တရားမဝင်မြေချပါမစ်ထုတ်ပေးခြင်းများ ဆောင်ရွက်ခြင်းတွေ့ရှိပါက အရေးယူသွားမည်

မြို့ပြနှင့်အိမ်ရာဖွံ့ဖြိုးရေး ဦးစီးဌာန ဝန်ထမ်းများအနေဖြင့် တရားမဝင် မြေချပါမစ်ထုတ်ပေးခြင်းများ ဆောင်ရွက်ခြင်း တွေ့ရှိပါက၊ ဝန်ထမ်းစည်းမျဉ်းစည်းကမ်းအရ လုပ်ထုံးလုပ်နည်းနှင့်အညီ စိစစ်အရေးယူ ဆောင်ရွက်သွားမည် ဖြစ်ကြောင်း လျှပ်စစ်၊စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ဖေဖော်ဝါရီ ၉ ရက်တွင် ပြောကြားလိုက်သည်။
 
ရန်ကုန်တိုင်းဒေသကြီးလွှတ်တော် အစည်းအဝေးတွင် ဒဂုံမြို့သစ်(အရှေ့ပိုင်း)မြို့နယ်၊ မဲဆန္ဒနယ်အမှတ်(၂) လွှတ်တော် ကိုယ်စားလှယ် ဦးကျော်ကျော်မောင်၏ ဒဂုံမြို့သစ်(အရှေ့ပိုင်း)မြို့နယ်မှ ရပ်ကွက်အချို့တွင် ၂၀၁၇ ခုနှစ်အတွင်း မြေကွက်များစွာကို မြို့ရွာနှင့်အိုးအိမ် ဌာနမှမြေချပါမစ်များ ထုတ်ပေးထားပြီး ယင်းမြေချပါမစ်များ ထုတ်ပေးထားခြင်းမှာ မှန်ကန်မှု မရှိသဖြင့် ပြန်လည်စိစစ် အရေးယူ ဆောင်ရွက်ရန် အစီအစဉ်ရှိ၊မရှိသိရှိလိုကြောင်း ကြယ်ပွင့်ပြ မေးခွန်းအား ပြန်လည်ဖြေကြားရာတွင် ယင်းသို့ထည့်သွင်းပြောကြားခဲ့ခြင်း ဖြစ်သည်။
 
မြို့ပြနှင့်အိမ်ရာဖွံ့ဖြိုးရေး ဦးစီးဌာန အနေဖြင့် ၂၀၁၂ ခုနှစ်မှစ၍ မြို့သစ်ရှိမြေကွက်များအား ဦးစီးဌာန အစီအစဉ်ဖြင့် မြေချပါမစ် ထုတ်ပေးမှုလုပ်ငန်းကို ဆောင်ရွက်ခြင်း မရှိတော့ကြောင်းနှင့် ဦးစီးဌာန ဝန်ထမ်းများအနေဖြင့် တရားမဝင်မြေချပါမစ် ထုတ်ပေးခြင်းများ ဆောင်ရွက်ခြင်းတွေ့ရှိပါက၊ ဝန်ထမ်းစည်းမျဉ်းစည်းကမ်းအရ လုပ်ထုံးလုပ်နည်းနှင့် အညီ စိစစ်အရေးယူ ဆောင်ရွက်သွားမည် ဖြစ်ကြောင်း လျှပ်စစ်၊စက်မှုလက်မှုနှင့် လမ်းပန်းဆက်သွယ်ရေး ဝန်ကြီးဒေါ်နီလာကျော်က ပြောကြားခဲ့သည်။
 
“မြေချပါမစ်ရရှိသူ အချို့မှ မြို့ပြဖွံ့ဖြိုးမှု အားနည်းနေသည့် နေရာများတွင် ၄င်းတို့ရရှိသည့် မြေကွက်များကို လက်ခံရယူ အဆောက်အဦ ဆောက်လုပ်နေထိုင်ခြင်း မပြုဘဲ လက်လွှဲရောင်းချမှုများအရ မြေယာဈေး ကစားသူများ လက်ဝယ်ရောက်ရှိပြီး အဆင့်ဆင့် ရောင်းဝယ်ခြင်း၊ လက်လွှဲခြင်း ကိစ္စရပ်များ ဆောင်ရွက်လျက်ရှိပါကြောင်း၊ မြေနေရာ လက်ရောက်ရယူမှုမရှိခြင်းနှင့် မြေချပါမစ်ကိုသာ ရယူပြီး အဆင့်ဆင့် လက်လွှဲရောင်းချမှုများ ဆောင်ရွက်ခြင်း တို့ကြောင့် မြေချပါမစ်အတု ပြုလုပ်ရောင်းဝယ်ခြင်းများ ဖြစ်ပေါ်လာခြင်းဖြစ်ပါတယ်။ မြို့ပြနှင့်အိမ်ရာ ဖွံ့ဖြိုးရေးဦးစီးဌာန အနေဖြင့် ၂၀၁၂ ခုနှစ်မှစ၍ မြို့သစ်ရှိမြေကွက်များအား ဦးစီးဌာနအစီအစဉ်ဖြင့် မြေချပါမစ် ထုတ်ပေးမှု လုပ်ငန်းကို ဆောင်ရွက်ခြင်း မရှိတော့ပါကြောင်းနှင့် ဦးစီးဌာန ဝန်ထမ်းများအနေဖြင့် တရားမဝင် မြေချပါမစ် ထုတ်ပေးခြင်းများ ဆောင်ရွက်ခြင်းတွေ့ရှိပါက၊ ဝန်ထမ်းစည်းမျဉ်း စည်းကမ်းအရ လုပ်ထုံးလုပ်နည်းနှင့် အညီ စိစစ်အရေးယူ ဆောင်ရွက်သွားမှာ ဖြစ်ပါတယ်” ဟု ဒေါ်နီလာကျော်က ပြောသည်။
 
မြို့ပြနှင့်အိမ်ရာဖွံ့ဖြိုးရေး ဦးစီးဌာန အနေဖြင့် ၂၀၁၂ ခုနှစ်မှစ၍ ဦးစီးဌာနအစီအစဉ်ဖြင့် မြေချပါမစ်ထုတ်ပေးခြင်း လုပ်ငန်းကို ဆောင်ရွက်ခြင်းမပြုတော့ဘဲ ယင်းလုပ်ငန်းများမှာ (က) ရန်ကုန်တိုင်းဒေသကြီးအဖွဲ့သို့ လွှဲအပ်ထားသည့် အရန်မြေများအား ရန်ကုန်တိုင်းဒေသကြီး အစိုးရအဖွဲ့မှ ချထားပေးပြီး မြေချပါမစ်ထုတ်ပေးရန် ညွှန်ကြားလာပါက မြေချပါမစ် ဆောင်ရွက်ပေးခြင်း၊ (ခ) ၁၉၈၈ ခုနှစ်နောက်ပိုင်း ဝန်ကြီးဌာနများ၊ အုပ်ချုပ်ရေး အဖွဲ့အစည်းများမှ မြို့သစ်များသို့ ပြောင်းရွှေ့ပေးရာတွင် ထုတ်ပေးခဲ့ သည့် မြေချစလစ်များအား မြေချပါမစ် ထုတ်ပေးခြင်း၊ (ဂ) လုပ်သက် (၁၅)နှစ်အထက် ဝန်ထမ်းမြေကွက် ရရှိသူများနှင့် ကာကွယ်ရေးဝန်ကြီးဌာနမှ ထိခိုက်ကျဆုံးဒဏ်ရာရ စစ်သည်များနှင့် ၄င်းတို့၏ အမွေဆက်ဆံသူများအား ချပေးထားသည့် မြေကွက်များကို မြေချပါမစ် ထုတ်ပေးခြင်း တို့ကိုသာ ဆောင်ရွက်ပေးလျက်ရှိပြီး အထက်အပိုဒ်ပါ ကိစ္စရပ်များအတွက် မြေချပါမစ်ပြုလုပ်ပေးပြီးပါက အဆိုပါ မြေချပါမစ်များအား ရန်ကုန်မြို့တော် စည်ပင်သာယာရေးကော်မတီသို့ ဆက်လက် လွှဲပြောင်းပေးလျက်ရှိသည်။
 
“မြေချပါမစ်ဆိုသည်မှာ စည်ပင်မှုမရှိသည့် မြို့သစ်ဒေသများတွင် အိမ်ရာဆောက်လုပ်ဖို့အတွက် စည်းကမ်းချက်တွေ သတ်မှတ်များ ချပေးထားခြင်း ဖြစ်ပါတယ်။ မြေချပါမစ်များကို သတ်မှတ်စည်းကမ်း ချက်များအရ၊ တဆင့်ရောင်းဝယ် ခြင်း၊ လက်လွှဲခြင်းမပြုနိုင်ပါ။ အိမ်ရာအဆောက်အဦ ဆောက်လုပ်ပြီးပါက မြေငှားစာချုပ် လျှောက်ထားရန်ဖြစ်တယ်။ မြေချပါမစ်ရရှိသူများက မြေချပါမစ်ရရှိပြီးပါက မြေလက်ရောက်ယူပြီး အိမ်ရာဆောက်လုပ်ရန် တာဝန်ရှိပါတယ်။ မြို့ပြနှင့်အိမ်ရာ ဖွံ့ဖြိုးရေးဦးစီးဌာန အနေနဲ့ ရန်ကုန်စည်ပင်သာယာရေး နယ်နိမိတ်အတွင်း မြေယာစီမံခန့်ခွဲမှု လုပ်ငန်းများအား ရန်ကုန်မြို့တော် စည်ပင်သာယာရေးကော်မတီသို့ ၁၉၉၂ ခုနှစ်မှ ၂၀၀၄ အထိလွှဲပြောင်းပေးခဲ့ပြီး၊ ၂၀၁၂ခုနှစ်မှ ယနေ့အထိ မြေယာစီမံခန့်ခွဲမှု လုပ်ငန်းများအား လွှဲပြောင်းပေးလျက်ရှိရာ ဆောင်ရွက်ဆဲ အိမ်ရာ စီမံကိန်းအချို့သာ ကျန်ရှိပြီး ၉၅% ခန့် လွှဲပြောင်း ပေးပြီးဖြစ်ပါတယ်။ ကျန်ရှိအိမ်ရာ စီမံကိန်းများကိုလည်း အပြီးသတ်လွှဲပြောင်းရန် ဆောင်ရွက်လျက်ရှိပါတယ်” ဟု ၀န်ကြီးဒေါ်နီလာကျော်က ဆက်လက်ပြောကြားခဲ့သည်။
 
The Ladies News
 

 

Vote: 
No votes yet

Add new comment