တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် ကချင်နှစ်ခြင်းခရစ်ယာန်အဖွဲ့ချုပ် (KBC)ဥက္ကဋ္ဌက သိက္ခာတော်ရ ဆရာတော် ဒေါက်တာခလန်ဆွန်ဆမ်တို့ တွေ့ဆုံ

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ကချင်နှစ်ခြင်းခရစ်ယာန် အဖွဲ့ချုပ်(KBC) ဥက္ကဋ္ဌ သိက္ခာတော်ရ ဆရာတော် ဒေါက်တာ ခလန်ဆန်ဆွမ်နှင့်အဖွဲ့အား စက်တင်ဘာ ၁၂ ရက်၊ နေ့လယ်ပိုင်းတွင် အလယ်ပိုင်းတိုင်းစစ်ဌာနချုပ်၊ ရန်ကြီးအောင် ရိပ်သာဧည့်ခန်းမဆောင်၌ လက်ခံ တွေ့ဆုံခဲ့ကြောင်း တပ်မတော် ကာကွယ်ရေးဦးစီးချုပ်ရုံးက သတင်းထုတ်ပြန်ထားသည်။
 
အဆိုပါတွေ့ဆုံပွဲသို့ တပ်မတော်ကာကွယ်ရေးဦးစီးချုပ်နှင့်အတူ ကာကွယ်ရေးဦးစီးချုပ် (ရေ) ဗိုလ်ချုပ်ကြီး တင်အောင်စန်း၊ ကာကွယ်ရေးဦးစီးချုပ်(လေ)ဗိုလ်ချုပ်ကြီး မောင်မောင်ကျော်နှင့် ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများတက်ရောက်ကြပြီး ကချင်နှစ်ခြင်းခရစ်ယာန် အဖွဲ့ချုပ်(KBC)ဥက္ကဋ္ဌနှင့်အတူ သိက္ခာတော်ရ ဆရာတော် ဦးဖော်ရော်တူးမိုင်၊ ဆရာဖော်ယမ်ခါးလီ၊ ငြိမ်းချမ်းရေး ဆွေးနွေးရေးအကျိုးတော်ဆောင် အဖွဲ့(PCG)မှ ဦးလမိုင်ဂွမ်ဂျာနှင့် ဦးခပ်ပရာခွန်းအောင် တို့တက်ရောက်ကြသည်။
 
ထိုသို့တွေ့ဆုံရာတွင် တပ်မတော်ကာကွယ်ရေးဦးစီးချုပ်က မိမိတို့နိုင်ငံသည် ပါတီစုံဒီမိုကရေစီ စနစ်ဖြင့် လျှောက်လှမ်းနေသည့် အတွက် ပြည်တွင်းငြိမ်းချမ်းရေးရရှိရန် အလွန်အရေးကြီးကြောင်း၊ တိုင်းရင်းသားပြည်သူများအနေဖြင့် ပါတီစုံဒီမိုကရေစီစနစ်ကို လိုလားလက်ခံရမည်ဖြစ်ကြောင်း၊ ဥပဒေနှင့်ပတ်သက်၍ တိုင်းရင်းသား အားလုံးကို ခွဲခြားထားခြင်းမရှိဘဲ တစ်ပြေးညီ သတ်မှတ်ထားပြီး မိမိဒေသဖွံ့ဖြိုးတိုးတက်ရေးအတွက် မိမိတို့ကိုယ်တိုင်ကြိုးစား အားထုတ်ရမည်ဖြစ်ကြောင်း၊ ဘာသာရေးနှင့် ပတ်သက်၍ ကိုးကွယ် သည့်ဘာသာအားလုံးကို လွတ်လပ်စွာကိုးကွယ်ခွင့် ပေးထားပြီး ဖြစ်သည့်အတွက် ဘာသာရေးအကြောင်းပြကာ မလိုလားအပ်သည့် နိုင်ငံရေးမတည်ငြိမ်မှုများနှင့် ပဋိပက္ခများမဖြစ်စေလိုကြောင်း၊ တိုင်းပြည်တိုးတက်ပြီး တည်ငြိမ်အေးချမ်းရန်အတွက် နိုင်ငံရေး အရ တည်ငြိမ်အေးချမ်းရန်နှင့် လုံခြုံရေးအရ တည်ငြိမ်အေးချမ်းရန် လိုကြောင်းနှင့် မိမိနိုင်ငံ ဖွံ့ဖြိုး တိုးတက်ရေးအတွက် တိုင်းရင်းသား ပြည်သူများအားလုံး စည်းလုံးညီညွတ်စွာဖြင့် ဝိုင်းဝန်းဆောင်ရွက် ကြရန် တာဝန်ကိုယ်စီရှိကြောင်း ပြောကြားသည်။
 
ကချင်နှစ်ခြင်းခရစ်ယာန်အဖွဲ့ချုပ်(KBC) ဥက္ကဋ္ဌက တပ်မတော် အကြီးအကဲများနှင့် တပ်မတော်သား များ၏ဂုဏ်သိက္ခာကို ညှိုးနွမ်းစေရန်ပြောဆိုခဲ့မှုနှင့် ပတ်သက်၍ တရားစွဲဆိုထားမှုအား တပ်မတော်မှ သဘောထားကြီးစွာဖြင့် အမှုပိတ်သိမ်းကျေအေးပေးသည့် အတွက် မိမိနှင့်အတူ ကချင်ပြည်နယ် လူထုနှင့် အသင်းအဖွဲ့များမှ လည်း ကျေးဇူးတင်ရှိပါကြောင်း၊ မိမိအနေဖြင့် မည်သူတစ်ဦး တစ်ယောက် ကိုမျှ ထိခိုက်စေရန် မရည်ရွယ်ဘဲ ရိုးသားစွာဖြင့် ရုတ်တရတ်ပြောဆိုခဲ့ခြင်းသာဖြစ်ပြီး ထိခိုက်သွားစေမှု အတွက် စိတ်မကောင်းဖြစ်ဝမ်းနည်းရပါကြောင်း ပြန်လည်ပြောကြားခဲ့ပြီး ကချင်ပြည်နယ် ငြိမ်းချမ်းမှု ရရှိရေးကိစ္စရပ်များ၊ (IDP)များ နေရပ်ပြန်နိုင်ရေးဆိုင်ရာကိစ္စရပ်များ၊ ပြည်တွင်း ငြိမ်းချမ်းရေး ဆိုင်ရာ ကိစ္စရပ်များနှင့် တိုင်းရင်းသားပြည်သူ အားလုံးအတူတကွ စည်းလုံးညီညွတ်စွာဖြင့် ဆက်လက် ဆောင်ရွက်သွားရန်လိုအပ်သည့် အခြေအနေများအား ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြသည်။
 
တွေ့ဆုံပွဲအပြီးတွင် တပ်မတော်ကာကွယ်ရေးဦးစီးချုပ်က ကချင်နှစ်ခြင်းခရစ်ယာန် အဖွဲ့ချုပ်(KBC) ဥက္ကဋ္ဌနှင့်အဖွဲ့ဝင်များအား အမှတ်တရလက်ဆောင်ပစ္စည်းများ ပေးအပ်ခဲ့ပြီး တက်ရောက် လာကြသူများနှင့်အတူ စုပေါင်းဓာတ်ပုံရိုက်ခဲ့ကြကြောင်းလည်း ထုတ်ပြန်ချက်အရ သိရသည်။
 
The Ladies News

 

Vote: 
No votes yet

Add new comment