အနည်းဆုံးအခကြေးငွေ တစ်ရက် ၅၆၀၀ ကျပ်ထက်မနည်း အမြန်ဆုံး သတ်မှတ်ပေးရေး မြန်မာနိုင်ငံမြို့ကြီးများတွင် လူထုလှုပ်ရှားမှုတစ်ရပ် ပြုလုပ်

အနည်းဆုံး အခကြေးငွေ တစ်ရက်လျှင် ၅၆၀၀ ကျပ်ထက်မနည်း အမြန်ဆုံး သတ်မှတ်ပေးရန် ကိစ္စနှင့်ပတ်သက်ပြီး အလုပ်သမားများ၏ လှုပ်ရှားမှု စာရွက်ဖြန့်ဝေခြင်း လူထုလှုပ်ရှားမှုတစ်ရပ် (ကမ်ပိန်း)ပြုလုပ် ခဲ့ကြသည်။
 
အဆိုပါ စာရွက်ဖြန့်ဝေခြင်း ကမ်ပိန်းအား မြန်မာတစ်နိုင်ငံလုံးရှိ အလုပ်သမား သမဂ္ဂအဖွဲ့အစည်းများ နှင့် အလုပ်သမားအရေး တက်ကြွလှုပ်ရှားသူများ စုပေါင်းဖွဲ့စည်းထားသည့် အနည်းဆုံး အခကြေးငွေနှင့် အလုပ်သမား အခွင့်အရေး ပူးပေါင်းဆောင်ရွက်ရေး ကော်မတီ မှ ဦးဆောင်ပြုလုပ်ခြင်း ဖြစ်ကြောင်း သိရသည်။
 
စာရွက်ဖြန့်ဝေခြင်းနှင့် ပတ်သက်ပြီး မြန်မာနိုင်ငံ စက်မှုလက်မှုနှင့် ၀န်ဆောင်မှု လုပ်ငန်းပေါင်းစုံ အလုပ်သမား သမဂ္ဂများ အဖွဲ့ချူပ်- MICS ဒုဥက္ကဌ ဦးနော်အောင်က “ပထမဦးဆုံးက ကမ်ပိန်းပေါ့။ ကမ်းပိန်းလုပ် ရတဲ့ ရည်ရွယ်ချက်ကတော့ အစိုးရကို သိစေချင်တယ်။ အလုပ်သမားတွေ လည်း သိစေချင်တယ်။ ပထမ တစ်ကြိမ်ကတော့ ကမ်ပိန်းစာရွက်ဝေတာ လုပ်တယ်။ ပြီးတော့ ဆန္ဒဖော်ထုတ်တာတွေ ရှိလာမယ်။ ဒီဇင်ဘာ လဆန်းမှာ မန္တလေးနဲ့ ရန်ကုန်မှာ လှုပ်ရှားမှုတွေ ဖြစ်တယ်” ဟု ပြောသည်။
 
ထိုသို့ စာရွက်ဝေခြင်းအား အလုပ်သမား အဖွဲ့အစည်း ဥပဒေအရ လုပ်ဆောင်ခြင်းဖြစ်ပြီး အခြားသော ဥပဒေများဖြင့် ခွင့်ပြုချက် မတင်ထားကြောင်း ဆိုသည်။ ယင်းအတွက် ဌာန်ဆိုင်ရာမှ လာရောက်မေးမြန်းခြင်း မရှိသော်လည်း စာရွက်ဝေသည့်အခါ လက်ခံယူသည့် အလုပ်သမားများ အနေဖြင့် ကြောက်စိတ်အနည်းငယ်ရှိ သဖြင့် စိုးရွံစွာ လက်ခံယူခြင်းများ ရှိကြောင်း ပြောပြချက်အရ သိရသည်။
 
အလုပ်သမား အဖွဲ့အစည်းများမှ ယခုဖြန့်ဝေသည့် ကမ်ပိန်းစာရွက်အရှေ့တွင် “အနည်းဆုံး အခကြေးငွေ တစ်ရက်လျှင် ၅၆၀၀ ကျပ်ထက် မနည်း အမြန်ဆုံး သတ်မှတ်ရေး” ဖော်ပြထားပြီး စာရွက်အနောက်တွင် အနည်းဆုံး အခကြေးငွေ သတ်မှတ်ရေးဆိုင်သည့် တောင်းဆိုချက်များ ဖော်ပြထားသည်။
 
အဆိုပါ တောင်းဆိုချက်များထဲတွင် အနည်းဆုံး အခကြေးငွေ ဥပဒေပုဒ်မ-၅(ဇ)အရ အနည်းဆုံး အခကြေးငွေကို ၂ နှစ်လျှင် အနည်းဆုံးတစ်ကြိမ် ပြင်ဆင်သတ်မှတ်ရေး၊ အနည်းဆုံး အခကြေးငွေ ဥပဒေမုဒ်မ-၁၀(ခ)အရ အဆိုပြု အနည်းဆုံး အခကြေးငွေ နှုန်းထားအပေါ် ကန့်ကွက်မှုမရှိလျှင် ပြည်ထောင်စုအစိုးရ အဖွဲ့၏ အတည်ပြုချက်ရယူကာ သတ်မှတ်ရေးနှင့် အနည်းဆုံး အခကြေးငွေ နည်းဥပဒေအရ အလုပ်သမား ၅ ဦးနှင့် အထက်လုပ်ကိုင်သော လုပ်ငန်း အမျိုးအစားများကို နိုင်ငံတစ်ဝန်းလုံးအတွက် သတ်မှတ်ရေး ဆိုသည့် တောင်းဆိုချက် သုံးချက်အား အလုပ်သမားများ သိရှိဖော်ပြထားသည်။
 
ဦးနော်အောင်က “အဓိက ထူးခြားချက်တစ်ခုက အနည်းဆုံး အခကြေးငွေ ပြန်လည်ပြင်ဆင် သတ်မှတ်ရေးမှာ လွှတ်တော်ကို တခါဖြတ်ရဦးမယ်ဆိုတဲ့ ကိစ္စကို ဒီဝေတဲ့စာရွက်ထဲမှာ ဥပဒေပုဒ်မအရ အနည်းဆုံးအခကြေးငွေ သတ်မှတ်ရေး ဥပဒေမှာ ရေးထားတာ တစ်ချက်ရှိတယ်။ အဲ့ဒါက ပြည်ထောင်စုအစိုးရကနေ ဒါကိုသတ်မှတ်ရမယ်။ လွှတ်တော်ကို ဖြတ်စရာ မလိုဘူး။ လွှတ်တော်ကိုဖြတ်ရင် ကြန့်ကြာမယ်လို့ ယူဆတယ်။ သူတို့လုပ်ပိုင်ခွင့် မဟုတ်ဘူး။ ပြည်ထောင်စုအစိုးရရဲ့လုပ်ပိုင်ခွင့် ဖြစ်ကြောင်း ဒါလေးတော့ ထူးခြားမှုရှိတယ်”ဟု ပြောသည်။
 
အဆိုပါ လှုပ်ရှားမှုအား ယနေ့(နိုဝင်ဘာ ၂၄ ရက်) နံနက် ၆ နာရီမှ စတင်ကာ လှိုင်သာယာမြို့နယ် တပ်ထိပ်၊ စက်မှုဇုံ၊ ဗိုလ်ချုပ်၊ အဆင့်မြင့်၊ န၀ဒေး၊ ဘုရားလမ်း၊ ဆောက်လုပ်ရေး၊ တိုးချဲ့၊ အောက်ထိပ်၊ Boc နှင့် ရွှေပြည်သာမြို့နယ်တွင် 81 ၊ ပျော်ဘွယ်၊ တော်ဝင်၊ သံဖြူဆိုင်၊ 14 လမ်းဆုံ၊ ကျော်စွာ၊ ဇင်ယော်၊ ပုလဲလမ်း၊ ထန်းခြောက်ပင် လမ်းဆုံတို့တွင် စက်မှုဇုန်လုပ်သားများအား ဖြန့်ဝေခဲ့ကြောင်း သိရသည်။
 
အလားတူပင် ရန်ကုန်တိုင်းဒေသကြီးရှိ အခြားမြို့နယ်များဖြစ်သည့် လှိုင်မြို့နယ်၊ မင်္ဂလာဒုံမြို့နယ်၊ တောင်ဒဂုံမြို့ နယ်၊ ဒဂုံဆိပ်ကမ်းမြို့ နယ်၊ မှော်ဘီမြို့ နယ်တို့တွင် လည်းကောင်း၊ နေပြည်တော်တွင် လည်းကောင်း၊ ပဲခူးတိုင်းဒေသကြီး တွင် ပဲခူးမြို့နယ်၊ ဆွာ၊ ရေတာရှည်၊ သာယာဝတီမြို့နယ်နှင့် မန္တလေးတိုင်းဒေသကြီးတွင် ပြည်ကြီးတံခွန်မြို့နယ်၊ကျောက်ဆည်မြို့စသည်တို့တွင် ဖြန့်ဝေခြင်းများ ပြုလုပ်ခဲ့ကြကြောင်း ပြောပြချက်အရ သိရသည်။
 
စိုင်းဟန်
The Ladies News
 

 

Vote: 
No votes yet

Add new comment