ကုလအထူးအစည်းအဝေးတွင် အိုအိုင်စီမှ တင်သွင်းသော မြန်မာနိုင်ငံ ဆိုင်ရာ ဆုံးဖြတ်ချက်အဆိုမူကြမ်းအား မဲခွဲ ၊ မြန်မာကိုယ်စားလှယ် အဖွဲ့မှ ပါဝင်ပတ်သက်မည် မဟုတ်ကြောင်း ထုတ်ဖော်ပြောကြားခဲ့

ဂျီနီဗာမြို့ ကုလသမဂ္ဂ အဆောက်အအုံရှိ လူ့အခွင့်အရေး ကောင်စီ၌ အစ္စလာမ်မစ် နိုင်ငံများ ပူးပေါင်း ဆောင်ရွက်ရေး အဖွဲ့ (အိုအိုင်စီ)မှ မြန်မာနိုင်ငံနှင့်စပ်လျဉ်း၍ (၂၇) ကြိမ်မြောက် အထူးအစည်းအဝေး တစ်ရပ်ကို ဒီဇင်ဘာ ၅ ရက်က ခေါ်ယူခဲ့ပြီး ၊အစည်းအဝေးတွင် ဘင်္ဂလားဒေ့ရ်ှနိုင်ငံက ရခိုင်ပြည်နယ်ရှိ လူနည်းစုများနှင့် မူဆလင် အသိုက်အဝန်း၏ လူ့အခွင့်အရေး အခြေအနေနှင့် ပတ်သက်၍ ဆုံးဖြတ်ချက် အဆိုမူကြမ်းကို အရေးယူ ဆောင်ရွက်ရန် အဆိုတင်သွင်း ခဲ့ကြောင်း သတင်းထုတ်ပြန်ရေး ကော်မတီက ထုတ်ပြန်ခဲ့သည်။
 
ယင်း ဆုံးဖြတ်ချက်အဆိုအား အရေးယူဆုံးဖြတ်ခြင်းမပြုမီ အမြဲတမ်း ကိုယ်စားလှယ် သံအမတ်ကြီး ဦးထင်လင်း က မိန့်ခွန်းပြောကြားခဲ့ရာတွင် မြန်မာနိုင်ငံသည် နိုင်ငံတစ်နိုင်ငံ တည်းကိုသာ ချမှတ်သည့် မည်သည့် ဆုံးဖြတ် ချက်မျိုးကို မဆို ဆန့်ကျင်ကြောင်း၊ ထိုသို့ ဆုံးဖြတ်ချက် ချမှတ်ခြင်းသည် ပိုမိုကွဲပြားမှုနှင့် ထိပ်တိုက်ရင်ဆိုင်မှုများကိုသာ ဖြစ်ပေါ်လာစေနိုင်သည်။ လူ့အခွင့်အရေး ကောင်စီ၏ ဘက်မလိုက်မှု၊ ဓမ္မဓိဋ္ဌာန်ကျမှု၊ ရွေးချယ်မှု မရှိစေရေး စသည့်မူများနှင့် လိုက်လျောညီထွေ မရှိကြောင်း၊ယခုအဆိုမူကြမ်းသည် ယုံကြည်မှု တူညီခြင်းမရှိသည့် လူစုတစ်စုအပေါ် တွင်သာ အဓိကအလေးထား ကြောင်း၊ လူ့အခွင့်အရေး ကာကွယ်စောင့်ရှောက်ခြင်းတွင် ကမ္ဘာပေါ်ရှိ မည်သည့် လူမျိုး၊ ဘာ သာနှင့် ကျား/မ ခွဲခြားမှု မရှိသင့်ကြောင်း၊ အဆိုမူကြမ်းပါ အချက်အချို့ သည် မြန်မာနိုင်ငံ၏ အချုပ်အခြာ အာဏာကို ထိပါးသကဲ့သို့ ဖြစ်နေသည်။ ခိုင်မာလုံလောက်သည့် သက်သေများမရှိဘဲ စွပ်စွဲချက် များကိုလည်း ထည့်သွင်း ဖော်ပြထားကြောင်း၊ နိုင်ငံတကာ၏ အကူအညီပေးမှုသည် ပြဿနာကို ဖြေရှင်းမှုသာ ဖြစ်သင့်ကြောင်း၊ ပိုမိုဆိုးရွားစေမှုကို မဖြစ်စေသင့်ကြောင်း၊အဆိုမူကြမ်း၌ ARSA ၏ အကြမ်းဖက် တိုက်ခိုက်ခြင်း ကို ရှုတ်ချခြင်း မရှိကြောင်း၊ ယင်း အချက်များကြောင့် မြန်မာကိုယ်စားလှယ် အဖွဲ့သည် ယခုအဆိုမူကြမ်းအား လက်မခံနိုင် သဖြင့် ပါဝင်ပတ်သက်ခြင်းပြုမည် မဟုတ်ကြောင်း၊ ရခိုင်ပြည်နယ် အရေးကိစ္စသည် ရှုပ်ထွေးသိမ်မွေ့ ကြောင်း၊ နိုင်ငံတကာ အသိုက် အဝန်းအနေဖြင့် စိန်ခေါ်မှု များကို နားလည်ဖို့လိုကြောင်း၊ လူ့အခွင့်အရေး ကောင်စီ၏ ဆုံးဖြတ်ချက် ရှိသည်ဖြစ်စေ၊ မရှိသည်ဖြစ်စေ ရခိုင်ပြည်နယ်တွင် ရင်ဆိုင် နေရသော ကိစ္စများကို ဆက်လက်ဖြေရှင်း ဆောင်ရွက်သွားမည် ဖြစ်ကြောင်း ပြောကြားခဲ့သည်ဟု ထုတ်ပြန်ချက်တွင် ဖော်ပြထားသည်။
 
လူ့အခွင့်အရေး ကောင်စီအဖွဲ့ဝင် တရုတ်နိုင်ငံ ကိုယ်စားလှယ်အဖွဲ့က ယခုအဆိုမူကြမ်းမဲခွဲရန် တောင်းဆို ခဲ့ပြီး၊ ဆုံးဖြတ်ချက် အဆိုအား မဲခွဲဆုံးဖြတ်ရာတွင် ထောက်ခံမဲ ၃၃ မဲ၊ ကန့်ကွက်မဲ ၃ မဲ၊ ကြားနေမဲ ၉ မဲဖြင့် အတည်ပြုခဲ့သည်။ လူ့အခွင့်အရေး ကောင်စီအဖွဲ့ဝင် (၂) နိုင်ငံမှ ပါဝင်မဲပေးခြင်း မပြုခဲ့ကြောင်း ကန့်ကွက်မဲပေးသည့် နိုင်ငံများမှာ မဲခွဲရန် တောင်းဆိုပေးသည့် တရုတ်နိုင်ငံ၊ ၂ဝ၁၇ ခုနှစ်အတွက် အာဆီယံဥက္ကဋ္ဌ တာဝန်ယူ ထားသည့် ဖိလစ်ပိုင်နိုင်ငံနှင့် ဘူရွန်ဒီနိုင်ငံတို့ ဖြစ်ကြောင်း ထုတ်ပြန်ချက်တွင် ဖော်ပြထားသည်။
 
မြန်မာနိုင်ငံ အစိုးရအနေဖြင့် ရခိုင်ပြည်နယ် အရေးကိစ္စကို ပြည်တွင်းတွင် ဖြေရှင်းဆောင်ရွက်နေသကဲ့သို့ ဘင်္ဂလားဒေ့ရ်ှနိုင်ငံ နှင့်လည်း နှစ်နိုင်ငံ ညှိနှိုင်းဖြေရှင်းလျက် ရှိသည်။ ဤအခြေအနေတွင် အဆိုမူကြမ်း ချမှတ်ခြင်းသည် မြေပြင် အခြေအနေကို အထောက်အကူ မဖြစ်စေဘဲ ပိုမိုရှုပ်ထွေးလာစေနိုင်သည့် အချက်ကို ထောက်ပြ၍ တရုတ်နိုင်ငံ ကိုယ်စားလှယ်အဖွဲ့အနေဖြင့် မဲခွဲရန် တောင်းဆိုခဲ့ခြင်း ဖြစ်သည်။
လူ့အခွင့်အရေး ကောင်စီအဖွဲ့ဝင် ၄၇ နိုင်ငံရှိသည့်အနက် ၁၄ နိုင်ငံက ထောက်ခံခြင်း မပြုခဲ့ကြသဖြင့် အဆိုမူကြမ်းမှာ တူညီ ဆန္ဒဖြင့် အတည်ပြုနိုင်ခဲ့ခြင်း မရှိကြောင်း၊ ရခိုင်ပြည်နယ်ကိစ္စနှင့် ပတ်သက်၍ ဘက်ပေါင်းစုံမှ ဖိအားပေး နေသည့်ကြားမှ မဲခွဲရန် တောင်းဆိုပေးခြင်း၊ အဆိုမူကြမ်းကို ကန့်ကွက်မဲပေးခြင်း (သို့မဟုတ်) ကြားနေမဲပေးခြင်း (သို့မဟုတ်) မဲပေးမှုတွင် မပါဝင်ခြင်းဖြင့် မြန်မာနိုင်ငံအပေါ် နားလည်မှုပြသခဲ့ ကြသည့် လူ့အခွင့်အရေး ကောင်စီ အဖွဲ့ဝင် နိုင်ငံများကို နိုင်ငံခြားရေး ဝန်ကြီးဌာနမှ ကျေးဇူးတင်ရှိကြောင်း ဖော်ပြခဲ့သည်ဟု သတင်း ထုတ်ပြန်ရေး ကော်မတီက ထုတ်ပြန်ခဲ့သည်။
 
The Ladies News
 

 

Vote: 
No votes yet

Add new comment