လုပ်ငန်းခွင်အသီးသီးရှိ အမျိုးသမီးများ တန်းတူ အခွင့်အရေးရရှိရေးကို မြန်မာနိုင်ငံရှိ ထိပ်တန်းကုမ္ပဏီ ၆ ခုက ကတိက၀တ်ပြု

လုပ်ငန်းခွင်အသီးသီးရှိ အမျိုးသမီးများ တန်းတူ အခွင့်အရေးရရှိရေးကို အပြည်ပြည်ဆိုင်ရာ အမျိုးသမီးများနေ့တွင် မြန်မာနိုင်ငံရှိ ထိပ်တန်းကုမ္ပဏီ ၆ ခုက ကတိက၀တ် အခိုင်အမာပြုခဲ့ကြောင်း သတင်းထုတ်ပြန်ချက်အရ သိရသည်။

မြန်မာနိုင်ငံ၏ စီးပွားရေးတွင် အမျိုးသမီးများ တန်းတူညီမျှစွာ ပါဝင်လုပ်ဆောင်နိုင်ခြင်းသည့် အဓိကကျသည့် အချက်ဖြစ်ခြင်းကြောင့် ပြည်တွင်းထိပ်တန်း ကုမ္ပဏီများဖြစ်သည့် FMI ၊ City Mart ၊ ကမ္ဘောဇလုပ်ငန်းစု ၊ ပါရမီစွမ်းအင် ကုမ္ပဏီများအုပ်စု ၊ ဧရာဝတီဘဏ် နှင့် ရွှေတောင်လုပ်ငန်းစုတို့ ပူးပေါင်းပြီး စီးပွားရေးနယ်ပယ်တွင် အမျိုးသမီးများ၏ စွမ်းဆောင်ရည် တိုးတက် မြင့်မားလာရန် ဆောင်ရွက်သွားမည့် အဖွဲ့အစည်းသစ်တစ်ခုကို စတင်ဖွဲ့စည်းထားခြင်း ရှိသည်။

အပြည်ပြည်ဆိုင်ရာ အမျိုးသမီးများနေ့ကို အသိအမှတ်ပြု ကျင်းပသည့်နေ့တွင် စီးပွားရေးကဏ္ဍတွင် အမျိုးသား ၊ အမျိုးသမီး တန်းတူပါဝင် လုပ်ဆောင်နိုင်ရန် အသစ်ဖွဲ့စည်းလိုက်သည့် The Business Coalition for Gender Equality (BCGE) နှင့် သြစတြေးလျ-မြန်မာ ကုန်သည်ကြီးများအသင်း (Australia-Myanmar Chamber of Commerce) တို့ပူးပေါင်းပြီး လုပ်ငန်းခွင်၌ ကျား၊မ တန်းတူညီမျှရေးကို မီးမောင်းထိုးပြသည့် ကော့တေးလ် ညစာ စားပွဲတစ်ရပ် ပြုလုပ်ကျင်းပခဲ့သည်။

ရိုးမဘဏ်၏ Non-Executive Director ၊ Myanmar Investment ကုမ္ပဏီလီမီတက်၏ Strategic Development Director ၊ Myanmar Women’s Mentoring Network ၏ အကြံပေးပုဂ္ဂိုလ်ဖြစ်သူ ဒေါ်ဇာခြည်တင် မှ အဖွဲ့ဥက္ကဋ္ဌအဖြစ် တာဝန်ယူ ဆောင်ရွက်လျက်ရှိကြောင်း သိရသည်။

“တကယ်ဆိုရင် ကျွန်မတာဝန်ယူထားတဲ့ အလုပ်တွေ အများကြီးရှိနေပြီလို့ ပြောလို့ရပါတယ်။ ဒါပေမဲ့ အမျိုးသမီးတွေ အတွက် ကျားမခွဲခြားဆက်ဆံခံရမှု ပပျောက်ရေး ကြိုးပမ်းမှုမှာပါဝင်ဖို့ ကျွန်မကို အခွင့်အရေးပေးလာတော့ ကျွန်မလက်ခံခဲ့တယ်။ အဲဒါ ဘာဖြစ်လို့လဲဆိုတော့ ကျားမတန်းတူညီမျှစွာ သတ်မှတ်ခံရမှု ဆက်ဆံခံရမှုမရှိရင် အဲဒီရဲ့ဂယက်က ကျွန်မတို့အားလုံးအပေါ် သက်ရောက်မှုရှိတယ်လို့ ကျွန်မယုံကြည်တယ်။ ဒီလိုကျားမခွဲခြား ဆက်ဆံခံရမှုတွေ လျော့ကျအောင်၊ ဆင်းရဲမွဲတေမှုတွေကို တိုက်ဖျက်နိုင်အောင်နဲ့ စဉ်ဆက်မပြတ် ရေရှည်ဖွံ့ဖြိုးတိုးတက်တဲ့ ပန်းတိုင်ကို လျှောက်လှမ်းဖို့အတွက် အစိုးရပိုင်း၊ အရပ်ဘက် အဖွဲ့အစည်းတွေနဲ့ စီးပွားရေးလုပ်ငန်းတွေက အဓိကနေရာကနေ ပါဝင်နေတယ်လို့ ကျွန်မယုံကြည်ပါတယ်” ဟု ဒေါ်ဇာခြည်တင်က ပြောကြားခဲ့သည်။

“အခုလို စိတ်အားထက်သန်ပြီး စီးပွားရေးကဏ္ဍမှာထူးချွန်တဲ့ ခေါင်းဆောင်တွေနဲ့အတူ အလေ့အကျင့် ကောင်း များစွာကို ဝေမျှရင်း အစိုးရ ၊ လူမှုအဖွဲ့အစည်းတွေ ၊ အခြားသော အဖွဲ့အစည်းတွေနဲ့ ပူးပေါင်းဆောင်ရွက်ခြင်းဖြင့် ထိရောက်တဲ့ အကျိုးရလဒ်တွေရအောင် လုပ်ဆောင်နိုင်ပါတယ်” ဟု ၎င်းက ဆက်လက်ပြောကြားခဲ့သည်။

သြစတြေးလျအစိုးရက အမျိုးသမီးများ ဖွံ့ဖြိုးတိုးတက်လာရန် ရည်ရွယ်လုပ်ဆောင်သည့် ရင်းနှီးမြှုပ်နှံ့မှု အထောက်အပံ့ဖြင့် အဆိုပါအဖွဲ့ကို ဖွဲ့စည်းထားခြင်းဖြစ်သည်။ မြန်မာနိုင်ငံဆိုင်ရာ သြစတြေးလျ သံအမတ် Mr. Nicholas Coppel ကလည်း ကျား၊မ တန်းတူညီမျှမှုအတွက် BCGE အဖွဲ့၏ အပြည်ပြည်ဆိုင်ရာ အမျိုးသမီးများနေ့ အခမ်းအနားကို တက်ရောက် ချီးမြှင့်ခဲ့ကြောင်း သိရသည်။

“သြစတြေးလျအစိုးရဘက်က ဒီလုပ်ဆောင်မှုမှာ အများကြီးပံ့ပိုးမှုပေးပါတယ်။ ဒီလိုပူးပေါင်းခြင်းကိုလည်း အသိအမှတ်ပြုပါ တယ်။ လာမယ့်နှစ်တွေမှာလည်း ပိုမိုခိုင်မာတဲ့ ပူးပေါင်းဆောင်ရွက်မှုတွေ ရရှိဖို့ကိုလည်း မျှော်မှန်းပါတယ်” ဟု ဒေါ်ဇာခြည်တင်မှ ပြောသည်။

“ကျားမတန်းတူညီမျှရေးအတွက် အခုလို စီးပွားရေးဆိုင်ရာ စွမ်းဆောင်ရည် မြင့်တင့်ပေးတဲ့ အဖွဲ့သစ်က ပထမခြေလှမ်း ဖြစ်ပါတယ်။ ကျွန်မတို့အနေနဲ့ ရှေ့လျှောက် အင်အားတွေ ဖြစ်လာစေဖို့၊ ဒီပူးပေါင်းမှုမှာ စီးပွားရေး လုပ်ငန်းတွေ ပါဝင်လာစေဖို့နဲ့ ကျားမတန်းတူညီမှုအခြအနေတွေ တိုးတက်လာဖို့အထိ မျှော်မှန်းလုပ်ဆောင် နေပါတယ်” ဟု ၎င်းက ဆက်လက်ပြောကြားခဲ့သည်။

The Ladies News
 

Vote: 
Average: 1 (1 vote)

Add new comment