NCA အကောင်အထည်ဖော်မှု ပြန်လည်သုံးသပ်သည့် အစည်းအဝေး တွင် အပစ်ရပ်ရှစ်ဖွဲ့ အဆိုပြုထားသည့် အချက် ၂၁ ချက်ကို ဆွေးနွေး

NCA လက်မှတ်ရေးထိုးပြီး နှစ်နှစ်ကျော်ကြာ ကာလအတွင်း ပထမဆုံး အကြိမ်အဖြစ် NCA အကာင်အထည် ဖော်မှုအား ပြန်လည်း သုံးသပ်သည့် အစည်းအဝေးတွင် အပစ်ရပ် တိုင်းရင်းသား လက်နက် ကိုင် ရှစ်ဖွဲ့မှ အဆိုပြုထားသည့် အချက်ပေါင်း ၂၁ ချက်ကို ဆွေးနွေး ခဲ့ကြောင်း ပြည်ထောင်စုရှေ့နေချုပ် ဦးထွန်းထွန်းဦးက ပြောကြားသည်။
 
အောက်တိုဘာ ၂၅ ၊ ၂၆ ရက်တို့တွင် ရန်ကုန်မြို့ရှိ NRPC ရုံး၌ကျင်းပခဲ့သော အစိုးရနှင့် NCA တွင် လက်မှတ် ရေးထိုးထားသော အပစ်ရပ်ရှစ်ဖွဲ့တို့၏ NCA အကောင်အထည်ဖော်မှု ပြန်လည် သုံးသပ်ခြင်း အစည်းအဝေးအပြီးတွင် နိဂုံးချုပ် အမှာစကား ပြောကြား ရာ၌ ပြည်ထောင်စု ရှေ့နေချုပ်က ထည့်သွင်း ပြောကြားခဲ့ခြင်းဖြစ်သည်။
 
"တိုင်းရင်းသား လက်နက်ကိုင် အဖွဲ့အစည်း ခေါင်းဆောင် တွေက နေပြီးတော့ အဆိုပြုချက် ၂၁ ချက်ကို အဆိုပြုခဲ့တယ်။ ဒီအပေါ်မှာ ဆွေးနွေးခဲ့ကြတယ်။ ဆွေးနွေးတဲ့ အပေါ်မှာလည်း တစ်ဝက်လောက်က အကြိမ်ကြိမ် ထပ်မံဆွေးနွေး နိုင်တယ်။ တစ်ဝက်လောက် ကလည်း သဘောထားတွေကို သိရှိခွင့်ရတယ်" ဟု ပြည်ထောင်စု ရှေ့နေချုပ် ဦးထွန်းထွန်ဦးက ပြောကြားသည်။
 
ဆွေးနွေးခဲ့သည့် အချက်အလက်များ အပေါ်တွင် တိုင်းရင်းသား ခေါင်းဆောင်များ၏ အမြင်သဘောထားများကို ကျယ်ကျယ်ပြန့်ပြန့် သိရှိခွင့်ရသလို အစိုးရဘက်က သဘောထားများကိုလည်း တိုင်းရင်းသား ခေါင်းဆောင်များကို ရှင်းပြနိုင်ခဲ့သည့် အတွက်ကြောင့် အဆိုပြုချက် သဘောထားများအပေါ်တွင် နှစ်ဖက်စလုံးက ပြန်လည် ဆင်ခြင်သုံးသပ်ကာ နှစ်ဖက်အဖွဲ့အစည်းများနှင့် နောက်ထပ်ပြုလုပ်မည့် ကော်မတီများတွင် တင်ပြဆောင်ရွက် သွားနိုင်မည် ဖြစ်သည်ဟု ၎င်းက ပြောကြားသည်။
 
"ဒီအစည်းအဝေးတွေကို ပထမဦးဆုံးအကြိမ် လုပ်နိုင်သလို အခါအား လျော်စွာ ထပ်ပြီး ဆွေးနွေးနိုင်ခြင်း၊ ပြန်လည် သုံးသပ်နိုင်ခြင်းအားဖြင့် ပိုမိုပြီးတော့ ကျွန်တော်တို့ရဲ့ ပစ်ခတ် တိုက်ခိုက်မှု ရပ်စဲရေး သဘောတူ စာချုပ်ကြီးရဲ့ အကောင်အထည်ဖော် ဆောင်ရွက်နိုင်မှုတွေဟာ ပိုမိုပြီး တော့ လျင်လျင်မြန်မြန် တိုးတက်မယ်လို့ ယုံကြည်ပါတယ်" ဟု ပြည်ထောင်စု ရှေ့နေချုပ် ဦးထွန်းထွန်းဦးက ပြောကြားသည်။
 
ယခုဆွေးနွေးပွဲတွင် NCA စာချုပ်ထဲ၌ ပါဝင်သည့် အခန်းလိုက်ကို ဆွေးနွေးခြင်းဖြစ်ပြီး ပြန်ပြီးချုပ်လိုက်ပါက အချက် ၂၁ ချက်ရှိပြီး ထိုအထဲတွင် အပိုင်းသုံးပိုင်းပါဝင်သည်ဟု EAO ဘက်မှ တင်ပြခဲ့ခြင်း ဖြစ်သည်ဟု NCA-S EAO ဘက်မှ NCA အကောင်အထည်ဖော်မူ ပြန်လည် သုံးသပ်ခြင်းဆိုင်ရာ အလုပ်အဖွဲ့ခေါင်းဆောင် ABSDF ဥက္ကဋ္ဌ ရဲဘော်သံခဲက ပြောကြားသည်။
 
နံပါတ်တစ်အချက်မှာ NCA စာချုပ်တွင် ပါဝင်သည့် နိုင်ငံရေးဝေါဟာရ အယူအဆရေးရာ ကိစ္စဖြစ်ပြီး ထိုအယူအဆရေးရာ ကိစ္စရပ်များသည် တစ်ဖက်နှင့် တစ်ဖက်ကြားတွင် ဘယ်လောက် နားလည်ထားသနည်း၊ အဆိုပါကိစ္စရပ်သည် နီးစပ်ရန် လိုသည်ဟု ရဲဘော်သံခဲက ပြောကြားသည်။
 
"ဥပမာ ဆိုကြပါစို့၊ အမျိုးသားအဆင့် နိုင်ငံရေး ဆွေးနွေးပွဲတွေကို ကျယ်ကျယ်ပြန့်ပြန့် ကျင်းပချင်တာက ကျွန်တော်တို့ ဘက်က သဘောထား ဖြစ်တယ်။ တစ်ဖက်ကလည်း အမျိုးသားအဆင့် နိုင်ငံရေး ဆွေးနွေးပွဲတွေကို သက်ဆိုင်ရာ ဒေသအလိုက်ပဲ ကျင်းပစေချင်တဲ့ စဉ်းစားချက်၊ ဒီလိုမျိုး စဉ်းစားချက်တွေဟာ တစ်ဖက်နဲ့ တစ်ဖက်ကြားမှာ ညှိနှိုင်းထားဖို့ လိုပါတယ်။ ဒီယူဆချက်တွေဟာ ဘာပဲပြောပြော ကျွန်တော်တို့ ကြားထဲမှာ မတူညီတဲ့ စဉ်းစားချက်တွေ ဖြစ်တယ်။ ဒါပေမယ့် ဒါကို အတူတူ ဘယ်လောက် လုပ်နိုင်သလဲဆိုတာကို ဒီနေ့ပွဲက အဖြေရှာရတာ ဖြစ်တယ်" ဟု ၎င်းက ပြောကြားသည်။
 
ဒုတိယပိုင်းမှာ တပ်ပိုင်းဆိုင်ရာ ကိစ္စရပ်ဖြစ်သည့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC) ကို ပြည်ထောင်စုအဆင့်၊ ပြည်နယ်အဆင့်၊ ဒေသအဆင့် ဖွဲ့စည်းရမည်ဆိုသည့် ပြဋ္ဌာန်းချက်များရှိပြီး ယခု လတ်တလောတွင် ယင်းပြဋ္ဌာန်းချက်များနှင့်အညီ လုပ်ဆောင်နိုင်မှု မရှိသေးသည့် ဒေသများလည်း ရှိသည်ဟု ဆိုသည်။
 
"နောက်တစ်ခုက Bilateral အရ စဉ်းစားရမယ့် နှစ်ဖက်သဘောတူ စာချုပ်တွေထဲမှာ နယ်မြေ သတ်မှတ်ခြင်းတွေ၊ အခုပြောနေတဲ့ ပူးတွဲ စောင့်ကြည့်ရေး ယန္တရား တည်ဆောက်မှုတွေဟာ တချို့အဖွဲ့၊ တချို့ဒေသတွေမှာ လုပ်နိုင်ပေမယ့် တချို့အဖွဲ့တွေမှာ လုပ်ဖို့က ကျန်နေသေးတယ်။ ဒီလိုလုပ်ငန်းမျိုးတွေကို နှစ်ဖက်ကြားမှာ ဘယ်ဟာတွေက ဆက်လုပ်ရမယ်၊ ဘယ်ဟာတွေကတော့ နှစ်ဖက်ညှိနှိုင်းပြီးတော့မှ ပုံစံတစ်ခုတည်း မကျရင်တောင်မှ ဒီပုံစံတွေကို သက်ဆိုင်ရာ ကာယကံရှင် အဖွဲ့အစည်းတွေကြားမှာ ဘယ်လို ဆောက်ရွက်ရမလဲဆိုတဲ့ အကြောင်းအရာ ကိစ္စဖြစ်တယ်" ဟု ရဲဘော်သံခဲက ပြောကြားသည်။
 
တတိယအချက်မှာ ငြိမ်းချမ်းရေး ဖြစ်စဉ်တွင် အားလုံးပါဝင်းရေးကို မည်သို့စဉ်းစားမလဲဆိုသည့် ကိစ္စဖြစ်သည်ဟု ၎င်းက ပြောကြားသည်။
 
"အားလုံး ပါဝင်ရေးမှာလည်း ငြိမ်းချမ်းရေး ညီလာခံမှာ ပါဝင်ရေးလား၊ နောက်တစ်ခုက နိုင်ငံရေး ဆွေးနွေးပွဲတွေမှာ ပါဝင်ရေးလား၊ နောက်တစ်ခုကတော့ NCA လက်မှတ် ထိုးမထားသော်လည်းပဲ Bilateral Agreement တွေ ထိုးထားတဲ့ အဖွဲ့တွေ မြန်မာပြည်မှာ ၁၆ ဖွဲ့ လောက်ရှိတယ်။ ဒီ Bilateral Agreement တွေနဲ့ အခုလုပ်နေတဲ့ နိုင်ငံရေး ဆွေးနွေးပွဲတွေက ဘယ်လိုချိတ်ဆက်ကြမလဲ စသည်ဖြင့် ဒီဟာတွေကို ကျွန်တော်တို့ ဘက်ကနေ ညှိနှိုင်းဆောင်ရွက် နေကြတာ ဖြစ်တယ်" ဟု ၎င်းကပြောကြားသည်။
 
ဆွေးနွေးခဲ့သည်များကို အနှစ်ချုပ်ပြောရမည် ဆိုပါက ကွဲလွဲနေသည့် နိုင်ငံရေး အယူအဆများကို ပွင့်ပွင့်လင်းလင်းဖြင့် နှစ်ဖက်အမြင်များကို ဆွေးနွေးခြင်း ဖြစ်သောကြောင့် ညှိနှိုင်းနိုင်သည်များ ရှိသလို မညှိနှိုင်း နိုင်သည်များလည်း ရှိသည်ဟု ရဲဘော်သံခဲက ပြောကြားသည်။
 
"ညှိနှိုင်းနိုင်တဲ့ ဟာတွေကို မှတ်ထား၊ မညှိနှိုင်းနိုင်တာတွေကို တစ်ဖက်ရဲ့ အမြင်အနေနဲ့ ယူဆထားတယ်၊ ဒါပေမယ့် ဒီအမြင်တွေ ဒီယူဆချက်တွေကို သက်ဆိုက်ရာ ကာယကံရှင် အဖွဲ့အစည်းတွေဆီ၊ မိခင်အဖွဲ့အစည်းတွေဆီ ပြန်ယူသွားမယ်၊ ယူသွားပြီးတော့ အခါကျတော့မှပဲ နောက်တစ်ကြိမ် ဒါတွေကို ဘယ်လို ဆက်အကောင်အထည် ဖော်မလဲဆိုတဲ့ ဟာကို စဉ်းစားရမှာ ဖြစ်ပါတယ်" ဟု ၎င်းက ပြောကြားသည်။
 
အောက်တိုဘာ ၁၆ ရက်နေ့က NCA တွင် လက်မှတ်ရေးထိုးထားသည့် အပစ်ရပ်ရှစ်ဖွဲ့မှ ဖွဲ့စည်းထားသော ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) ခေါင်းဆောင်များနှင့် နိုင်ငံတော်၏ အတိုင်ပင်ခံပုဂ္ဂိုလ်၊ တပ်မတော် ကာကွယ်ရေးဦးစီးချုပ်တို့ တွေ့ဆုံစဉ်က NCA နှစ်နှစ်တာ အကောင်အထည် ဖော်မှုကို ပြန်လည်သုံးသပ်မည် ဆိုသည့် သဘောတူညီချက်ဖြင့် ယခုအစည်းအဝေးကို ကျင်းပရခြင်း ဖြစ်သည်ဟု နိုင်ငံတော်၏ အတိုင်ပင်ခံရုံး ၀န်ကြီးဌာန၊ ညွှန်ကြားရေးမှူးချုပ် ဦးဇော်ဌေးက ပြောကြားသည်။
 
`ဆွေးနွေးတဲ့အခါ အဓိကအားဖြင့် NCA မှာပါတဲ့ သဘောတူညီချက်တွေကို အကောင်အထည် ဖော်တဲ့အခါမှာ တစ်ဖက်နဲ့ တစ်ဖက် ဘာတွေအားနည်းချက်တွေ ရှိနေလဲ၊ တစ်ဖက်မှာ နိုင်ငံရေးဆွေးနွေးပွဲ ရှိနေတယ်၊ တစ်ဖက်မှာ ပစ်ခတ် တိုက်ခိုက်မှု ရပ်စဲရေး ရှိတယ်၊ ဒီအပိုင်းတွေမှာ အပြုသဘော ပိုပြီးကောင်းမွန်အောင် ဘယ်လို လုပ်မလဲဆိုတဲ့ အပေါ် အမြင်ချင်း ဖလှယ်တယ်ပေါ့။ သဘောထားတွေ စုစည်းတယ်၊ အားလုံးပေါင်း ၂၁ ချက် ဆွေးနွေးတယ်။ ၂၁ ချက်မှာ ရှေ့နေချုပ် ပြောသွားသလို တော်တော်များများ သဘောထားတွေ အပြန်အလှန် ဖလှယ်နိုင်ခဲ့တယ်၊ နောက် တော်တော်များများမှာလည်း နှစ်ဖက်သဘောတူညီတာတွေ ရှိပါတယ်။ ဒါတွေကို နောက်လာမယ့် UPDJC အစည်းအဝေးတွေ၊ JMC အစည်းအဝေးတွေမှာ ဒီဆွေးနွေးချက်တွေကို ပြန်ပြီးတော့ အကောင်အထည်ဖော်ဖို့တွေ ရှိပါတယ်။ ဒါတွေကို နှစ်ဖက် အကြီးအကဲတွေဆီ တင်ပြမယ်၊ တင်ပြပြီးရင် နောက် JICM အစည်းအဝေးမှာ ဒါတွေကို ပြန်ပြီး အတည်ပြုပြီးရင် UPDJC မှာရော JMC ရော ဆက်လက်လိုက်နာ ဆောင်ရွက်သွားဖို့ ဖြစ်ပါတယ်´ ဟု ဦးဇော်ဌေးက ပြောသည်။
 
ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) အစည်းအဝေး ပြုလုပ်သည့်အချိန်တွင် အပစ်ရပ်ရှစ်ဖွဲ့ တောင်းဆိုထားသည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် အကောင်အထည်ဖော်မှု ဆိုင်ရာ ညှိနှိုင်းအစည်းအဝေး (JICM) ကျင်းပမည့်ရက်ကို သတ်မှတ်မည်ဟု ၄င်းက ပြောကြားသည်။
 
နှစ်ရက်တာ ပြုလုပ်ခဲ့သော အစိုးရနှင့် NCA တွင် လက်မှတ်ရေးထိုးထားသည့် အပစ်ရပ်ရှစ်ဖွဲ့တို့၏ NCA ပြန်လည်သုံးသပ်ခြင်း အစည်းအဝေးတွင် အစိုးရဘက်မှ ပြည်ထောင်စုရှေ့နေချုပ် ဦးထွန်းထွန်းဦး ဦးဆောင်ကာ JMC-U ဥက္ကဋ္ဌ ဒုတိယ ဗိုလ်ချုပ်ကြီး ရာပြည့်နှင့် တပ်မတော် အဆင့်မြင့်အရာရှိကြီးများ၊ ငြိမ်းချမ်းရေး ကော်မရှင် အဖွဲ့ဝင်များ၊ အပစ်ရပ်ရှစ်ဖွဲ့ ဘက်မှ ABSDF ဥက္ကဋ္ဌ ရဲဘော်သံခဲ ဦးဆောင်သည့် ကိုယ်စားလှယ်အဖွဲ့ တက်ရောက် ဆွေးနွေးခဲ့ကြသည်။
 
အောင်ရဲနောင်
The Ladies News
 

 

Vote: 
No votes yet

Add new comment