အော်ဂဲနစ်သီးနှံ၏ ဈေးနှုန်းသည် ပုံမှန်စိုက်ပျိုး ထုတ်လုပ်သော သီးနှံဈေးနှုန်းနှင့် သိသာစွာ ကွာခြားမှု မရှိသေး

နိုင်ငံတကာတွင် အော်ဂဲနစ် စိုက်ပျိုးခြင်းမှ ထွက်ရှိလာသော သီးနှံများ၏ ဈေးနှုန်းများ ပုံမှန်စိုက်ပျိုး ထုတ်လုပ်သော သီးနှံဈေးနှုန်းထက်(၂)ဆမှ (၅)ဆခန့် ပိုမိုရရှိသော်လည်း ပြည်တွင်း ဈေးကွက်တွင် အော်ဂဲနစ်သီးနှံ၏ ဈေးနှုန်းသည် ပုံမှန်စိုက်ပျိုး ထုတ်လုပ်သော သီးနှံဈေးနှုန်းနှင့် သိသာစွာ ကွာခြားမှု မရှိသေးကြောင်း စိုက်ပျိုးရေး၊ မွေးမြူရေးနှင့် ဆည်မြောင်း ဒု-ဝန်ကြီး ဦးလှကျော်က သြဂုတ် ၃၁ ရက်တွင်ပြောသည်။

ပြည်သူ့လွှတ်တော် အစည်းအဝေးတွင် ပုလော မဲဆန္ဒနယ်မှ ဦးအုန်းခင်က ပြည်တွင်း၌ စိုက်ပျိုးရေး လုပ်ကိုင်နေကြသော တောင်သူလယ်သမား များအား ကမ္ဘာ့နိုင်ငံများ၌ အသုံးတွင်ကျယ်နေပြီး ဈေးကောင်းလည်း ရသော အော်ဂဲနစ် စိုက်ပျိုးရေး နည်းပညာများ စနစ်တကျ တိုးတက် အောင်မြင်လာရေး ကူညီဆောင်ရွက်ပေးရန် အစီအစဉ်ရှိ၊ မရှိ မေးမြန်းမှုအား ဖြေကြားရာတွင် ဒုတိယ၀န်ကြီးက ယင်းသို့ထည့်သွင်း ပြောဆိုခဲ့ခြင်းဖြစ်သည်။

ထို့အတူ စီးပွားဖြစ် အော်ဂဲနစ်စိုက်ပျိုးရေးသည် တစ်ဦးတစ်ယောက် တစ်ကွက်တည်း ဆောင်ရွက်ရန် မဖြစ်နိုင်ကြောင်း၊ အများစုပေါင်းပြီး ဧရိယာတစ်ခု(သို့) ဇုန်တစ်ခု တည်ထောင်ပြီး သမရိုးကျ စိုက်ပျိုးရေးစနစ်မှ အော်ဂဲနစ် စိုက်ပျိုးရေးစနစ်သို့ ကူးပြောင်းရသဖြင့် ရာသီ သီးနှံများတွင်(၂)နှစ်နှင့် နှစ်ရှည်သီးနှံများတွင်(၃)နှစ် အသွင်ကူးပြောင်းချိန် လိုအပ်သည်ဟုလည်း ဒုတိယ၀န်ကြီးက ပြောသည်။

လှည်းကူးမြို့နယ်၊ ဟင်းသီးဟင်းရွက် သစ်သီးဝလံ သုတေသနနှင့် ဖွံ့ဖြိုးရေးဗဟိုဌာနတွင် ဓါတုဆေးလွတ် အော်ဂဲနစ် စံပြစိုက်ခင်းများအဖြစ် စိုက်ပျိုး၍ တောင်သူများအား လက်တွေ့ပြသပေးခြင်း၊ သဘာဝမြေသြဇာများ ရွက်ဖျန်းမြေသြဇာများ စသည့် အော်ဂဲနစ်မြေသြဇာ များအား လက်တွေ့ ပြုလုပ်ပညာပေးခြင်း၊ နည်းပညာပေး စာစောင်များ ဖြန့်ဝေပေးခြင်းတို့ကို ဆောင်ရွက်လျှက်ရှိပြီး တောင်သူများအား နည်းပညာများ ဖြန့်ဝေပေးလျှက်ရှိ ကြောင်းလည်း ဒုတိယ၀န်ကြီးဦးလှကျော်က ဆက်လက်ပြောကြားခဲ့သည်။

ဇော်မင်းထွန်း
The Ladies News

Vote: 
No votes yet

Add new comment