းထန်စွာ ကန့်ကွက်ကြောင်း၊ ယင်းကဲ့သို့သော စကားလုံးများကို မဆင်မခြင် အထောက်အထားမဲ့ အသုံးပြုမှုမျိုးသည် လူ့အခွင့်အရေးဆိုင်ရာ မဟာမင်းကြီးရုံး၏ ဂုဏ်သိက္ခာကို ထိခိုက်စေကြောင်း၊ မီးလောင်ရာ လေပင့်ဖြစ်စေကြောင်း၊ ဒုက္ခအခက်အခဲများနှင့် တကယ်တမ်း ရင်ဆိုင်နေရသည့် လူ့အသိုက်အဝန်းများ အကြား ပိုမိုစိတ်ဝမ်း ကွဲပြားမှုကို ဖြစ်စေကြောင်း၊ ထို့အပြင် နိုင်ငံတကာ အသိုက်အဝန်းမှ မြန်မာနိုင်ငံ အပေါ် နားလည်မှု လွဲမှားစေကြောင်း အဆိုပါ လူ့အခွင့်အရေး ကောင်စီ၏ ၃၆ ကြိမ်မြောက် အစည်းအဝေးတွင် ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး၏ ပြောကြားချက်ကို ပြန်လည်တုန့်ပြန် ပြောကြားခဲ့သည်။
 
Ref : Ministry of Foreign Affairs Myanmar
The Ladies News
 

 

Vote: 
Average: 5 (1 vote)

Add new comment