တိုင်းရင်းသားများဘဝ တိုးတက်မြင့်မားလာစေရန် စီမံချက်ရေးဆွဲဆောင်ရွက်ရန် အဆို လွှတ်တော်တွင်ဆွေးနွေးမည်

ဝေးလံခက်ခဲပြီး ဖွံ့ဖြိုးတိုးတက်မှုနောက်ကျနေသော ကျေးလက်ဒေသများတွင် နေထိုင်သည့် တိုင်းရင်းသားများဘဝ တိုးတက်မြင့်မား လာစေရန်အတွက် စီမံချက်ရေးဆွဲ ချမှတ် အကောင်အထည်ဖော် ဆောင်ရွက်ပေးပါရန် ပြည်ထောင်စုအစိုးရအား တိုက်တွန်းကြောင်း အဆိုကို ပြည်သူ့လွှတ်တော်တွင် ဆွေးနွေးမည်ဖြစ်ကြောင်းနိုဝင်ဘာ ၁၆ ရက်တွင် လွှတ်တော်ဥက္ကဌက ကြေညာခဲ့သည်။
 
ယင်းအဆိုကို ခေါင်လန်ဖူးမဲဆန္ဒနယ်မှ ဦးအာမိုးဆီက တင်သွင်းခဲ့ခြင်းဖြစ်ပြီး နန်းယွမ်းမြို့နယ် ပြည်သူ့လွှတ်တော် ကိုယ်စားလှယ် ဦးဝမ်လှက ထောက်ခံဆွေးနွေးခဲ့ကာ အဆိုကို လက်ခံဆွေးနွေးရန် သင့်မသင့် လွှတ်တော်၏ ဆန္ဒရယူခဲ့ပြီး၊ သဘောမတူသူ မရှိသည့်အတွက် လက်ခံဆွေးနွေးသွားမည် ဖြစ်ကြောင်း ပြည်သူ့လွှတ်တော်ဥက္ကဋ္ဌက ကြေညာခဲ့ခြင်းဖြစ်သည်။
 
အိမ်နီးချင်းနိုင်ငံများကို ကြည့်မည်ဆိုပါက ဝေးလံခက်ခဲပြီး ဖွံ့ဖြိုးတိုးတက်မှု နောက်ကျသည့် ဒေသများတွင် ဖွံ့ဖြိုးတိုးတက်မှု မြင့်မားလာစေရန် လမ်းပန်းဆက်သွယ်ရေး၊ ပညာရေး၊ ကျန်းမာရေး၊ လျှပ်စစ်မီး ရရှိရေး၊ ကုန်ထုတ်လုပ်မှုများ မှန်ကန် မြန်ဆန်စွာ စီးဆင်းနိုင်ရေးအတွက် အလေးထား ဆောင်ရွက်ပေးနေသည်ကို တွေ့ရကြောင်းလည်း ဦးအာမိုးဆီက အဆိုတင်သွင်းရာတွင် ထည့်သွင်း ပြောဆိုခဲ့သည်။
 
အဆိုတင်ရခြင်း၏ ရည်ရွယ်ချက်မှာ (၁)တိုင်းရင်းသားအချင်းချင်း ချစ်ကြည်ရင်းနှီးမှု ပိုမိုခိုင်မာလာစေရန်၊ (၂)မြို့ပြနှင့်ကျေးလက် ဖွံ့ဖြိုးတိုးတက်မှု ကွာဟချက် ကျဉ်မြောင်းလာစေရန်၊ (၃) ကျေးလက်ဒေသနေ တိုင်းရင်းသားများ လူမှုစီးပွားဘဝ တိုးတက်မှုမြင့်မားလာစေရန်၊ (၄)နိုင်ငံတော် တည်ငြိမ်အေးချမ်း သာယာရေးအတွက် ကျေးလက်နေပြည်သူများ စိတ်ပါဝင်စားမှု ပိုမိုမြင့်မားစေပြီး တက်ကြွစွာ ပူးပေါင်းပါဝင် ဆောင်ရွက်လာစေရန် ဖြစ်ကြောင်းလည်း ဦးအာမိုးဆီက ပြောကြားခဲ့သည်။
 
The Ladies News
 
 

 

Vote: 
No votes yet

Add new comment