အသေးစားထိခိုက်ဒဏ်ရာတွေအတွက် လမ်းညွှန်


ရေးသားသူ Aye Thi Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win.
 
အိမ်ရှင်မတွေဖြစ်ဖြစ် တစ်နေ့တာလုံးမှာ အိပ်ချိန်ကလွဲလို့ တစ်ချိန်လုံးလိုလို ဆော့နေတတ်တဲ့ အိမ်ရဲ့ ဆည်းလည်းလေးတွေဖြစ်ကြတဲ့ သားသားမီးမီးလေးတွေ ဖြစ်ဖြစ် တစ်နေ့တာလုံး အိမ်ထောင်မှု တစ်ခုလုံးအတွက် ရှာဖွေစုဆောင်းနေရတဲ့ အိမ်ထောင်ဦးစီး ဖေဖေတို့မှာပဲဖြစ်ဖြစ် မတော်တဆ ထိခိုက်တာမျိုးတွေကတော့ ရှိနိုင်တာပေါ့နော်။ ဒီလိုထိခိုက်တာမျိုးတွေကို အိမ်မှာပဲ ဂရုစိုက်စောင့်ရှောက်ပေးလို့ရပါတယ်။ အနာကို ဂရုစိုက်တဲ့ နည်းမှန်လေလေ အနာသက်သာတာ မြန်လေလေပါ။ ဒီဆောင်းပါးလေးထဲမှာ အသေးစားထိခိုက်ရှနာတွေကို ဘယ်လိုစောင့်ရှောက်မှုပေးရမလဲလို့ ဖော်ပြထားတာမို့ အနာနဲ့ မကင်းနိုင်တဲ့သူတွေအတွက် အသုံးတည့်ဖို့ မျှော်လင့်ပါတယ်။
 
အသေးစားထိခိုက်ရှနာဒဏ်ရာတွေရခဲ့ရင်
အသေးစား ထိခိုက်ဒဏ်ရာတွေကို နေအိမ်မှာပဲ ပျောက်ကင်းသက်သာအောင် ကုသပေးလို့ရပါတယ်။ ဘယ်လိုကုသပေးရမလဲ ဆိုတာကိုတော့ ဆက်ကြည့်လိုက်ရအောင်နော်။
 
လက်ဆေးပါ
ဒါကအနာတစ်ခုဖြစ်ရင် မဖြစ်မနေလိုက်နာရမယ့် အခြေခံကျတဲ့အချက်ပါ။ အနာကိုမကိုင်တွယ်ခင်လက်ဆေးတာက အနာထဲကို ပိုးဝင်ကူးစက်နိုင်ခြေတွေကို လျော့ကျစေနိုင်တာကြောင့် အနာကြီးကြီးရရ သေးသေးဖြစ်ဖြစ် မဖြစ်မနေ လုပ်ရမှာက အနာကိုမကိုင်ခင် အနာကိုကိုင်တွယ်မယ့် လက်ကို အရင်ဆေးကြောဖို့ပါ။ ရေမလွယ်ရင် ရေမလိုလက်သန့်ဆေးရည်နဲ့ ဆေးကြောပါ။
 
သွေးတိတ်အောင်လုပ်ပါ
ဒဏ်ရာပေါ်မှာ ပတ်တီးစထူထူလေး ဒါမှမဟုတ် အဝတ်စသန့်သန့်လေးတစ်ခုခုနဲ့ မိနစ်အနည်းကြာ ဖိထားပေးပြီး သွေးတိတ်အောင်လုပ်ဆောင်ပေးပါ။
 
အနာကိုသန့်စင်ဆေးကြောပါ
ပြီးရင်တော့ ရေနဲ့ဆပ်ပြာအပျော့စားလေးကို အသုံးပြုပြီး အနာကိုသန့်စင်ဆေးကြောပေးပါ။ ဆားရည်နွေးနွေးလေးကို အသုံးပြုပြီးဆေးကြောပေးလို့လည်းရပါတယ်။ ပြတ်ရှဒဏ်ရာဆိုရင်တော့ ဆပ်ပြာသုံးပြီး မဆေးပါနဲ့ အရေပြားကျိန်းစပ်တာမျိုး ဖြစ်နိုင်တာကြောင့်ပါ။ နောက်တစ်ချက်သတိထားရမှာက ပြတ်ရှဒဏ်ရာ တွေကို hydrogen peroxide သုံးပြီး ဆေးကြောတာမျိုးမလုပ်ဖို့ပါ။
 
အနာကို သန့်စင်ဆေးကြောချိန်မှာ တလက်စတည်းလုပ်ရမှာတစ်ခုက အနာထဲကဖုန်မှုန့်တွေ၊ အညစ်အကြေးတွေနဲ့ ပြင်ပ အရာဝတ္ထုတွေကို ဂရုတစိုက်ဖယ်ရှားဖို့ပါ။ လက်နဲ့ဖယ်ရှားဖို့ မလွယ်ဘူးဆိုရင် ဇာဂနာကို အရက်ပြန်စွတ်ပြီး ဖြည်းဖြည်းချင်း ဖယ်ရှားပေးပါ။
 
antibiotic တစ်ခုခုလူးပေးပါ
အနာကို သန့်စင်ဆေးကြောပြီးပြီ ဆိုရင်တော့ အနာကိုရေခြောက်အောင် သုတ်ပြီး အနာတဝိုက်ကို antibiotic ခရင်မ် တစ်ခုခုလူးပေးပါ။ ဒီလိုလူးပေးတာက အနာထဲကို ဘက်တီးရီးယားတွေ မဝင်ရောက်နိုင်အောင် ကာကွယ်ရာ ရောက်ပါတယ်။ အနာကျက်တာကိုလည်း မြန်စေမှာပါ။
 
ပတ်တီးစည်းပါ၊ ပလာစတာကပ်ပါ
ဒါကလည်းအနာကျက်စေဖို့အတွက် ထိရောက်တဲ့ နည်းလမ်းတစ်ခုပါ။ အနာကို သန့်စင်ဆေးကြော တာတွေ ဆေးထည့်တာတွေလုပ်ပြီးတဲ့အခါ အနာကသေးရင် ပလာစတာကပ်ပေးပြီး အနာကြီးရင်ပတ်တီးစည်းပေးပါ။ အနာကို ကာကွယ်ထားတာက ပိုးမွှားတွေ မဝင်အောင် ကာကွယ်ပေးနိုင်သလို အမာရွတ်မဖြစ်အောင်လည်း ကာကွယ်ပေးပါတယ်။ တစ်နေ့တစ်ခါ အနာကို ကပ်ထားတဲ့ ပလာစတာနဲ့ပတ်တီးကိုလဲလှယ်ပေးဖို့လိုပါမယ်။ အနာက ကုတ်မိခြစ်မိတာလောက်ပဲဆိုရင်တော့ ပလာစတာတွေ ပတ်တီးတွေမအုပ်ထားတာက ပိုအဆင်ပြေပါတယ်။ ပတ်တီးတွေ၊ ပလာစတာတွေညစ်ပတ်သွားတဲ့အခါတိုင်းလဲလှယ်ပေးသင့်ပါတယ်။
 
မေးခိုင်ကာကွယ်ဆေးထိုးပေးပါ
ထိခိုက်မိတဲ့အနာက သေးငယ်တယ်ဆိုပေမယ့် သံချေးတက်နေတဲ့သံနဲ့စူးမိတာ၊ သံပြားနဲ့ရှမိတာမျိုးဖြစ်မယ်။ မသန့်ရှင်းတဲ့အရာတစ်ခုခု နဲ့ထိမိတာမျိုးဖြစ်မယ်ဆိုရင် မေးခိုင်ကာကွယ်ဆေးထိုးဖို့လိုပါမယ်။
 
အနာကိုပုံမှန်စစ်ဆေးပါ
အနာကိုနေ့စဉ်ဆေးလူးပေးရင်း အနာကပိုးဝင်ထားတဲ့ လက္ခဏာမျိုးဖြစ်နေလား၊ ပြည်တည်တာမျိုး၊ အနာတဝိုက်နွေးနေတာမျိုး၊ ရောင်နေတာမျိုး ရောင်ရမ်းနေတာမျိုး ရှိလားစစ်ဆေးဖို့လိုအပ်သလို အနာက ပုံမှန်ထက်ပိုနာနေလား ဆိုတာကိုလည်း စစ်ဆေးဖို့လိုအပ်ပါမယ်။ နေ့စဉ်လှုပ်ရှားမှုလေးတွေ လုပ်ရင်း မတော်တဆထိခိုက်မိတာမျိုး ရှိခဲ့ရင် အခုပြောခဲ့တဲ့ နည်းလေးတွေအတိုင်း လိုက်လုပ်ကြည့်ပြီး အနာသက်သာအောင် လုပ်ဆောင်နိုင်မယ်လို့ မျှော်လင့်ပါတယ်။
 
The Ladies News
ယခုဆောင်းပါးကို The Ladies News Agency ၏ မိတ်ဖက်
hellosayarwon.com ကျန်းမာရေးနှင့် ဆေးပညာဝက်ဘ်ဆိုဒ်မှ ကူးယူဖော်ပြခြင်း ဖြစ်သည်။

 

Vote: 
No votes yet

Add new comment