ဆက်သွယ်ရေးကေဘယ်(လ်)ကြိုးများ စည်းမဲ့ကမ်းမဲ့ကြိုးသွယ်တန်း ထားသည့် ကုမ္ပဏီများ၏ အမည်ကိုကြေငြာပြီး အရေးယူ ဆောင်ရွက်သွားမည်

ဆက်သွယ်ရေးကေဘယ်(လ်)ကြိုးများ စည်းမဲ့ကမ်းမဲ့ကြိုးသွယ် တန်းထားသည့် ကုမ္ပဏီများ၏ အမည်ကိုကြေငြာပြီး အရေးယူ ဆောင်ရွက်သွားမည်ဖြစ်ကြောင်း လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က အောက်တိုဘာ ၄ ရက်တွင်ပြောကြားသည်။
 
ဒုတိယအကြိမ် ရန်ကုန်တိုင်းဒေသကြီးလွှတ်တော် သတ္တမပုံမှန် အစည်းအဝေး (၁၆) ရက်မြောက်နေ့တွင် မရမ်းကုန်းမြို့နယ် မဲဆန္ဒနယ် အမှတ်(၁) တိုင်းဒေသကြီးလွှတ်တော်ကိုယ်စားလှယ် ဦးရန်ရှင်းက “ဆက်သွယ်ရေးကေဘယ်(လ်)ကြိုးများ ကားလမ်းများမှ ဖြတ်သန်းသွယ်ရာတွင် မြေပြင်မှအမြင့်မည်မျှရှိရမည်ဟု သတ်မှတ် ထားပါသလဲ၊ မော်တော်ယာဉ်များ နှင့်မလွတ်ကင်းသောအမြင့်တွင် သွယ်တန်းထားသော ကေဘယ်(လ်)များအား မော်တော်ယာဉ်များ ထိခိုက်မိပြီး ဆက်စပ်ဆုံးရှုံးမှုတစ်စုံတစ်ရာပေါ်ပေါက်ပါက အဆိုပါ ကေဘယ်(လ်)နှင့်သက်ဆိုင်သည့် ကုမ္ပဏီများအား ပေးလျော် သွားစေရန် စီစဉ်ဆောင်ရွက်သွားစေရန် အစီအစဉ်ရှိ/မရှိ” မေးမြန်းမှုအား ပြန်လည်ဖြေကြားရာတွင် ထည့်သွင်းပြောဆို ခဲ့ခြင်းဖြစ်သည်။
 
မြန်မာ့ဆက်သွယ်ရေးလုပ်ငန်းသည် ကောင်းကင်ကေဘယ်များ သွယ်တန်းရာတွင် ကြံ့ခိုင်မှုရှိသော ကွန်ကရစ်တိုင်များကို အသုံးပြုခဲ့ကြောင်း၊ ကောင်းကင်ကေဘယ်များအား လမ်းကူး သွယ်တန်းရာတွင် ကြံ့ခိုင်မှုကောင်းမွန်သည့် ၈ မီတာကွန်ကရစ် တိုင်နှင့် သံတိုင်များကိုအသုံးပြုခဲ့သည်။
 
ယခုအခါအချို့မြို့နယ်များတွင် ၈ မီတာကွန်ကရစ်တိုင်အစား ၉ မီတာကွန်ကရစ်တိုင်များကို အသုံးပြုလျက်ရှိပါကြောင်း၊ ထိုသို့ လမ်းကူးရာနေရာများတွင် ၈ မီတာကွန်ကရစ်တိုင် အသုံးပြုသည့် အတွက် လမ်း၏မျက်နှာပြင်မှ ကေဘယ်အမြင့်(၁၈)ပေ ခန့်ရှိကြောင်း၊ ယခုအခါ အချို့မြို့နယ်များတွင် ကွန်ကရစ်လမ်းသားများ မြှင့်တင်၍ လမ်းခင်းခြင်းလုပ်ငန်းများဆောင်ရွက်နေသဖြင့် ကေဘယ် အမြင့်သည် (၁၆ ပေ၊ ၁၅ ပေ) ခန့်သာ ကျန်ရှိတော့ကြောင်း၊ အဆိုပါနေရာများတွင် ၉ မီတာအမြင့်ရှိသော ကွန်ကရစ်တိုင်များ အစားထိုးခြင်းဖြင့် လည်းကောင်း၊ ကောင်းကင်ကေဘယ်မှ မြေအောက်ကေဘယ်သို့ ပြောင်းလဲခြင်းဖြင့်လည်းကောင်း၊ မော်တော်ယာဉ်များ မတော်တဆထိခိုက်မှု အန္တရာယ်မှ ကြိုတင်ကာကွယ်ခြင်းလုပ်ငန်းများကို ဆောင်ရွက်လျက်ရှိသည်။
 
မော်တော်ယာဉ်မောင်းနှင်သူများ၏ ပေါ့ဆမှုကြောင့် လမ်းကူးကွန်ကရစ်တိုင်နှင့် ကေဘယ်များအားတိုက်မိပါက ပျက်စီးဆုံးရှုံးမှုများအား အမြန်ဆုံးပြုပြင်ပေးပြီး ပျက်စီးဆုံးရှုံးမှုများ အား စနစ်တကျတွက်ချက်၍ သက်ဆိုင်ရာဌာနများတွင် လျော်ကြေး ငွေ ပေးသွင်းခြင်းများ ဆောင်ရွက်လျက် ရှိကြောင်း ကြိုး၏အမြင့် လုံလောက်မှုမရှိခဲ့လျှင် ကြိုးထုတ်လုပ်သည့်ကုမ္ပဏီကို အရေးယူ ဆောင်ရွက်လျက်ရှိသည်။
 
ရန်ကုန်တိုင်းဒေသကြီးအစိုးရအဖွဲ့၊ မြို့တော်စည်ပင်သာယာရေး ကော်မတီ၊ မြို့တော်ဝန်နှင့် ဆက်သွယ်ရေးညွှန်ကြားမှု ဦးစီးဌာနမှ ညွှန်ချုပ်များနှင့် အစည်းအဝေး (၃)ကြိမ်ပြုလုပ်ခဲ့ပြီးဖြစ်ပါကြောင်း၊ လာမည့် တနင်္ဂနွေနေ့တွင် Final အစည်းအဝေးဆောင်ရွက်ပြီးလျင် စည်းမဲ့ကမ်းမဲ့ကြိုးသွယ်တန်းထားသည့် ကုမ္ပဏီများ၏ အမည်ကိုကြေငြာပြီး အရေးယူ ဆောင်ရွက်သွားရန်ရှိပါကြောင်း၊ ထိုသို့ဆောင်ရွက်ရန် အချိန်ယူ၍ ထိထိရောက်ရောက် ကိုင်တွယ် ဆောင်ရွက်သွားမည် ဖြစ်ကြောင်း ၀န်ကြီးဒေါ်နီလာကျော်က ဆက်လက်ပြောကြားခဲ့သည်။
 
The Ladies News

 

Vote: 
No votes yet

Add new comment