မြန်မာနိုင်ငံရှိ ရောဂါကြီးသုံးမျိုး တိုက်ဖျက်ရေးလုပ်ငန်းအတွက် ကမ္ဘာ့ရန်ပုံငွေအဖွဲ့မှ ကန်ဒေါ်လာ ၃၂၁ သန်းကျော် ထောက်ပံ့မည်

မြန်မာနိုင်ငံရှိ ရောဂါကြီးသုံးမျိုးဖြစ်သည့် HIV/ AIDS၊ တီဘီရောဂါ၊ ငှက်ဖျားရောဂါ တိုက်ဖျက်ရေး လုပ်ငန်းအတွက် ကမ္ဘာ့ရန်ပုံငွေအဖွဲ့မှ အမေရိကန်ဒေါ်လာ ၃၂၁ ဒသမ ၄၄ သန်းကျော် ဆက်လက် ထောက်ပံ့သွားမည်ဖြစ်ကြောင်း ကျန်းမာရေးနှင့် အားကစားဝန်ကြီးဌာန သတင်းထုတ်ပြန်ချက်အရ သိရသည်။
 
အဆိုပါကိစ္စနှင့် ပတ်သက်ပြီး ၂၀၁၇ ဒီဇင်ဘာ ၆ ရက် မွန်းလွဲပိုင်းက ကျန်းမာရေးနှင့် အားကစားဝန်ကြီး ဌာန၌ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးနှင့် ကမ္ဘာ့ရန်ပုံငွေအဖွဲ့ (Global Fund) အဖွဲ့မှ Dr. Urban Weber, Head, High Impact Asia, Global Fund ဦးဆောင်သည့်အဖွဲ့ တွေ့ဆုံမှုအပြီး သတင်းထုတ်ပြန်ချက်တွင် ဖော်ပြထားသည်။
 
မြန်မာနိုင်ငံအတွက် ကမ္ဘာ့ရန်ပုံငွေအဖွဲ့မှ ၂၀၁၈ ခုနှစ်မှ ၂၀၂၀ ခုနှစ်အထိ HIV/ AIDS၊ တီဘီရောဂါ၊ ငှက်ဖျားရောဂါ တိုက်ဖျက်ရေးအတွက် ရန်ပုံငွေများ ဆက်လက် ထောက်ပံ့ပေးရာတွင် တီဘီရောဂါ တိုက်ဖျက်ရေးအတွက် အမေရိကန်ဒေါ်လာ (၉၄.ဝ၄)သန်း၊ HIV/ AIDS ရောဂါ တိုက်ဖျက်ရေးအတွက် အမေရိကန်ဒေါ်လာ (၁၂၉.၉၆)သန်း နှင့် ငှက်ဖျားရောဂါ ကင်းဝေးရေးအတွက် အမေရိကန်ဒေါ်လာ (၉၇.၄၄)သန်း စုစုပေါင်း အမေရိကန်ဒေါ်လာ (၃၂၁.၄၄) သန်း ရန်ပုံငွေ ဆက်လက် ထောက်ပံ့လှူဒါန်းမည် ဖြစ်ကြောင်း သိရသည်။
 
ကမ္ဘာ့ရန်ပုံငွေအဖွဲ့မှ ဆွေးနွေးရာတွင် ကမ္ဘာ့ရန်ပုံငွေအဖွဲ့ အထောက်အပံ့ဖြင့် ဆောင်ရွက်ရာတွင် ဒေသတွင်း နိုင်ငံများနှင့် နှိုင်းယှဉ်လျှင် မြန်မာနိုင်ငံသည် သိသာထင်ရှား သော အောင်မြင်မှုများကို အချိန်တိုအတွင်း ရရှိခဲ့သည့် (Flagship Country) ဖြစ်ကြောင်း ဦးစွာပြောကြားထားကြောင်း ဆိုသည်။
 
ဆက်လက်၍ ကမ္ဘာ့ရန်ပုံငွေအဖွဲ့မှ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဆိုင်ရာဥပဒေကို ပြင်ဆင်သည့် ဥပဒေကြမ်းကိစ္စနှင့် စပ်လျဉ်း၍ လည်းကောင်း၊ ကမ္ဘာ့ရန်ပုံငွေအဖွဲ့ အထောက်အပံ့ဖြင့် ဆောင်ရွက် သော ရောဂါကြီး (၃)မျိုး စီမံချက်လုပ်ငန်း များ၏ လုပ်ငန်း စွမ်းဆောင်ရည်အား အကဲဖြတ်ခြင်း ပြုလုပ်မည့် Office of Inspector General (OIG) အဖွဲ့ လာရောက်မည့်ကိစ္စနှင့် စပ်လျဉ်း၍လည်းကောင်း၊ ကမ္ဘာ့ရန်ပုံငွေအဖွဲ့ အထောက်အပံ့ဖြင့် မြန်မာနိုင်ငံတွင် ငှက်ဖျားရောဂါ လုံးဝကင်းစင်ရေးအတွက် ဒေသတွင်း နိုင်ငံများနှင့် ပူးပေါင်း ဆောင်ရွက်မည့် 'RAI2E" စီမံချက်နှင့် စပ်လျဉ်း၍လည်းကောင်း၊ တီဘီနှင့် HIV/ AIDS ရောဂါများ တိုက်ဖျက်ရေး အတွက် ကမ္ဘာ့ရန်ပုံငွေအဖွဲ့မှ ဆက်လက် ပံ့ပိုးသွား မည့်အခြေအနေ များကိုလည်းကောင်း ဆွေးနွေးခဲ့ကြောင်း ဖော်ပြထားသည်။
 
ပြည်ထောင်စုဝန်ကြီးက ပြန်လည်ဆွေးနွေးရာတွင် ရောဂါကြီး (၃)မျိုး တိုက်ဖျက်ရေး လုပ်ငန်းများတွင် ယခုကဲ့သို့ အောင်မြင်မှုများ ရရှိနိုင်ရေးအတွက် ရန်ပုံငွေများထောက်ပံ့ပေး ခဲ့ပြီး ဆက်လက် အကူအညီများ ပေးလျက်ရှိသော ကမ္ဘာ့ရန်ပုံငွေအဖွဲ့အား အထူးကျေးဇူးတင် ရှိကြောင်း၊ မူးယစ်ဆေးဝါး အလွဲသုံးမှုနှင့် ပတ်သက်လျှင် သုံးစွဲသူများကို အရေးယူခြင်းထက် ပညာပေးခြင်းနှင့် မိမိဆန္ဒအလျောက် ကုသမှုကို ခံယူလာစေရန် စည်းရုံးရမည်ကြောင်း၊ ငှက်ဖျားရောဂါ ကင်းဝေးရေး ဆောင်ရွက်ရာတွင် ရောဂါပိုး သယ်ဆောင် ကူးစက်ပျံ့နှံ့စေသော ခြင်များနှင့် ၄င်းခြင်များ၏ ပိုးသတ်ဆေးယဉ်ပါးမှု အခြေအနေများ ကိုလည်း အရေးကြီးသော ကဏ္ဍတစ်ရပ်အနေဖြင့် ထည့်သွင်း ဆောင်ရွက်ရမည် ဖြစ်ကြောင်း၊ ကမ္ဘာ့ရန်ပုံငွေအဖွဲ့မှ လုပ်ငန်းစွမ်းဆောင်ရည် ဆန်းစစ်သုံးသပ်သော အဖွဲ့ (OIG) ရောက်ရှိလာခြင်းကို ကြိုဆိုကြောင်း၊ မိမိတို့၏ လုပ်ငန်းဆောင်ရွက်မှုများကို မတူညီသည့် ရှုထောင့်မှ ကြည့်ရှုမည်ဖြစ်၍ အမြင်များ ဖလှယ်ပြီး လုပ်ငန်းများ ပိုမိုထိရောက်အောင် ဆောင်ရွက်နိုင်မည် ဖြစ်ပါကြောင်း၊ တီဘီရောဂါ ဖြစ်ပွားမှုများကို ထိရောက်စွာ လျော့ချသွားနိုင် ရန်အတွက် ပြည်သူလူထုအတွင်း တိမ်မြုပ်နေသော တီဘီရောဂါ ဖြစ်ပွားနေသူများအား ရှာဖွေဖော်ထုတ် ကုသခြင်းနှင့် ကျန်းမာရေး အသိပညာ မြှင့်တင်ခြင်းလုပ်ငန်းများ ဆောင်ရွက် ရမည် ဖြစ်ပါကြောင်း ဆွေးနွေးခဲ့သည်။
 
ဆက်လက်ပြီး ပြည်ထောင်စုဝန်ကြီးက University of California, San Francisco (UCSF) မှ Professor Roly Gosling, Professor of Epidemiology and Biostatistics, Director of Malaria Elimination Initiative, Global Health Group ဦးဆောင်သော အဖွဲ့နှင့်တွေ့ဆုံ၍ ငှက်ဖျားရောဂါ တိုက်ဖျက်ရေး အပါအဝင် ကူးစက်နှင့် မကူးစက်ရောဂါ တိုက်ဖျက်ရေး စီမံချက်လုပ်ငန်းများတွင် ငွေရေး၊ ကြေးရေးဆိုင်ရာ စီမံခန့်ခွဲမှု များကို ယခုထက် ပိုမိုကောင်းမွန်စေရေး အတွက် University of California, San Francisco (UCSF)နှင့် ပူးပေါင်းဆောင်ရွက် နိုင်ရေး ဆွေးနွေးခဲ့ကြောင်း သတင်းထုတ်ပြန်ထားသည်။
 
ဓာတ်ပုံ-ကျန်းမာရေးနှင့်အားကစားဝန်ကြီးဌာန
The Ladies News
 

 

Vote: 
No votes yet

Add new comment