ရန်ကုန်တွင် လယ်စိုက်ပျိုးနေသည့် ဧက ၁၂ သိန်းခန့်ကို အခြားသီးနှံ ပြောင်းလဲစိုက်ပျိုးရန် ညှိနှိုင်းနေ

ရန်ကုန်တွင် လယ်စိုက်ပျိုးနေသည့် ဧက ၁၂ သိန်းခန့်ကို အခြားသီးနှံ ပြောင်းလဲစိုက်ပျိုးရန်အတွက် စိုက်ပျိုးရေး ၀န်ကြီးဌာနနှင့် ညှိနှိုင်းနေကြောင်း ရန်ကုန်တိုင်းဝန်ကြီးချုပ် ဦးဖြိုးမင်းသိန်းက စက်တင်ဘာ ၂၃ ရက်တွင် ပြောကြားခဲ့သည်။

ဒုတိယသမ္မတ ဦးမြင့်ဆွေ ဦးဆောင်သည့် အစိုးရအဖွဲ့နှင့် လုပ်ငန်းရှင်များတွေ့ဆုံပွဲတွင် ၀န်ကြီးချုပ် က ယင်းသို့ ပြောဆိုခဲ့ခြင်းဖြစ်ပြီး လယ်ယာကဏ္ဍကို SME တွင် ထည့်သွင်းနိုင်ရန် စဉ်းစားသွားမည် ဖြစ်ကြောင်းလည်း ပြောဆိုခဲ့သည်။

“ဧက ၁၂ သိန်းလောက်ကို အခြားသီးနှံ ပြောင်းလဲစိုက်ပျိုးမှု အခြေအနေဟာ သိပ်ပြီးတော့ အပြောင်းအလဲ ကြီးကြီးမားမား မဖြစ်နိုင်ဘူးလို့ ကျွန်တော်တို့ ယူဆပါတယ်။ အပြောင်းအလဲ တစ်ရပ်ဆိုတာ ဘာလဲ၊ စပါးစိုက်ကို စိုက်ရမယ့် အခြေအနေကြောင့် ဒီ ၁၂ သိန်းလောက် ပြောင်းလဲ စိုက်ခြင်းဟာ သိပ်လှုပ်ခတ်မသွားနိုင်ဘူးလို့ ကျွန်တော်တို့ အနေနဲ့ ယူဆပါတယ်။ ဒါကြောင့်မို့ ဒီ ၁၂ သိန်းကို အခြားသင့်တော်ပြီး အောင်မြင်နိုင်မယ့် သီးနှံတွေ ပြောင်းလဲစိုက်ပျိုးနိုင်ဖို့ အတွက် ဒါကို တင်ပြထားပါတယ်” ဟု ၀န်ကြီးချုပ် ဦးဖြိုးမင်းသိန်းက ပြောသည်။

ထိုသို့ ဆောင်ရွက်မည်ဆိုသော်လည်း ပြည်ထောင်စု ဥပဒေနှစ်ခုတွင် အခက်အခဲဖြစ်နေသည့် အခြေအနေရှိကြောင်း တောင်သူလယ်သမား အကျိုးစီးပွား ကာကွယ်ရေး ဥပဒေတွင် လယ်စိုက်ရမည်ဟု ရေးသားထားခြင်း မဟုတ်သော်လည်း လယ်ယာမြေ ဥပဒေတွင် လယ်ပဲစိုက်ရမည်ဟု ရေးသားထားသည့် အခြေအနေ ဖြစ်နေသည်။
ယင်းအခြေအနေနှင့် ပတ်သက်၍ ဥပဒေဆိုင်ရာ အခက်အခဲဖြစ်မှုများကို ဖြေလျှော့နိုင်ရန်အတွက် ညှိနှိုင်းဆောင်ရွက် နေကြောင်းလည်း ဦးဖြိုးမင်းသိန်းက ပြောကြားခဲ့သည်။

ဇော်မင်းထွန်း
The Ladies News

Vote: 
No votes yet

Add new comment