ကရိန်းဝန်ဆောင်မှု လုပ်ငန်းမှ ရရှိသည့် အကျိုးအမြတ်ကို ယာဉ်စည်း ကမ်း လမ်းစည်းကမ်း ထိန်းသိမ်းရေး လုပ်ငန်းများတွင် အသုံးပြု

ရန်ကုန်မြို့တော် စည်ပင်နယ်နိမိတ်အတွင်း ယာဉ်ရပ်နားခြင်း မပြုရန် သတ်မှတ်ထားသော နေရာများတွင် ရပ်နားသည့် ယာဉ်များကို ရှင်းလင်းဆွဲယူပြီး ဒဏ်ငွေဆောင်စေသည့် ကရိန်းဝန်ဆောင်မှု လုပ်ငန်းမှ ရရှိသည့် အကျိုး အမြတ်ကို ယာဉ်စည်းကမ်း လမ်းစည်းကမ်း ထိန်းသိမ်းရေးလုပ်ငန်းများ ဆောင်ရွက်ရာတွင် အသုံးပြုလျှက်ရှိ ကြောင်း ရန်ကုန်တိုင်းဒေသကြီး လျှပ်စစ်၊ စက်မှုလက်မှုနှင့် လမ်းပန်းဆက် သွယ်ရေး ဝန်ကြီးဒေါ်နီလာကျော်က ဒီဇင်ဘာ ၁၅ ရက်တွင် ပြောသည်။
 
“ရန်ကုန်တိုင်းဒေသကြီး၊ ဒုတိယအကြိမ်၊ ပဉ္စမပုံမှန် အစည်းအဝေးတွင် မရမ်းကုန်းမြို့နယ်၊ မဲဆန္ဒနယ် အမှတ်(၁) လွှတ်တော် ကိုယ်စားလှယ် ဦးရန်ရှင်း၏ “ရန်ကုန်မြို့တော် စည်ပင်သာယာရေး နယ်နိမိတ်အ တွင်း ယာဉ်ရပ်နားခြင်း မပြုရန် သတ်မှတ်ထားသော နေရာ များတွင် ရပ်နားမိသည့် ယာဉ်များအား ရှင်းလင်းဆွဲယူ ဒဏ်တပ်ရာတွင် အသုံးပြုသည့် ကရိန်းကားများကို မည်သည့် စီးပွားရေး အဖွဲ့အစည်းအား မည်သို့ရွေးချယ် လုပ်ကိုင်ခွင့် ပေးခဲ့ပါသနည်း။ မည်သို့သော သဘောတူညီချက်၊ စည်းကမ်းချက်များဖြင့် သက်တမ်း မည်မျှလုပ်ကိုင် ခွင့် ပြုထားပါသနည်း။ အဆိုပါ လုပ်ငန်းအား လုပ်ကိုင်ခွင့်ရသည့် အတွက် စီးပွားရေး အဖွဲ့အစည်းအနေဖြင့် လုပ်ငန်း လုပ်ကိုင် ဆောင်ရွက်ခွင့်ရသည့် အတွက် နိုင်ငံတော်သို့ အကျိုးအမြတ် ခွဲဝေပေးသွင်းမှု ရှိပါသလား၊ ရှိသည်ဆိုပါက တစ်စီးလျှင် ကျပ်ငွေမည်မျှနှုန်းဖြင့် ပေးသွင်းနေပါသနည်း” သိလိုကြောင်း မေးခွန်းမေးမြန်းမှုကို ပြန်လည်ဖြေကြားရာတွင် ယင်းသို့ထည့်သွင်း ပြောဆိုခဲ့ခြင်းဖြစ်သည်။
 
“ကရိန်းဝန်ဆောင်မှုလုပ်ငန်းအတွက် ရယူတဲ့ ငွေကျပ်ငါးသောင်းထဲမှာ ငွေကျပ်နှစ်သောင်းကို ရန်ကုန် တိုင်းဒေသကြီး အစိုးရအဖွဲ့ကို ပေးသွင်းရပါတယ်။ ကျန်ရှိတဲ့ သုံးသောင်းထဲမှ တစ်ဆယ်ရာခိုင်နှုန်းကို ယာဉ်စည်းကမ်း ထိန်းသိမ်းရေး ကော်မတီသို့ ပေးသွင်းရပြီး ကျန်တာကိုတော့ ကုမ္ပဏီကရရှိပါတယ်” ဟု ဝန်ကြီးကပြောသည်။
 
ရန်ကုန်မြို့တော် စည်ပင်သာယာရေး နယ်နမိတ်အတွင်း ယာဉ်ရပ်နားခြင်းမပြုရန် သတ်မှတ်ထားသော နေရာများမှာ ရပ်နားမိသည့် ယာဉ်များကို ရှင်းလင်း စွဲရာတွင် အသုံးပြုသည့် ကရိန်းကား ဝန်ဆောက်မှုလုပ်ငန်းကို ဦးကျော်ရင် ကရိန်းဝန်ဆောင်မှု လုပ်ငန်းအမှတ်(၄) ရန်ပြေ (၈)လမ်း၊ (၃)ရပ်ကွက်၊ သာကေတမြို့နယ်က လုပ်ငန်း လိုင်စင် ဆောင်ထားပြီး ကရိန်းယာဉ်များနဲ့ လုပ်ကိုင် ဆောင်ရွက်ခွင့်ပြုထားသည်။
 
ကရိန်းဝန်ဆောင်မှု လုပ်ငန်းမှရရှိသော အကျိုးအမြတ်အား ယာဉ်စည်းကမ်း ထိန်းသိမ်းရေး ကြီးကြပ်မှုကော်မတီနှင့် ဦးကျော်ရင် ကရိန်းဝန်ဆောင်မှု လုပ်ငန်းတို့ ချုပ်ဆိုသော စာချုပ်အရ ကျပ် ၂၅၀၀၀ ကို စည်ပင်တရားရုံးသို့ ပေးသွင်းရပြီး ကရိန်းဝန်ဆောင်မှုအတွက် ကျပ် ၅၀၀၀၀ ပေးသွင်းရကြောင်း ယင်းကျပ် ၅၀၀၀၀ မှ ကျပ်(၂၀၀၀၀)ကို ရန်ကုန်တိုင်းအစိုးရသို့ ပေးသွင်းရကြောင်း ကျန်ကျပ် ၃၀၀၀၀ မှ ၁၀ ရာခိုင်နှုန်းအဖြင့် ကျပ် ၃၀၀၀ ကို ယာဉ်စည်းကမ်း ထိန်းသိမ်းရေး ကြီးကြပ်မှု ကော်မတီသို့ ပေးသွင်းရပြီး ကျန် ၂၇၀၀၀ ကို ကရိန်းကုမ္ပဏီက ရရှိကြောင်း ယင်း ငွေကြေးများကို ရန်ကုန်တိုင်းဒေသကြီး အစိုးရအဖွဲ့၏ ခွင့်ပြချက်ဖြင့် ယာဉ်စည်းကမ်း လမ်းစည်းကမ်းထိန်းသိမ်းရေး လုပ်ငန်းများ ဆောင်ရွက်ရာတွင် အသုံးပြုလျက်ရှိကြောင်း ဝန်ကြီးဒေါ်နီလာကျော်က ပြောကြားခဲ့သည်။
 
The Ladies News 

 

Vote: 
No votes yet

Add new comment