အခြေခံပညာဖွဲ့စည်းပုံ အသစ် KG+12(KG+5+4+3) အရ မသင်မနေရ ဘာသာရပ်များ၊ ရွေးချယ်သင်ယူရမည့် ဘာသာရပ်များ ရှိလာမည်

အခြေခံပညာ ဖွဲ့စည်းပုံသစ် KG+12(KG+5+4+3) အရ အခြေခံပညာ အထက်တန်းအဆင့်တွင် အတန်း(၃) တန်း ဖြစ်လာမည်ဖြစ်သဖြင့် သင်ရိုးညွှန်းတမ်း အညွှန်းဘောင်သစ်နှင့်အညီ မသင်မနေရ ဘာသာရပ်များနှင့် ရွေးချယ်သင်ယူရမည့် ဘာသာရပ်များ ရှိလာမည်ဖြစ်ပြီး ယင်းပေါ်မူတည်ပြီး လက်ရှိ ဘာသာတွဲစနစ်ကို လိုအပ်သလို ပြုပြင်ပြောင်းလဲ ဆောင်ရွက်သွားမည် ဖြစ်ကြောင်း ပညာရေးဝန်ကြီးဌာန ဒု-ဝန်ကြီး ဦးဝင်းမော်ထွန်းက သြဂုတ် ၁၄ ရက်တွင် ပြောကြားလိုက်သည်။
 
ပြည်သူ့လွှတ်တော် အစည်းအဝေးတွင် မိုးမောက် မဲဆန္ဒနယ်မှ ဦးဝင်းအောင် က (၄)တန်းနှင့် (၈)တန်းများကို သက်ဆိုင်ရာ ကျောင်းများတွင်သာ အတန်းတင် စာမေးပွဲစစ်ရန်၊ တက္ကသိုလ်ဝင်တန်း စာမေးပွဲမေးခွန်းများကို အခြေခံပညာတွင် တာဝန် ထမ်းဆောင်နေကြ သော ဆရာကြီး၊ ဆရာမကြီး များကို တာဝန်ပေးရန်၊ တက္ကသိုလ်ဝင်တန်း စာမေးပွဲမေးခွန်း ဘာသာတွဲ (၈)တွဲမှ မလိုအပ်သော ဘာသာတွဲများကို ဖြုတ်သိမ်းရန် အစီအစဉ် ရှိ၊ မရှိမေးမြန်းမှုအား ပြန်လည်ဖြေကြားရာတွင် ဒုဝန်ကြီးက ထည့်သွင်းပြောဆိုခဲ့ခြင်း ဖြစ်သည်။
 
ပညာရေးဝန်ကြီးဌာန အနေဖြင့် အခြေခံပညာဖွဲ့စည်းပုံသစ် (KG+12) စနစ်ကို ပြုပြင်ပြောင်းလဲ အကောင်အထည် ဖော်လျက်ရှိရာ သင်ရိုးသစ်များ၊ သင်ကြား နည်းသစ်များနှင့် စစ်ဆေး အကဲဖြတ်သည့် စနစ်သစ်များကို ဆက်လက် ပြုပြင်ပြောင်းလဲ အကောင်အထည်ဖော် သွားရမည် ဖြစ်သည့် အတွက် Grade-5 နှင့် Grade-9 စာမေးပွဲများကို သက်ဆိုင်ရာ ကျောင်းများတွင် စစ်ဆေးသည့် ကျောင်းစစ်အတန်းတင် စာမေးပွဲများအဖြစ် ပြန်လည် စစ်ဆေးရန် လက်ရှိ အခြေအနေတွင် အစီအစဉ် မရှိသေးကြောင်းလည်း ဒုတိယ၀န်ကြီးကပြောသည်။
 
ထို့အတူ တက္ကသိုလ်ဝင်တန်း စာမေးပွဲသည် နိုင်ငံတော်အဆင့် တက္ကသိုလ်ဝင်ခွင့်ကို ရည်ရွယ်ပြီး စစ်ဆေးသည့် စာမေးပွဲဖြစ်သည့်အတွက် ၎င်းစာမေးပွဲများကို မိမိတို့ကိုယ်တိုင် သင်ပြီး ကိုယ်တိုင် မေးခွန်းပြုစု စစ်ဆေးခြင်းထက် ယခုလက်ရှိ ဆောင်ရွက်နေသည့် စနစ်သည် ပိုပိုကောင်းမွန်သည့် အတွက် တက္ကသိုလ်ဝင်တန်း စာမေးပွဲမေးခွန်းများကို အခြေခံပညာအဆင့်တွင် တာဝန်ထမ်းဆောင် နေကြသည့် ဆရာကြီး၊ ဆရာမကြီးများကို တာဝန်ပေးရန် အစီအစဉ်မရှိကြောင်းလည်း ၎င်းက ဆက်လက်ပြောသည်။
 
အခြေခံပညာ အထက်တန်းအဆင့် ကျောင်းသား/သူများ ရွေးချယ်သင် ယူနိုင်ရန် ဘာသာတွဲ(၈)တွဲ သတ်မှတ် ထားသော်လည်း အခြေခံပညာ အထက်တန်းအဆင့်၏ ဒသမတန်း ကျောင်းသား/သူများ အမှန်တကယ် သင်ယူလျက်ရှိသည့် ဘာသာတွဲများအတွက် မေးခွန်းကိုသာ ပြုစုစစ်ဆေးခြင်း ဖြစ်သည့်အတွက် မလိုအပ်သည့် ဘာသာတွဲများဟု သတ်မှတ်၍ မရကြောင်းလည်း ဒုတိယ၀န်ကြီးက ပြောကြားခဲ့သည်။
 
ဇော်မင်းထွန်း
The Ladies News

 

Vote: 
No votes yet

Add new comment