သိုလှောင်မှုစနစ် တစ်ပါးတည်းပါသည့် Panasonic မှ ဆိုလာလျှပ်စစ်မီး

လျှပ်စစ်ဓာတ်အား မရရှိသည့် ဒေသများတွင် LED မီးဖြင့် အလင်းပေးနိုင်မည့် Eneloop Solar Storage စနစ်ကို ပန်နာဆိုးနစ်ကုမ္ပဏီက မိတ်ဆက် ကြေညာခဲ့သည်။ ထိုစနစ်တွင် နေရောင်ခြည်စွမ်းအင်သုံး ဆိုလာဓာတ်အားပြား ၊ စွမ်းအင်သိုလှောင်မှုနှင့် LED မီးတို့ ပါဝင်သည်။ နေ့အချိန်တွင် ဆိုလာပြားမှ ထုတ်လုပ်ပေးသည့် လျှပ်စစ်ဓာတ်အားကို နစ်ကယ်မက်တယ်ဟိုက်ဒရိတ် (NiMH) ဘတ်ထရီငယ်တစ်ခုဖြင့် သိုလှောင်ထားနိုင်ပြီး LED မီးဖြင့် အလင်းရောင်ပေးခြင်း မိုဘိုင်းဖုန်းကဲ့သို့ ကိရိယာများကို အားသွင်းခြင်းကို ပြုလုပ်နိုင်သည်။

လက်ရှိတွင် ကမ္ဘာပေါ်၌ လျှပ်စစ်မီးအသုံးမပြုနိုင်သူ (သို့) လုံလောက်စွာ မသုံးနိုင်သူမှာ ကမ္ဘာ့လူဦးရေ ငါးပုံတစ်ပုံဖြစ်သည့် ၁.၃ ဘီလီယံခန့် ရှိနေဆဲဖြစ်သည်။ ထိုသုိ့ လျှပ်စစ်မီး အသုံးမပြုနိုင်သည့် ဒေသအများစုတွင် အလင်းရောင်ပေးရန်အတွက် ရေနံဆီမီးအိမ်၊ ပြန်လည်အားသွင်းရသည့် ဘတ်ထရီမီးအိမ်၊ ဒီဇယ်မီးစက် စသည်တို့ကို အသုံးပြုရသည်။ ထိုနည်းလမ်းများသည် ကုန်ကျစရိတ် ကြီးမားခြင်း၊ အလင်းပေးနိုင်မှု နည်းပါးခြင်းနှင့် အန္တရာယ်ရှိသော မီးခိုးငွေ့များ ထွက်ရှိခြင်း စသည့် ဆိုးကျိုးများရှိနေသည်။ ထို့အပြင် အာရှနှင့် အာဖရိက၌ မိုဘိုင်းဖုန်း ကွန်ရက်များ ကျယ်ကျယ်ပြန့်ပြန့် တည်ရှိနေသော်လည်း ဖုန်းအားသွင်းနိုင်မည့် လျှပ်စစ်ဓာတ်အားပေး အခြေခံ အဆောက်အအုံများ ချို့တဲ့လျက်ရှိသည်။

ပန်နာဆိုးနစ်ကုမ္ပဏီသည် သန့်ရှင်းသည့် စွမ်းအင်နှင့် အလင်းထုတ်လုပ်ပေးမည့် ယုံကြည်စိတ်ချရသည့် နည်းလမ်းရှာဖွေ ဖန်တီးရန် ရည်မှန်းချက် ချထားသည်။ ထိုရည်မှန်းချက်အရ လျှပ်စစ်ဓာတ်အား မရှိသည့်ဒေသများတွင် အလွယ်တကူ အသုံးပြုနိုင်မည့် သယ်ယူရလွယ်ကူသော ဆိုလာမီးအိမ်ကို ၂၀၁၃ တွင် ထုတ်လုပ်ခဲ့သည်။ ယခုအခါတွင် ကုမ္ပဏီ၏ ထုတ်ကုန်စာရင်း၌ Eneloop Solar Storage စနစ်ကို ထပ်မံပေါင်းစပ် ထည့်သွင်းခဲ့ခြင်းဖြစ်သည်။

Eneloop Solar Storage စနစ်တွင် ၅ ၀ပ် LED မီးချောင်းတစ်ခုနှင့် ၁.၅ ၀ပ် LED မီးလုံးတစ်ခုတို့ ပါဝင်ပြီး မိုဘိုင်းဖုန်းများ အားပြန်သွင်းရန်လည်း USB ဓါတ်အားပေါက်များ ပါဝင်သည်။ Eneloop အား လက်ရှိ အရောင်းကွန်ရက်များမှတစ်ဆင့် ဖြန့်ဝေရောင်းချသည့် ပုံစံအဖြစ် လျှပ်စစ်မီးမရှိသည့် ဒေသများရှိ လူများ၏ ဘ၀အခြေအနေ ပိုမိုကောင်းမွန်ရေး ကူညီနေသော အန်ဂျီအိုများမှတစ်ဆင့်လည်း ဖြန့်ဝေရောင်းချသွားမည်ဟု ဆိုသည်။

Eneloop တွင် အသုံးပြုထားသည့် ပန်နာဆိုးနစ်၏ နစ်တယ်မက်တယ်ဟိုက်ဒရိတ် နည်းပညာကြောင့် ဘတ်ထရီ၏ သက်တမ်းမှာ ငါးနှစ်အထိ အသုံးပြုနိုင်မည်ဟု ဆိုသည်။ ဘတ်ထရီအား ဆိုလာစွမ်းအင်ဖြင့် ငါးနာရီအတွင်း အားအပြည့်သွင်းနိုင်မည်ဖြစ်ပြီး Eneloop အား နေအိမ်၊ ဆေးရုံ၊ ကျောင်းနှင့် ဈေးများတွင် အလင်းရောင်ပေးရန် အသုံးပြုနိုင်မည်ဖြစ်သည်။ Eneloop သည် ဂျပန်ဒီဇိုင်း အင်စတီကျုက ရွေးချယ်သည့် ၂၀၁၅ အတွက် အကောင်းဆုံး ထုတ်ကုန်ဒီဇိုင်း ၁၀၀ စာရင်းတွင် ပါဝင်ရွေးချယ်ခံခဲ့ရသည်။

KHTun

The Ladies News

Vote: 
No votes yet

Add new comment