ကျောက်ဖြူကူမင်းလမ်းပေါ်ရှိ ကွမ်းလုံတံတား စီမံကိန်းအတွက် စက်တင်ဘာလတွင် ကွင်းဆင်းလေ့လာမှု စတင်ပြုလုပ်မည်

ပိုးလမ်းမဟာဗျူဟာ စီမံကိန်းအတွက် အရေးပါသည့် ကျောက်ဖြူ-ကူမင်း လမ်းမပေါ်ရှိ ကွမ်းလုံဒေသတွင် သံလွင်မြစ်ကူး ကွမ်းလုံတံတား တည်ဆောက်ရန် လာမည့် စက်တင်ဘာလတွင် စတင်၍ မြေပြင်ကွင်းဆင်း လေ့လာမှုများ စတင်ပြုလုပ်မည်ဖြစ်ကြောင်း နိုင်ငံခြားရေးဝန်ကြီးဌာနမှ သိရသည်။
 
“မြန်မာနိုင်ငံအစိုးရရဲ့ မေတ္တာရပ်ခံချက်ကြောင့် နှစ်နိုင်ငံအစိုးရ ပူးပေါင်းပြီး ဆောင်ရွက်ဖို့အတွက် သဘောတူညီ လိုက်ပါပြီ”ဟု နိုင်ငံခြားရေးဝန်ကြီးဌာန ဒုတိယညွှန်ကြားရေးမှူးချုပ် ဒေါ်အေးအေးစိုးက The Ladies သို့ သြဂုတ်လ ၂၃ ရက်နေ့က ပြောကြားသည်။
 
ကွမ်းလုံတံတား တည်ဆောက်ရန်အတွက် ကွင်းဆင်းလေ့လာမှုများကို ရက်သတ္တပတ် ၃ ပတ်မှ ၄ ပတ်အတွင်း ဆောင်ရွက်မည်ဖြစ်ပြီး လေ့လာမှုများ ပြုလုပ်ပြီးမှသာ တံတားနှင့် ပတ်သက်သော အသေးစိတ် အချက်အလက်များကို သိရှိနိုင်မည်ဖြစ်ကြောင်း သိရသည်။
 
ကွမ်းလုံဒေသတွင် တံတားတည်ဆောက်ရန် လေ့လာမှုများပြုလုပ်ပြီး ဖြစ်နိုင်ချေရှိသည့်နေရာကို အတည်ပြုပြီးပါက မြန်မာ-တရုတ် နှစ်နိုင်ငံ တံတားတည်ဆောက်ရေး သဘောတူစာချုပ် လက်မှတ်ရေးထိုးကာ တံတားတည်ဆောက်မှု ဆိုင်ရာ အချက်အလက်များကို ထုတ်ပြန်နိုင်မည်ဖြစ်သည်။
 
အဆိုပါ ကွမ်းလုံတံတား တည်ဆောက်ရေးအတွက် တရုတ်နိုင်ငံဘက်မှ ကူညီပေးမည်ဖြစ်ပြီး တံတားမှာ ကိုးကန့်ဒေသ ချင်းရွှေဟော် - မိန်းတိန် ( လင်ချန်း ) ရှိ နယ်စပ် ကုန်သွယ်ရေးလမ်းကြောင်းနှင့် ချိတ်ဆက်မည့် မဟာဗျူဟာလမ်းမပေါ်တွင် တည်ရှိသည်။ ကွန်လုံဒေသတွင် သံလွင်မြစ်ကူး ကွမ်းလုံတံတားဟောင်းလည်းရှိပြီး နှစ်သက်တမ်း ကြာမြင့်နေပြီဖြစ်ကာ လမ်းအကျယ်မှာလည်း ကျဉ်းမြောင်းလွန်းကြောင်း သိရသည်။
 
ဒေါ်အောင်ဆန်းစုကြည်၏ တရုတ်နိုင်ငံခရီးစဉ်အတွင်း ကွမ်းလုံတံတား တည်ဆောက်ရေးနှင့် ပတ်သက်၍ နှစ်နိုင်ငံ သဘောတူညီချက် လက်မှတ်ရေးထိုးခဲ့ကြောင်း သတင်းမီဒီယာများက ဖော်ပြသည်။
 
ဝသန်
The Ladies News
 
 

 

Vote: 
No votes yet

Add new comment