ချင်းတွင်းမြစ်ရေ ရုတ်တရက် အရောင်ပြောင်းခြင်းသည် နန့်စကားချောင်း အတွင်း မိုးများ၍ တောင်ပြိုခြင်းကြောင့်ဟု သိရ

ခန္တီးမြို့တွင် ချင်းတွင်းမြစ်ရေ အနက်ရောင်ပြောင်း လဲသွားမှုကို ဒေသခံများ စိုးရိမ်နေသကဲ့သို့ ဟုမ္မလင်းဒေသခံများ၏ စိုးရိမ်မှုများမှာ ပြီးခဲ့သည့်ရက်ပိုင်းက မိုးရွာသွန်းမှု ယခင်ကထက် များခဲ့သောကြောင့် ခန္တီးမြို့အထက်ပိုင်း လဟယ်အစပ်တွင်ရှိသော နန့်စကားချောင်း တစ်လျှောက် တောင်များပြို၍ မြေ အနက်ရောင်များ ရေနှင့်အတူ ချင်းတွင်းမြစ်ထဲ စီးဆင်းလာသည့်အတွက် မြစ်ရေ မည်းနက်နေခြင်းဖြစ်ကြောင်း စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ်၏ ကိုယ်ရေးအရာရှိ ဦးဇင်မောင်ထံမှ သိရသည်။
 
''ခန္တီးအထက်ပိုင်းက နန့်စကား ချောင်းဘေးက တောင်ပြိုပြီး မြစ်ရေမည်းတာပါ။ မိုးကလည်း အခါတိုင်းထက် ပိုများတော့ တောင်ပြိုပြီး မြေမည်းတွေ မြစ်ထဲစီးလာတာ ဖြစ်ပါတယ်။ နန့်စကားချောင်းဆိုတာ လဟယ်အစပ်မှာ ရှိတဲ့ ချောင်းဖြစ်ပြီး တောင်စဉ် တောင်တန်းတွေကြားက ချောင်းပါ။ ခန္တီးမှာ ၂၂ ရက် မနက်ပိုင်းက မြစ်ရေတွေ မည်းနက်နေတာ မှန်ပေမယ့် ညနေပိုင်းမှ ပုံမှန်မြစ်ရေ အရောင်ကိုရောက်နေပြီဖြစ်ပြီး ဆက်စီးမှာဖြစ်လို့ အောက်ပိုင်း ဟုမ္မလင်းမှာ မြစ်ရေမည်းတာဆိုပြီး ဖြစ်နေတာပါ''ဟု ဦးဇင်မောင်က ပြောပြသည်။
 
ချင်းတွင်းမြစ်ရေသည် ခန္တီးမြို့၌ အနက်ရောင်သို့ ရုတ်တရက်ပြောင်းလဲ သွားသည့်အပေါ် ဒေသခံအများစုက စိုးရိမ်မှုများရှိခဲ့ပြီး မြစ်ရေကို သောက်သုံးရန် မသင့်ကြောင်း သတ်မှတ်ပြောဆိုခဲ့မှုများ ရှိခဲ့ကြောင်း ခန္တီးဒေသခံနှင့် ဆက်သွယ် ပြောဆိုချက်အရ သိရသည်။ မြစ်ရေရုတ်တရက် အနက်ရောင် ပြောင်းလဲမှုကို ဒေသခံများအနေဖြင့် စိုးရိမ်မှုနှင့်အတူ အနံ့ရမရမြစ်ရေကို နမ်းကြည့်ခြင်း သောက်သုံးရေအဖြစ် မြစ်ရေအမြဲသုံးရာမှ အရောင် ပြောင်းလဲပြီးနောက် မသောက်သုံးကြတော့ဘဲ ကုန်းမြေပေါ်ရှိနီးစပ်ရာ ရေကို စုပေါင်းသုံးစွဲနေကြကြောင်း သိရသည်။
 
“ ခန္တီးမြို့ မျက်နှာစာမြစ်ကြောင်းအတွင်း အနက်ရောင်ကို ရုတ်တရက် ပြောင်းလဲသွားတဲ့အတွက် စိုးရိမ်တာမျိုးတော့ဖြစ်ခဲ့ ပါတယ်။ အရင်နေ့ကထိ မြစ်ရေ အရောင်ပုံမှန်ဖြစ်ရာက ပြောင်းသွားတော့ ထိတ်လန့်ချင်စရာပေါ့။ ရေကိုနမ်းကြည့်တော့ အနံ့မရသလို ရေနေ တိရစ္ဆာန်သေတာ ပြုတာတွေတော့ မတွေ့ပါဘူး။
ခန္တီးဒေသခံတွေက မြစ်ရေကိုပဲ သောက်ကြ၊ သုံးကြတာပါ။ အခုဘယ်သူမှ မသောက်ရဲကြတော့သလို ချိုးလည်း မချိုးရဲကြတော့ နီးစပ်ရာရေကို စုပေါင်းသုံးနေကြရတာကို တွေ့ရပါတယ်'' ဟု ခန္တီးဒေသခံ ကိုကျူကပြောပြသည်။
 
ချင်းတွင်းမြစ်ရေ ရုတ်တရက် အနက်ရောင်သို့ ပြောင်းလဲသွားခြင်းအပေါ် လွန်ခဲ့သည့် ၂ဝဝ၉ ခုနှစ်ကလည်း မြေပြိုဆင်းခဲ့မှုကြောင့် အရောင်ပြောင်းခဲ့သလို ယခုရေအရောင် ပြောင်းခြင်းသည်လည်း ကနဦးသတင်း သိထားရသည်မှာ နန့်စကားချောင်းအတွင်း မိုးများ၍ တောင်ပြိုခြင်းကြောင့်ဖြစ်သည်ဟု သိထားရကြောင်း လက်ရှိတွင် ဟုမ္မလင်းမြို့ ရေအရင်းအမြစ်ဖွံ့ဖြိုးရေးဌာန တာဝန်ရှိသူများအနေဖြင့် ရန်ကုန်မြို့သို့ ဓာတ်ခွဲစမ်းသပ်ရန် အရောင်ပြောင်း သွားသော မြစ်ရေပို့၍ ဓာတ်ခွဲစစ်ဆေးမှု ဆောင်ရွက်နေရာ စမ်းသပ်ရက် ၁ဝ ရက်ခန့်တွင် အဖြေရနိုင်မည်ဖြစ်ကြောင်း ယခင်တိုင်းဒေသကြီး ရေအရင်းအမြစ် ဖွံ့ဖြိုးရေးဌာနဦးစီးမှူး (ယခုနေပြည်တော်)က သုံးသပ် ပြောပြသည်။
 
REF: MOI
The Ladies News
 

 

Vote: 
No votes yet

Add new comment