မြန်မာနိုင်ငံအတွင်း ဘိန်းစိုက်ပျိုးမှု သိသိသာသာ ကျဆင်းလာဟု ဆို

အစိုးရသစ်လက်ထက် ၂၀၁၆ ခုနှစ်တွင် ဘိန်းစိုက်ပျိုးမှုသည် အထိုက် အလျောက် ကျဆင်းခဲ့ရာမှ ၂၀၁၇ ခုနှစ်တွင် သိသိသာသာ ကျဆင်းလာကြောင်း မြန်မာနိုင်ငံ ဘိန်းစိုက်ပျိုးထုတ်လုပ်မှု စစ်တမ်း အစီရင်ခံစာအရ သိရသည်။
 
မြန်မာနိုင်ငံ၏ ဘိန်းစိုက်ပျိုး ထုတ်လုပ်မှုသည် ပြန်လည်ကျဆင်းလာခဲ့ရာ ၂၀၀၆ ခုနှစ်တွင် ဟက်တာ ၂၂၁၅၀၀ အထိ အနိမ့်ဆုံးသို့ ရောက်ရှိခဲ့ပြီး ၂၀၀၇ ခုနှစ်မှ ၂၀၁၃ ခုနှစ်ထိ ပြန်လည် မြင့်တက်ခဲ့ကြောင်း၊ ၂၀၁၃ ခုနှစ်မှ ၂၀၁၆ ခုနှစ်ထိ ဘိန်းစိုက်ပျိုးမှုသည် အထိုက်အလျောက် ကျဆင်းခဲ့ရာမှ ၂၀၁၇ ခုနှစ်တွင် သိသိသာသာ ကျဆင်းလာသည်ကို တွေ့ရကြောင်း မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အန္တရာယ် တားဆီး ကာကွယ်ရေးဗဟိုအဖွဲ့ ဥက္ကဌ၊ ပြည်ထဲရေးဝန်ကြီး ဌာန၊ ပြည်ထောင်စုဝန်ကြီး၊ ဒုတိယဗိုလ်ချုပ်ကြီး ကျော်ဆွေက ဒီဇင်ဘာ ၆ ရက် တွင်ပြုလုပ်သည့် မြန်မာနိုင်ငံ ဘိန်းစိုက်ပျိုး ထုတ်လုပ်မှု စစ်တမ်း အစီရင်ခံစာ ထုတ်ပြန်ခြင်း အခမ်းအနားတွင် ပြောကြားခဲ့သည်။
 
ယခုထုတ်ပြန်သည့် အစီရင်ခံစာသည် မူးယစ်ဗဟိုနှင့် UNODC တို့ ပူးပေါင်းဆောင်ရွက်ခဲ့သည့် ၂၀၁၇ ခုနှစ် ဘိန်းစိုက်ပျိုးထုတ်လုပ်မှု စစ်တမ်းကောက်ယူခြင်း ရလဒ်များအား တင်ပြခဲ့သည့် အစီရင်ခံစာ ဖြစ်ကြောင်း၊ မူးယစ်ဗဟိုနှင့် UNODC တို့ပူးပေါင်းပြီး မြန်မာနိုင်ငံ ဘိန်းစိုက်ပျိုး ထုတ်လုပ်မှုကို ၂၀၀၁ ခုနှစ် ကတည်းက တရားမဝင် မူးယစ်ဆေးဝါး သီးနှံများ စစ်တမ်းကောက်ယူခြင်း အစီအစဉ် (ICMP) အရ ဆောင်ရွက်ခဲ့သည်။ ICMP သည် ၂၀၀၉ ခုနှစ် မတ်လတွင် ကျင်းပခဲ့သည့် ကုလသမဂ္ဂ မူးယစ်ဆေးဝါး ကော်မရှင်၏(၅၃)ကြိမ်မြောက် အထူးအစည်း အဝေးက ချမှတ်ခဲ့သော လုပ်ငန်းစီမံချက်များပါ အတိုင်း တရားမဝင် မူးယစ်သီးနှံများ စိုက်ပျိုး ထုတ်လုပ်မှုစစ်တမ်း ကောက်ယူခြင်းကို သက်ဆိုင်ရာ အစိုးရများနှင့် ပူးပေါင်းဆောင်ရွက်နေခြင်း ဖြစ်ကြောင်း လည်း ၎င်းကဆိုသည်။
 
ဘိန်းစိုက်ပျိုးမှုကို ရှမ်းပြည်နယ်တွင် အများဆုံး စိုက်ပျိုးကြပြီး ကချင်၊ ချင်းနှင့် ကယားပြည်နယ် တို့တွင် စိုက်ပျိုးနေသည်ကို တွေ့ရှိရသည်။ ၁၉၉၉ ခုနှစ်တွင် မူးယစ်ဆေးဝါး ပပျောက်ရေး (၁၅)နှစ် စီမံကိန်းနှင့် နောက်တိုး (၅)နှစ် စီမံကိန်းတွေကို ၂၀၁၉ ခုနှစ်ထိ ရေးဆွဲကာ ဘိန်းအပါအဝင် မူးယစ်ဆေးဝါး တိုက်ဖျက်ရေးလုပ်ငန်းများ ဆောင်ရွက်ခဲ့သည်။
 
ယခုအခါ UNODC စီမံကိန်းများကို ရှမ်းပြည်နယ် တောင်ပိုင်း၊ ဟိုပုန်းနှင့် လွိုင်လင်ဒေသများတွင် ဘိန်းအစားထိုး သီးနှံဖြစ်သည့် ကော်ဖီ စိုက်ပျိုးခြင်းနှင့် စီးပွားဖြစ် သစ်တောစိုက်ပျိုးထိန်းသိမ်းမှုတို့ကို ဥရောပသမဂ္ဂ နှင့် ဂျာမနီနိုင်ငံ တို့၏ အကူအညီဖြင့် ဆောင်ရွက်လျက်ရှိသည်။
 
မူးယစ်ဗဟိုသည် UNODC အပါအဝင် မိတ်ဖက်အဖွဲ့အစည်းများနှင့် ပူးပေါင်းပြီး မူးယစ်ဆေးဝါး ထိန်းချုပ်ရေးနှင့် ပတ်သက်ပြီး ကာကွယ်တားဆီးရေး၊ ကုသရေးနှင့် ပြန်လည်ထူထောင်ရေး၊ ထုတ်လုပ်မှု လျှော့ချနိုင်ရေး၊ အစားထိုး ဖွံ့ဖြိုးရေး စသည့် ကဏ္ဍအသီးသီးအပေါ် အခြေခံ၍ အမျိုးသား မူးယစ်ဆေးဝါး ထိန်းချုပ်ရေးမူဝါဒသစ်ကို ၂၀၁၇ ခုနှစ် နိုဝင်ဘာလတွင် အတည်ပြုနိုင်ခဲ့ပြီးဖြစ်သည်။
 
မူးယစ်ဆေးဝါးဆိုင်ရာ မူဝါဒသစ် အတည်ပြုခဲ့ပြီး ဖြစ်သည့်အတွက် ၎င်းမူဝါဒအပေါ် အခြေခံသည့် ဘိန်းစိုက်ပျိုးမှု လျော့ကျစေရေး သည်လည်း အဓိက အခန်းကဏ္ဍတစ်ရပ်အဖြစ် ထည့်သွင်းရေးဆွဲ ကြရမည်ဖြစ်ကြောင်း၊ ဘိန်းစိုက်ပျိုးမှု လျော့ကျစေရန် ဘိန်းစိုက်ပျိုးဒေသများတွင် ဘက်ပေါင်းစုံ ဖွံ့ဖြိုးမှု ပါဝင်သည့် ကျေးလက်ဖွံ့ဖြိုးရေးကို ဦးစားပေး လုပ်ဆောင်ရမည်ဖြစ်ပြီး အစားထိုးဖွံ့ဖြိုးမှုလုပ်ငန်း များတွင် တောင်သူများအား အမှန်တကယ် အကျိုးရှိမည့် အစားထိုးသီးနှံ၊ မွေးမြူရေး၊ ဈေးကွက် ရရှိရေး အခြားဝင်ငွေရ လုပ်ငန်းများကို ဖော်ဆောင်ပေးရမှာ ဖြစ်ပါကြောင်း၊ မူးယစ်ဆေးဝါး တိုက်ဖျက်ရေးဆိုင်ရာ မူဝါဒ မဟာဗျူဟာ ချမှတ်သူများအတွက် ယခုအစီရင်ခံစာတွင် ပါရှိသည့် ဘိန်းစိုက်ဧရိယာ အကျယ်အဝန်း၊ ဘိန်းထုတ်လုပ်မှု၊ ပြောင်းလဲလာသည့် စိုက်ပျိုးမှုပုံစံများသည် မရှိမဖြစ်လိုအပ်သည့် ကိန်းဂဏန်း အချက်အလက်များ ဖြစ်ကြောင်းလည်း ဒုတိယဗိုလ်ချုပ်ကြီး ကျော်ဆွေက ထည့်သွင်း ပြောကြားခဲ့သည်။
 
The Ladies News
 

 

Vote: 
No votes yet

Add new comment