ကန်တော်လေးအိမ်ရာ အသစ် ပြန်လည် တည်ဆောက်ရေးအတွက် ယခင်အစိုးရလက်ထက်၊ နားလည်မှုစာချွန်လွှာကို ပြန်လည်သုံးသပ် ဆောင်ရွက်မည်

မင်္ဂလာတောင်ညွန့်မြို့နယ်၊ စံပြဖဆပလရပ်ကွက် ကန်တော်ကလေး အိမ်ရာ အသစ်ပြန်လည် တည်ဆောက်ရေးအတွက် ယခင်အစိုးရ လက်ထက် (NOMURA Real Estate Development Company) နားလည်မှု စာချွန်လွှာကို ပြန်လည်စိစစ်ပြီး ဆောင်လုပ်ရေးဝန်ကြီးဌာန၊ ရန်ကုန်တိုင်းအစိုးရနှင့် လုပ်ငန်းရှင်များ ညှိနှိုင်းဆောင်ရွက်မည် ဖြစ်ကြောင်း လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေး ဝန်ကြီး ဒေါ်နီလာကျော်က ဒီဇင်ဘာ ၁၃ရက်တွင် ပြောသည်။
 
ရန်ကုန်တိုင်းဒေသကြီး လွှတ်တော် ပဥ္မမပုံမှန် အစည်းအဝေးတွင် မင်္ဂလာတေင်ညွန့်မြို့နယ် မဲဆန္ဒနယ် အမှတ်(၁) လွှတ်တော်ကိုယ်စား လှယ် ဦးလှဌေး၏ “မင်္ဂလာတောင်ညွန့်မြို့နယ်၊ စံပြဖဆပလရပ် ကွက်တွင် ပျက်စီးနေသော အိမ်ရာများအား လမ်းများ၊ ရေဆင်း မြောင်းများ၊ အမှိုက်စွန့်ပစ် စနစ်များပြုပြင်ပေးရန်၊ အစီအစဉ်ရှိ၊မရှိ၊ စံပြဖဆပလ ရပ်ကွက်အား အဆင့်မြင့်အိမ်ရာ အဆင့်ဖြစ် အသစ်ပြန်လည် တည်ဆောက်သွားရန် အစီအစဉ်ရှိ၊မရှိ၊ အစီအစဉ်ရှိပါက မည်သည့်ကာလတွင် မည်ကဲ့သို့ ဆောင်ရွက်သွားမည်” ကို သိရှိလိုကြောင်း မေးမြန်းမှုကို ယင်းသို့ပြန်လည် ဖြေကြားပေးခဲ့ခြင်း ဖြစ်သည်။
 
“ကန်တော်လေးအိမ်ရာ စခန်းကို အသစ်ပြန်လည် တည်ဆောက်ရေး လုပ်ငန်းများ ဆောင်ရွက်ပေးနိုင်ရန် ယခင်အစိုးရ လက်ထက် (Development company)နဲ့ နားလည်မှုစာချွန်လွှာ လက်မှတ်ရေးထိုးခဲ့ပါတယ်။ ယခုမှာတော့ ကန်တော်လေး အိမ်ရာ ပြန်လည် တည်ဆောက်ရေးနဲ့ ပတ်သက်၍ အဆိုပါ နားလည်မှု စာချွန်လွှာရဲ့ သက်တမ်းနဲ့ နားလည်မှုစာချွန်လွှာကို ပြန်လည်သုံးသပ်ပြီး ဆောက်လုပ်ရေးဝန်ကြီးဌာနနဲ့ ရန်ကုန်တိုင်းဒေသကြီး အစိုးရအဖွဲ့၏ လမ်းညွှန်မှုဖြင့် လုပ်ငန်း ဆောင်ရွက်လိုသော လုပ်ငန်းရှင်များနှင့် ညှိနှိုင်းဆောင်ရွက် သွားမည်ဖြစ်ပါ ကြောင်း ဖြေကြားလိုပါတယ်။ ကျွန်မတို့ အနေနဲ့လည်း အိမ်ရာစခန်းတွေကို သန့်ရှင်းရေးမှအစ၊ ထိန်းသိမ်းရေးမှ အစ ရန်ကုန်တိုင်းဒေသကြီိး အစိုးရမှ ဆောင်ရွက်ပေးနိုင်ရန် ရန်ကုန်တိုင်းဒေသကြီး အစိုးရ စီမံခန့်ခွဲမှုအောက်သို့ ထည့်သွင်းပေးရန် အတွက် ဆောင်ရွက်လျက်ရှိကြောင်း ဖြေကြားအပ်ပါတယ်”ဟု ၀န်ကြီးဒေါ်နီလာကျော်က ပြောသည်။
 
မင်္ဂလာတောင်ညွန့်မြို့နယ် ဖဆပလ ရပ်ကွက်၊ ကန်တော်လေး အိမ်ရာစခန်းရှိ တိုက်ခန်းများမှာ နှစ်ပေါင်း ၆၀ ကျော် သက်တမ်း ကြာမြင့်လာပြီဖြစ်၍ ကြံ့ခိုင်မှုအားနည်းပြီး ပျက်စီးယိုယွင်းမှုများ ဖြစ်ပေါ် ပေါက်ခဲ့ကြောင်း ပျက်စီးမှုများနှင့် ပတ်သက်၍ နိုင်ငံတော်၏ ဘဏ္ဍာခွဲဝေရရှိမှုအပေါ် မူတည်ပြီး ပြုပြင်ပြောင်းလဲရေး လုပ်ငန်းများ ဆောင်ရွက် လျက်ရှိသည်။ ပြုပြင်ထိန်းသိမ်းရေး လုပ်ငန်းများ ဆောင်ရွက်ရာတွင် အများနှင့် သက်ဆိုင်သော အခြေခံ အဆောက်အအုံများကို ဦးစားပေး ဆောင်ရွက်လျက်ရှိပြီး နှစ်အလိုက် ပြင်ဆင်ရန်ကိစ္စများ နှင့်ပတ်သက်၍ အခန်းနေထိုင်သူများနှင့် ညှိနှိုင်းပြီး ဆောင်ရွက်ကြောင်း အိမ်ရာဝင်းအတွင်း အခြေခံ အဆောက်အ အုံများ ပျက်စီးမှုနှင့် ပတ်သက်ပြီး စခန်းသာယာရေး ကော်မတီ၊ နေထိုင်သူ ပြည်သူလူထုနှင့် ညှိနှိုင်းကာ ဘဏ္ဍာငွေ ကြေး ရရှိမှုအပေါ် မူတည်၍ ဆောင်ရွက်ပေးလျက် ရှိကြောင်းလည်း ၀န်ကြီးဒေါ်နီလာကျော်က ဆက်လက် ပြောကြားခဲ့သည်။
 
The Ladies News
 

 

Vote: 
No votes yet

Add new comment