ရခိုင်ပြည်နယ် အစိုးရအဖွဲ့ဝင် စည်ပင်သာယာရေးဝန်ကြီးအပေါ် ရခိုင်ပြည်နယ်လွှတ်တော်၏ ဆုံးဖြတ်ချက်ကို နိုင်ငံတော်သမ္မတထံသို့ ဆက်လက်တင်ပြသွားမည်

အစိုးရသစ် လက်ထက် ပထမဆုံးအဖြစ် စွပ်စွဲပြစ်တင်ခံရသည့် ရခိုင်ပြည်နယ် အစိုးရအဖွဲ့ဝင် စည်ပင်သာယာရေး ၀န်ကြီး ဦးမင်းအောင်အား ဆက်လက် တာဝန်ထမ်းဆောင်ရန် မသင့်ကြောင်း ရခိုင်ပြည်နယ် လွှတ်တော်၏ ဆုံးဖြတ်ချက်ကို နိုင်ငံတော်သမ္မတထံ ဆက်လက် တင်ပြသွားမည်ဖြစ်ကြောင်း သိရသည်။
 
ရခိုင်ပြည်နယ် အစိုးရအဖွဲ့ဝင် စည်ပင်သာယာရေး ၀န်ကြီး ဦးမင်းအောင်အား တာဝန်ထမ်းဆောင်ရန် မသင့်ဟု ဇန်န၀ါရီ ၂ ရက်တွင် ပြုလုပ်သည့် ရခိုင်ပြည်နယ် လွှတ်တော် အရေးပေါ် အစည်းအဝေးတွင် ဆုံးဖြတ်ခဲ့ခြင်းဖြစ်သည်။ စည်ပင်သာယာရေး ၀န်ကြီးအဖြစ် တာဝန်ထမ်းဆောင်ရန် မသင့်ကြောင်း အဆိုနှင့် ပတ်သက်၍ မဲခွဲဆုံးဖြတ်ရာတွင် ထောက်ခံမဲ ၃၇ မဲ၊ ကန့်ကွက်မဲ ၈ မဲ ရရှိခဲ့ခြင်း ဖြစ်သည်။
 
“၀န်ကြီးတာဝန်ကို ထမ်းဆောင်ရန် မသင့်ဆိုတဲ့ဘက်က ၃၇ မဲနဲ့ နိုင်သွားတယ်။ လွှတ်တော်က မဲခွဲဆုံးဖြတ်ပြီးပြီ ဆိုတော့ လွှတ်တော်ဥက္ကဋ္ဌက သမ္မတကြီးဆီကို ပေးပို့ရမှာဖြစ်ပါတယ်။ သမ္မတကြီးကမှ အဲ့ဒီဝန်ကြီးကို ရာထူးမှရပ်နားဖို့အတွက် လုပ်ပေးရမှာဖြစ်ပါတယ်”ဟု ကျောက်ဖြူမဲဆန္ဒနယ်မှ ရခိုင်ပြည်နယ် လွှတ်တော် ကိုယ်စားလှယ် ဦးကျော်လွင်က The Ladies သို့ ပြောသည်။
 
ရခိုင်စည်ပင်ဝန်ကြီး ဦးမင်းအောင်ကို လွှတ်တော်အမတ်များက စွပ်စွဲပြစ်တင်ထားသည့် ကိစ္စနှင့်ပတ်သက်၍ စုံစမ်းစစ်ဆေးရေး အဖွဲ့၏ အစီရင်ခံစာကို လွှတ်တော်သို့ တင်သွင်းခဲ့ပြီး ယင်းနှင့်ပတ်သက်၍ မဲခွဲဆုံးဖြတ်ရာ တွင် မဲပေးခွင့်ရှိသူ ၄၄ ဦးအနက် ထောက်ခံမဲ ၃၃ မဲ ကန့်ကွက်မဲ ၁၁ မဲဖြင့် အတည်ပြုခဲ့ပြီးနောက် ဆက်လက် တာဝန် ထမ်းဆောင်ရန် သင့်မသင့်ကို မဲခွဲဆုံးဖြတ်ခဲ့ကြခြင်း ဖြစ်သည်။
 
ဖွဲ့စည်းပုံ အခြေခံဥပဒေ ပုဒ်မ ၂၆၃၊ ပုဒ်မခွဲ (င) ပုဒ်မခွဲငယ် (၁)(၂)တို့တွင် စွပ်စွဲပြစ်တင်မှု မှန်ကန်ကြောင်း လွှတ်တော်က ဆုံးဖြတ်ပါက အဆိုပါ ဆုံးဖြတ်ချက်ကို နိုင်ငံတော်သမ္မတထံ တင်ပြရမည်ဖြစ်ပြီး နိုင်ငံတော်သမ္မတက တာဝန်မှ ရပ်စဲကြောင်း ကြေညာရမည်ဟု ဖော်ပြထားသည်။
 
The Ladies News
 

 

Vote: 
No votes yet

Add new comment