ငြိမ်းချမ်းရေးဖြစ်စဉ်တွင် အစိုးရအနေဖြင့် ဦးဆောင်သူအဖြစ် ပါဝင်သင့်သည်ဟု တိုင်းရင်းသား လက်နက်ကိုင်အဖွဲ့များပြော

အစိုးရ၊ လွှတ်တော်၊ တပ်မတော် အစုအဖွဲ့၊ NCA တွင် လက်မှတ်ရေး ထိုးထားသည့် တိုင်းရင်းသား လက်နက်ကိုင်များ အစုအဖွဲ့ နှင့် နိုင်ငံရေးပါတီများ အစုအဖွဲ့တို့ ဆွေးနွေးကြသည့် ငြိမ်းချမ်းရေးဖြစ်စဉ်တွင် အစိုးရအနေဖြင့် အကျိုးဆောင်ရုံဖြင့် မလုံလောက်ဘဲ ဦးဆောင်သူအဖြစ် ပါဝင်သင့်သည်ဟု တိုင်းရင်းသား လက်နက်ကိုင် အဖွဲ့အစည်းများက ထောက်ပြပြောဆိုကြသည်။
 
ဇူလိုင်လ ၂၁ ရက်နေ့က ရန်ကုန်မြို့ရှိ City Hotel တွင် ပြုလုပ်ခဲ့သော DVB Debate အစီအစဉ်တွင် ပြည်ထောင်စု ငြိမ်းချမ်းရေးညီလာခံ ၂၁-ရာစုပင်လုံ တတိယအကြိမ်အစည်းအဝေး၌ နိုင်ငံတော်၏ အတိုင်ပင်ခံ ပုဂ္ဂိုလ် ပြောကြားခဲ့သော အစိုးရအနေဖြင့် ငြိမ်းချမ်းရေးဖြစ်စဉ်တွင် အဓိကအင်အားစုများအကြား သဟဇာတဖြစ်နိုင်သည့် ရလဒ်ကောင်များ ထွက်ရန် ပံ့ပိုးအကျိုးဆောင်သည့် ညှိနှိုင်းဆောင်ရွက် မူမျိုးဖြင့် ချဉ်းကပ် ဆောင်ရွက်နေသည် ဟူသော ပြောကြားချက်ကို ဆွေးနွေးရာတွင် ၄င်းတို့က အထက်ပါအတိုင်း ပြောကြားခဲ့ခြင်းဖြစ်သည်။
 
ကရင်အမျိုးသား အစည်းအရုံး (KNU) မှ ဗဟိုကော်မတီဝင်ဖြစ်သူ ပဒိုမန်းငြိမ်းမောင်က နိုင်ငံကို ခေါင်းဆောင်သည့် အစိုးရအဖွဲ့သည် အကျိုးဆောင်ရုံဖြင့် မလုံလောက်ကြောင်း၊ အစိုးရမှ ဦးဆောင်၍ စေ့စပ်ညှိနှိုင်းမှုများ ပြုလုပ်ပေးရမည်ဟု ဆိုသည်။
 
`ကျွန်တော်တို့ ဘက်သုံးဖက်ဆွေးနွေးတဲ့အခါ တစ်ခါတလေကျရင် ကျွန်တော်တို့ ထိပ်တိုက်တိုးတာတွေရှိတယ်။ အဒီကြရင် ဒီလိုပဲ ငုတ်တုပ်ကြီးပဲ ထိုင်ကြည့်နေတယ်။ ကျွန်တော်တို့ UPDJC မှာ ကျွန်တော်တို့ အတွေ့အကြုံအရ အဲဒါမျိုးကြရင် ကျွန်တော်တို့က တိုင်းရင်းသားတွေဘက်က ၀င်ညှိပေးသင့်တယ်။ တပ်မတော်ဘက်ကို ၀င်ညှိပေးသင့်တယ်။ အစိုးရက ဒီလိုပဲ ကြားကနေထိုင်တယ်။ ဘာမှ ဦးဆောင်မှုမပေးနိုင်ဘူး။ ဒါကျွန်တော်တို့ အတွေ့အကြုံဖြစ်တယ်` ဟု ပဒိုမန်းငြိမ်းမောင်က ပြောကြားသည်။
 
ယခုလိုပြောကြားခြင်းမှာ အပြုသဘောဖြင့် ပြောကြားခြင်းဖြစ်ပြီး တိုင်ပြည်က သိရန်လိုကြောင်း၊ သို့မှာသာ မိမိတို့ အခက်အခဲများကို တိုင်းပြည်က ၀ိုင်းကူနိုင်မည်ဟု ထင်မြင်ကြောင်း ၄င်းက ပြောကြားသည်။
 
`အကျိုးဆောင်ပေးရုံနဲ့တော့ မလုံလောက်ဘူး။ အစိုးတစ်ရပ်ဟာ ဦးဆောင်ဖို့ပဲ။ တိုင်းပြည်ကို အုပ်ချုပ်တာ ဦးဆောင်ဖို့ပဲ၊ ကောင်းမွန်တဲ့စနစ်ကို ချမှတ်နိုင်ဖို့အတွက် ဦးဆောင်ဖို့ပဲ၊ ကြားဝင်ပေးရုံလောက် နဲ့တော့ မလုံလောက်ဘူးလို့ ကျွန်တော်ထင်ပါတယ်` ဟု ပဒိုမန်းငြိမ်းမောင်က ပြောကြားသည်။
 
ချင်းအမျိုးသားတပ်ဦး (CNF) ဒုဥက္ကဋ္ဌ ဒေါက်တာဆလိုင်းလျန်မှုန်းကလည်း ငြိမ်းချမ်းရေး လုပ်ငန်းစဉ်တွင် အစိုးရအနေဖြင့် တတယ့် ဦးဆောင်မှုကို ယူစေလိုသည်ဟု ပြောကြားသည်။
 
`ပွင့်ပွင့်လင်းလင်း ပြောမယ်ဆိုရင် ကျွန်တော်တို့ တိုင်းရင်းသား လက်နက်ကိုင် တော်လှန်ရေး အဖွဲ့အစည်းတွေ အနေနဲ့ အခုက အစိုးရနဲ့ တပ်မတော်ကို သီးခြားဆွေးနွေးတဲ့ ပုံစံမျိုး ခဏခဏပေါ်တယ်။ ဘာလိုလဲဆိုတော့ ကျွန်တော်တို့နဲ တပ်မတော်ပဲ ငြင်းခုန်လိုက်၊ ဆွေးနွေး အဖြေရှာမရ၊ ဒီကြားထဲမှာ အစိုးရက အကျိုးဆောင်တယ် ဆိုပြီးတော့လည်း ဘေးကနေထိုင်တဲ့ ဆိုတဲ့ပုံစံမျိုးနဲ့ ဆက်သွားလို့ မရတော့ဘူးလို့ ကျွန်တော်မြင်တယ်`ဟု ၄င်းက ပြောကြားသည်။
 
အစိုးရအနေဖြင့် ဦးဆောင်မှုကိုပေးရမှာဖြစ်ကြောင်း သို့ရာတွင် အဆုံးအဖြတ်ပေးသည့် နေရာတွင်မူ ကဏ္ဍပေါင်းစုံမှ အချက်အလက်များအပေါ် မူတည်ကာ အစိုးရ၏ ဦးဆောင်မှုကို လက်ခံသင့်၏၊ လက်မခံသင့်၏ ဆိုသည်မှာ အချက်တစ်ချက်ခြင်း အပေါ်တွင် မူတည်သည်ဟု ဒေါက်တာဆလိုင်းလျန်မှုန်းက ပြောကြားသည်။
 
`ဒီအစိုးရဦးဆောင်လို့ ကျွန်တော်တို့အားလုံး ဥုပ်သုဉ်လိုက်ရမယ် ဆိုတဲ့ဟာမျိူးက ဒီမိုကရေစီမကျပါဘူး။ အကြောင်အရာပေါ်မှာပဲ အခြေခံတယ်။ ခုနက ကျွန်တော်တဲ့စကားကို ဆက်ပြီးတော့ ပြောမယ်ဆိုရင် အခု လက်ရှိ အနေအထားက ပွင့်ပွင့်လင်းလင်း ပြည်သူလူထုကို ကျွန်တော်တင်ပြချင်တာက အစိုးရတစ်ရပ်နဲ့ ကျွန်တော်တို့ ဆွေးနွေးတဲ့ ပုံစံနဲ့တော့ ဒီငြိမ်းချမ်းရေး မအောင်မြင်နိုင်ဘူး။ ထို့အတွက်ကြောင့် ကျွန်တော်တို့ တိုင်းရင်းသားဘက်က တင်ပြတဲ့ တင်ပြမှု ဖက်ဒရယ်အခြေခံမူပဲဖြစ်ဖြစ်၊ ဒီမိုကရေစီအခြေခံမူပဲဖြစ်ဖြစ် ကျွန်တော်တို့ တင်ပြသင့် သလောက်တော့ တင်ပြပြီးပြီ။ အဲဒီအပေါ်မှာ အစိုးရနဲ့ တပ်မတော်ကနေ တိုင်ပင်ပြီးတော့ ဒီလောက်ကတော့ ဒီတိုင်းပြည်အတွက် လက်ခံသင့်တယ်၊ လက်မခံသင့်တယ်ဆိုတဲ့ဟာ သူတို့ရဲ့ ဘုံသဘောထားနဲ့ လာဆွေးနွေး သင့်တယ်လို့ ကျွန်တော်မြင်ပါတယ်။ တပ်မတော်က တခြား၊ အစိုးရက တခြား ဆိုတဲ့ပုစံမျိုးနဲ့ လာဆွေးနွေးနေသ၍ ကတော့ ဒီငြိမ်းချမ်းရေးဖြစ်စဉ် ရှေ့တိုးမှာမဟုတ်ဘူး` ဟု ၄င်းက ပြောကြားသည်။
 
ပြည်ထောင်စု ငြိမ်းချမ်းရေးညီလာခံ ၂၁-ရာစုပင်လုံ တတိယအစည်းအဝေး ဆဋ္ဌမနေ့အခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ်က ကျေးဇူးတင်စကား ပြောကြားရာ၌ ကျွန်မတို့အစိုးရအနေဖြင့် ငြိမ်းချမ်းရေးဖြစ်စဉ်ကို ဘယ်လိုပုံဖော်သင့်သည်၊ ဘာဖြစ်သင့်သည်ဆိုသည့် ဦးဆာင်မှုကိုသာ အခြေခံသည့် ပုံသဏ္ဍာန်ဖြင့် ချဉ်းကပ် ဆောင်ရွက်နေခြင်း မဟုတ်ကြောင်း၊ ငြိမ်းချမ်းရေးဖြစ်စဉ်မှာ ပါရှိသည့် အဓိကအင်အားစုများအကြား သဟဇာတ ဖြစ်နိုင်သည့် ရလဒ်ကောင်များထွက်ရန် ပံ့ပိုးအကျိုးဆောင်သည့် ညှိနှိုင်းဆောင်ရွက်မှုမျိုးဖြင့် ချဉ်းကပ်ဆောင်ရွက် နေခြင်းဖြစ်သည်ဟု ထည့်သွင်းပြောကြာထားသည်။
 
အောင်ရဲနောင်
The Ladies News
 

 

Vote: 
No votes yet

Add new comment