မျက်မမြင် ကာကွယ်စောင့်ရှောက်မှု လုပ်ငန်းများကို အရှိန်အဟုန်မြှင့် ဆောင်ရွက်နိုင်ရန် အမျိုးသားအဆင့်(၅) နှစ် စီမံကိန်းရေးဆွဲပြီး ဆောင်ရွက်လျက်ရှိ

မျက်မမြင်ကာကွယ်စောင့်ရှောက်မှု လုပ်ငန်းများကို အရှိန်အဟုန်မြှင့် ဆောင်ရွက် နိုင်ရန် (၂၀၁၇ မှ ၂၀၂၁) အထိ အမျိုးသားအဆင့် (၅) နှစ်စီမံကိန်း ရေးဆွဲပြီး အကောင်အထည်ဖော် ဆောင်ရွက် လျက်ရှိကြောင်း ရန်ကုန်တိုင်းဒေသကြီး အစိုးရအဖွဲ့၊ လူမှုရေးဝန်ကြီး ဦးနိုင်ငံလင်းက အောက်တိုဘာ ၁၁ ရက်တွင် ပြောသည်။
 
ရန်ကုန် အမျိုးသားမျက်စိဘဏ်၊ မျက်စိအထူးကုဆေးရုံကြီး၌ ကျင်းပ သည့် ၂၀၁၈ ခုနှစ် ရန်ကုန်တိုင်းဒေသကြီး၊ ကမ္ဘာ့မျက်မမြင် ပပျောက်ရေးနေ့ အထိမ်းအမှတ် အခမ်းအနား၌ ရန်ကုန် တိုင်းဒေသကြီး အစိုးရအဖွဲ့၊ လူမှုရေးဝန်ကြီး ဦးနိုင်ငံလင်းက အမှာစကား ပြောကြားရာတွင် ထည့်သွင်းပြောကြားခဲ့ခြင်း ဖြစ်သည်။
 
“နှစ်စဉ် အောက်တိုဘာလရဲ့ ဒုတိယ ကြာသပတေးနေ့ကို ကမ္ဘာ့မျက်မမြင် ပပျောက်ရေးနေ့အဖြစ် သတ်မှတ်ပြီး ကမ္ဘာ့ ကျန်းမာရေးအဖွဲ့ကြီး၏ အဖွဲ့ဝင်နိုင်ငံများ အားလုံးမှာ နှစ်စဉ် ကျင်းပလေ့ရှိပါတယ်။ မြန်မာနိုင်ငံမှာလည်း သက္ကရာဇ်(၂၀၀၀) ခုနှစ်မှာ စတင်ကျင်းပခဲ့တာဖြစ်ပါတယ်။ ယခုနှစ် ကမ္ဘာ့မျက်မမြင် ပပျောက်ရေးနေ့ ဆောင်ပုဒ်မှာ Universal Eye Health : “Eye Care Everywhere” - ဖြစ်ပါတယ်။ မြန်မာနိုင်ငံ တစ်ဝှမ်းလုံးမျာရှိတဲ့ ပြည်သူလူထု တစ်ရပ်လုံးကို မျက်စိကျန်းမာရေး စောင့်ရှောက်မှု ပေးစွမ်းနိုင်ရမည်ဟု ရည်ရွယ်တာ ဖြစ်ပါတယ်။ မျက်မမြင် ကာကွယ်စောင့်ရှောက်မှု လုပ်ငန်းများကို အရှိန်အဟုန်မြှင့် ဆောင်ရွက် နိုင်ရန်အတွက် (၂၀၁၇ မှ ၂၀၂၁) အထိ အမျိုးသား အဆင့် (၅) နှစ်စီမံကိန်းကို ရေးဆွဲဆောင်ရွက်ပြီးအကောင် အထည်ဖော် ဆောင်ရွက် လျက်ရှိပါတယ်” ဟု ၀န်ကြီးက ပြောသည်။
 
မြန်မာနိုင်ငံတွင် ကာကွယ်ကုသနိုင်သည့် မျက်စိရောဂါတွေထဲတွင် အဓိက မျက်စိမမြင်ခြင်းကို ဖြစ်စေ နိုင်သည့်ရောဂါများမှာ အတွင်းတိမ်၊ ရေတိမ်၊ မျက်မှန်လိုအပ်ခြင်း၊ ထိခိုက်ဒဏ်ရာရရှိခြင်း နှင့် ဆီးချိုရောဂါ၊ သွေးတိုးရောဂါကြောင့်ဖြစ်သည့် မျက်စိရောဂါ များဖြစ်ပြီး အတွင်းတိမ်ရောဂါသည် မျက်စိရောဂါအားလုံး၏ (၆၀%) ခန့်ရှိသည်ကို တွေ့ရကြောင်း၊ ထို့ကြောင့် မျက်စိအတွင်း တိမ်ရောဂါ ကို ထိထိရောက်ရောက် ကာကွယ် ကုသပေးနိုင်ပါက မျက်မမြင် လျော့နည်းရေးကို ဦးတည်ဆောင်ရွက် ပေးနိုင်မည်ဖြစ်ကြောင်း ဝန်ကြီးက ပြောသည်။
 
မြန်မာနိုင်ငံတွင် မျက်စိဆရာဝန်ပေါင်း (၃၅၀) ဦးခန့်ရှိခြင်းကြောင့် လူဦးရေ(၁)သိန်းခွဲတွင် မျက်စိဆရာဝန် (၁) ဦး နှုန်းဖြင့် စောင့်ရှောက်မှုပေးနိုင်ပြီဖြစ်ကြောင်း ပဏာမ မျက်စိကျန်းမာရေး စောင့်ရှောက်မှု (Primary Eye Care) ကို ကျယ်ကျယ်ပြန့်ပြန့် လွှမ်းခြုံနိုင်စေရန် ၊ကျောင်းများအတွင်း မျက်စိကျန်းမာရေး စောင့်ရှောက်မှုပေးခြင်း၊ ကျေးလက်နေ ပြည်သူလူထုအထိ ကွင်းဆင်း၍ မျက်စိကျန်းမာရေး စောင့်ရှောက်မှု ပေးခြင်း နှင့် ပဏာမ မျက်စိကျန်းမာရေး စောင့်ရှောက်မှု သင်တန်းများပို့ချ ခြင်း တို့ကို နှစ်စဉ် တိုးမြှင့် လုပ်ဆောင်လျက်ရှိကြောင်း သိရသည်။
 
“ရန်ကုန်မြို့တွင်လည်းကုတင်(၁၅၀)ဆံ့ မျက်စိအထူးကု ဆေးရုံကြီး ကို (၁၉၉၃) ခုနှစ်မှ စ၍ ဖွင့်လှစ်ခဲ့ပြီး ဝန်ထမ်းအင်အား (၂၁၆) ဦး ဖြင့် ကျန်းမာရေး စောင့်ရှောက်မှု လုပ်ငန်းများ ဆောင်ရွက်လျှက် ရှိပါတယ်။ အဖြစ်များတဲ့ ရောဂါတွေကတော့ အတွင်းတိမ်ရောဂါ၊ ရေတိမ်ရောဂါ၊ အမြင်အာရုံလွှာကွာခြင်း၊ မျက်ကြည်လွှာ ဆိုင်ရာ ရောဂါများနဲ့ ထိခိုက်ဒဏ်ရာကြောင့် ဖြစ်တဲ့ရောဂါများဖြစ်ပါတယ်။ ရုံးဖွင့်ရက်များအတွင်းဖွင့်လှစ်တဲ့ ပြင်ပလူနာဌာနမှာလည်း တစ်နေ့ပျှမ်းမျှလူနာ (၄၀၀)ခန့်ကို ကုသပေးလျက်ရှိပါတယ်။ ၎င်းဌာန မှာ မျက်ကြည် လွှာဆိုင်ရာ၊ မြင်လွှာနှင့် မျက်စိနောက်ခန်းဆိုင်ရာ၊ မျက်ခွံမျက်ရည်လမ်းကြောင်းနှင့် မျက်လုံးအိမ်ပိုင်းဆိုင်ရာ၊ မျက်စိအာရုံကြောဆိုင်ရာ၊ ရေတိမ်ရောဂါဆိုင်ရာ၊ ကလေးမျက်စိ ရောဂါဆိုင်ရာ နှင့် မျက်စိအတွင်းရောင်ရောဂါ ဆိုင်ရာအစရှိတဲ့ အထူးစမ်းသပ်ခန်းများ ဖွင့်လှစ်ပြီး ကုသပေးလျက်ရှိပါတယ်။ မျက်စိဆေးရုံကြီးအနေဖြင့် တစ်ပတ်လျှင် (၅) ရက် တနေ့လျှင်လူနာ (၈၅)ဦးမှ (၁၀၀)ဦးခန့်ကို ခွဲစိတ်ကုသမှုများ ပြုလုပ်ပေးလျှက်ရှိပြီး နေ့စဉ်အ ရေးပေါ် ခွဲစိတ်မှုများလည်း ပြုလုပ်ပေးလျှက်ရှိပါတယ်” ဟု ဝန်ကြီးက ပြောသည်။
 
ထို့အပြင်ကုတင် (၁၅၀)ဆံ့ ရန်ကုန်မြို့မျက်စိရောဂါ အထူးကု ဆေးရုံကြီးက မျက်စိရောဂါအထူးကုအဖွဲ့ သည် ပင်မလုပ်ငန်း များအပြင် ကျန်းမာရေးနှင့်အားကစားဝန်ကြီးဌာန၏ ခွင့်ပြုချက်ဖြင့် အခြားသော ဝန်ကြီးဌာန အဖွဲ့အစည်းများ၊ အလှူရှင်များ ပူးပေါင်း ဆောင်ရွက်မှုဖြင့် နယ်လှည့်ကုသမှုများလည်း ဆောင်ရွက်လျှက်ရှိ ကြောင်း(၂၀၁၇)ခုနှစ်အတွင်း အထူးကုဆရာဝန်ကြီးများနှင့် အဖွဲ့များသည် ဓနုဖြူမြို့နယ်၊ လပွတ္တာမြို့နယ်၊ကြို့ ပင်ကောက်မြို့၊ မိုးညိုမြို့နှင့် စစ်တွေမြို့များသို့ ကွင်းဆင်း၍ အခမဲ့စမ်းသပ်ခွဲစိတ် ကုသပေးခဲ့ကြသလို ရန်ကုန်တိုင်း အတွင်းရှိမြို့နယ်များသို့လည်း (၁၅) ကြိမ် ကွင်းဆင်းစမ်းသပ် ကုသပေးနိုင်ခဲ့ကြောင်း နိုင်ငံတကာ နှင့် ပူးပေါင်း ဆောင်ရွက်မှုတွင် ဂျပန်၊ စင်္ကာပူ၊ သြစတေးလျ၊ USA၊ နယ်သာလန်နိုင်ငံတို့မှ လာရောက်သည့် အဖွဲ့အစည်းများ နဲ့ ပူးပေါင်းပြီး လူနာများအား ခွဲစိတ်ကုသ ပေးနိုင်ခဲ့ကြောင်း သိရသည်။
 
The Ladies News

 

Vote: 
No votes yet

Add new comment