လူမှုဖူလုံရေးအဖွဲ့နှင့် ပုဂ္ဂလိကပူးပေါင်းပြီး ရန်ကုန်တိုင်းအပြင် အခြားပြည်နယ်တိုင်းများတွင် ဆေးရုံ၊ဆေးခန်းများ ထပ်မံတိုးချဲ့ဖွင့်လှစ်သွားမည်ဟုဆို

အလုပ်သမား၊ လူဝင်မူကြီးကြပ်ရေးနှင့် ပြည်သူ့အင်အား ၀န်ကြီးဌာန၏ လူမှုဖူလုံရေး အဖွဲ့အနေဖြင့် လူမှုဖူလုံရေး ထည့်ဝင်ထားသည့် အကျုံးဝင် အာမခံလုပ်သားများအတွက် ကျန်းမာရေး စောင့်ရှောက်မှုပေးနိုင်ရန် ပုဂ္ဂလိကနှင့် ပူးပေါင်းပြီး ရန်ကုန်တိုင်းဒေသကြီး အပြင် အခြားပြည်နယ် တိုင်းဒေသကြီးများတွင် ဆေးရုံ၊ ဆေးခန်းများ ထပ်မံတိုးချဲ့ ဖွင့်လှစ်သွားရန်ရှိကြောင်း လူမှုဖူလုံရေးအဖွဲ့မှ သိရသည်။
 
လက်ထောက်ညွှန်ကြားရေးမှူး ရန်ကုန်တိုင်းဒေသကြီး တာဝန်ခံအရာရှိ ဦးစိန်သန်းမြင့်က “ပုဂ္ဂလိကနဲ့ပေါင်းပြီး လက်ရှိဆေးခန်းသုံးခန်း ဖွင့်လှစ်ထားပြီးဖြစ်ပါတယ်။ ထပ်မံပြီး ဖွင့်လှစ်မယ့်အစီအစဉ်တွေ ရှိပါတယ်။ ပုဂ္ဂလိကနဲ့ ပူးပေါင်းပြီး ဖွင့်လှစ်မယ့် စာချုပ်ဆေးရုံဆေးခန်းတွေပေ့ါ။ ကျွန်တော်တို့ ထပ်မံတိုးချဲ့သွားဖို့ရှိတယ်။ နေရာဒေသ အနေနဲ့က အတိအကျပြောလို့မရတဲ့ အနေအထား ရှိပါတယ်။ လက်ရှိမှာတော့ ရန်ကုန်တိုင်းက အလုပ်သမား အင်အားထုများတယ်။ များတဲ့အတွက် ကျွန်တော်တို့ ရန်ကုန်ကနေစပြီး လုပ်နေတာဖြစ်ပါတယ်။ အခြားပြည်နယ် တိုင်းတွေကို နောက်ပိုင်းမှာ တစ်စတစ်စနဲ့ တိုးချဲ့သွားဖို့ အစီအစဉ်ရှိပါတယ်”ဟု ပြောသည်။
 
လူမှုဖူလုံရေးအဖွဲ့အနေဖြင့် ဆေးရုံဆေးခန်းများအား တစ်ဖက်တွင် အဆင့်မြှင်တင်ခြင်းများ လုပ်ဆောင်နေသည့် တစ်ပြိုင်နက်တည်းမှာ တစ်ဖက်တွင် ကျန်းမာရေး စောင့်ရှောက်မှုလုပ်ငန်း ပိုမိုတိုးမြှင့်နိုင်ရေးအတွက် ပုဂ္ဂလိကနှင့် ပူးပေါင်း လုပ်ကိုင်ရန် စာချုပ်များချုပ်ဆို ဆောင်ရွက်နေခြင်းဖြစ်ကြောင်း ဆိုသည်။
 
လူမှုဖူလုံရေးနှင့်ပုဂ္ဂလိကပူးပေါင်းဖွင့်သည့် Care Well ဆေးခန်းများကို ရန်ကုန်တိုင်းဒေသကြီး အတွင်းရှိ အလုပ်သမား အများစုတည်ရှိသည့် ရွှေပြည်သာစက်မှုဇုန်၊ မင်္ဂလာဒုံစက်မှုဇုန်နှင့် လှိုင်သာယာ စက်မှုဇုန်တို့တွင် ဆေးခန်းသုံးခု ဖွင့်လှစ်ထားရှိကာ ကုသပေးလျက်ရှိကြောင်း သိရသည်။
 
ရွှေပြည်သာ Care Well ဆေးခန်းမှ တာဝန်ခံဆရာဝန်ကြီး ဒေါက်တာချိုချိုတင်က “အာမခံကိုင်ဆောင်ထားတဲ့ လူနာတွေ တစ်နေ့ကို ၄၅ ယောက်ကနေ ၅၀ အထိ လာရောက်ပြသပါတယ်။ ဆေးခန်းကိုလည်း နေ့စဉ် မနက် ၈ နာရီကနေ ညနေ ၄ နာရီအထိ ဖွင့်ပါတယ်။ တနင်္ဂနွေနေ့နဲ့ အစိုးရရုံးပိတ်ရက်တွေမှာတော့ ဆေးခန်းပိတ်ပါတယ်။ ဆေးခန်းမှာက နေ့စဉ်ဆိုရင် ရာသီအလိုက်ဖြစ်တဲ့ တုပ်ကွေးရောဂါ၊ အဆုတ်ယောင်ရောဂါတွေ ကုသပေးပါတယ်။ နှလုံး ဆီးချိုသွေးတိုးရောဂါတွေ ကုသပေးတယ်။ ကိုယ်ဝန်ဆောင်မိခင်တွေဆိုရင် ကိုယ်ဝန်ဆောင် စောင့်ရှောက်မှု လုပ်ငန်းတွေ လုပ်ပေးပါတယ်။ ဆေးခန်းက ရွှေပြည်သာစက်မှုဇုန်ထဲမှာ ဖြစ်တဲ့အတွက် အရေးပေါ်ထိခိုက်ရှနာ ဒဏ်ရာရတဲ့ လူနာတွေကို အသေးစားခွဲစိတ်အတွက် သီးသန့်အခန်းလေးနဲ့ကုသပေးပါတယ်။ ဒီအတွက် ဆေးရုံသွားစရာ မလိုတဲ့ ထိခိုက်ဒဏ်ရာ ရရှိမှုအတွက် ဒီဆေးခန်းမှာပဲ ကုသပေးပါတယ်” ဟု ဆေးကုသပေးနေမှု အခြေအနေနှင့် ပတ်သက်ပြီး ပြောသည်။
 
လူမှုဖူလုံရေးအဖွဲ့တွင် အကျုံးဝင်မှတ်ပုံတင်ထားပြီး လူမှုဖူလုံရေးကြေး ထည့်ဝင်ထားသည့် လုပ်သားများအနေဖြင့် ကတ်တွင် သတ်မှတ်ထားသည့် သက်ဆိုင်ရာ လူမှုဖူလုံရေး ဆေးခန်းတွင်သာမက နီးစပ်ရာ လူမှုဖူလုံရေး ဆေးရုံ၊ ဆေးခန်းများတွင် အခမဲ့ဆေးကုသခွင့်ရှိကြောင်း သိရသည်။
 
ထိုသို့ ဆေးကုသခွင့်ခံယူရာတွင် ထည့်ဝင်ကြေး ထည့်ဝင်ပြီးသည့် အလုပ်သမားများ ကုသခွင့်ရှိသော်လည်း အလုပ်သမားများ အနေဖြင့် လူမှုဖူလုံရေးကတ်ပြား မရှိပါက ဆေးကုသခွင့် မရမည်ကို စိုးရိမ်ကြောင့်ကြခြင်းများ ရှိကြောင်းသိရသည်။
 
ယင်းကိစ္စနှင့် ပတ်သက်ပြီး အလုပ်သမားများ အနေဖြင့် စမတ်ကတ်မရသေးသော်လည်း လူမှုဖူလုံရေးအဖွဲ့မှ ထုတ်ပေးသည့် ယာယီကတ်ပြားဖြင့် သော်လည်းကောင်း ၊ ယာယီကတ်ပြား မရသေးပါက လူမှုဖူလုံရေးရုံးများက ထောက်ခံချက်နှင့် သက်ဆိုင်ရာ စက်ရုံတာဝန်ရှိသူများက မည်သည့်လတွင် လူမှုဖူလုံရေး ထည့်ဝင်ထားခြင်း မှန်ကန်ကြောင်း စာရွက်ဖြင့် လူမှုဖူလုံရေး ဆေးရုံဆေးခန်းနှင့် ပုဂ္ဂလိကဖြင့် ပူးပေါင်းဖွင့်လှစ်ထားသည့် Care Well ဆေးခန်းများတွင် သွားရောက် ကုသွားနိုင်ကြောင်း ဆိုသည်။
 
ဦးစိန်သန်းမြင့်က “တကယ်တမ်းတော့ အလုပ်သမားတွေဘက်ကလည်း လက်ထဲမှာ လူမှုဖူလုံရေးကတ် မရသေးတဲ့ အတွက် ဆေးကုသခွင့်မရဘူးလို့ ခေါင်းထဲမှာ စွဲနေတာလည်း ဖြစ်နေပါတယ်။ ကျွန်တော်တို့ တင်ပြချင်တာကတော့ လက်ထဲကို လူမှုဖူလုံရေးကတ် မရောက်သေးဘူးဆိုရင် အစောက တင်ပြသလို စက်ရုံကနေ ထောက်ခံချက် လုပ်ပေးလို့ရတယ်။ အလုပ်သမားက ဘယ်လက ထည့်ဝင်ကြေး ပေးသွားတယ်ဆိုတာ ဒီလိုသွားလိုက်ရင် ဆေးကုသမှုကို မဆုံးရှုံးပါဘူး။ သက်ဆိုင်ရာ ဆေးရုံဆးခန်းက ဆေးကုသမှုပေးပါတယ်” ဟု ပြောသည်။
 
၎င်းအာမခံ အလုပ်သမားများအား ဆေးကုသမှုပေးနိုင်ရန် လူမှုဖူလုံရေး ဆေးရုံဆေးခန်းများကို အဆင့်မြှင်တင်ခြင်းများ လုပ်ဆောင်လျက်ရှိပြီး ဆရာဝန်၊ သူနာပြုများ လိုအပ်ချက်အတွက် ကျန်းမာရေးနှင့် အားကစားဝန်ကြီးဌာန ကုသရေးဦးစီးဌာနနှင့် လူမှုဖူလုံရေးအဖွဲ့ ရုံးချုပ်တို့ ညိုနှိုင်းကာ ဖြည့်တင်းဆောင်ရွက် လျက်ရှိကြောင်း ပြောပြချက်အရ သိရသည်။
 
မြန်မာတစ်နိုင်ငံလုံးရှိ လူမှုဖူလုံရေးရုံးများ အကျုံးဝင်အာမခံ မှတ်ပုံတင်ထားသည့် အာမခံလုပ်သား ၁၁ သိန်းကျော်ရှိပြီး ၎င်းတို့ထဲမှ သုံးပုံနှစ်ပုံဖြစ်သည့် လုပ်သား ၇ သိန်း ၄ သောင်းခန့်သည် ရန်ကုန်မြို့တွင်ရှိသည်။
 
စိုင်းဟန်
The Ladies News
 

 

Vote: 
No votes yet

Add new comment