သီလဝါအထူးစီးပွားရေးဇုန်အတွင်း အိမ်ထောင်စုပေါင်း ၉၁ စုအတွက် ပြန်လည်နေရာချထားရန် ပြင်ဆင်လျှက်ရှိ

သီလဝါအထူးစီးပွားရေးဇုန်အတွင်းမှ ပြောင်းရွှေ့ပေးရသူများအတွက် မြေယာလျော်ကြေးနှင့် ပတ်သက်ပြီး သီလဝါအထူးစီးပွားရေးဇုန် (A) မှ အိမ်ထောင်စု (၆၈) စုအား ပြန်လည်နေရာချထားပေးခဲ့ပြီး ဇုန် (B) ဧရိယာ (၂-၁) နှင့် ဧရိယာ (၂-၂) အရှေ့မှ ပြန်လည်နေရာချထားရမည့် အိမ်ထောင်စုပေါင်း ၉၁ စုအတွက် ပြင်ဆင်လျှက်ရှိကြောင်း စီးပွားရေးနှင့် ကူးသန်းရောင်းဝယ်ရေး ဒု-ဝန်ကြီး ဦးအောင်ထူးက ဇူလိုင် ၆ ရက်တွင်ပြောသည်။

ပြည်သူ့လွှတ်တော်အစည်းအဝေးတွင် ကျောက်တန်းမဲဆန္ဒနယ်မှ ဒေါ်အေးမြမြမျိုးက သီလဝါ အထူးစီးပွားရေးဇုန်အတွင်းမှ ပြောင်းရွှေ့ခံတောင်သူများကို ပြန်လည်နေရာချထားရေးနှင့် အလုပ်အကိုင်အခွင့်အလမ်းအတွက် မည်သို့ စီစဉ်ဆောင်ရွက်ထားပါသလဲနှင့် သီလဝါအထူးစီးပွားရေးဇုန်အတွင်းမှ ပြောင်းရွှေ့ပေးရသူနှင့် မြေယာလျော်ကြေးပေးအပ်ပြီးသူ မည်မျှရှိသည်ကို သိလိုကြောင်း မေးမြန်းမှုကို ပြန်လည်ဖြေကြားရာတွင် ထည့်သွင်းပြောကြားခဲ့ခြင်းဖြစ်သည်။

မြေယာလျော်ကြေးပေးအပ်ပြီးသူ ၁၄၃ ဦးရှိပြီး ၊ ဝင်ငွေပြန်လည်ရရှိရေး အစီအစဉ်ဖြင့် ပြောင်းရွှေ့နေရာချထားသူများအတွက် အကြွေးများပေးချေခြင်း၊ အသေးစားချေးငွေများ ပေးအပ်ခြင်း၊ အသက်မွေးဝမ်းကျောင်းသင်တန်းများဖြစ်သည့် (ဥပမာ-ကားမောင်း၊ ကားပြင်၊ အပ်ချုပ်စသည့်) သင်တန်းပေးခြင်းများကိုလည်း ဆောင်ရွက်ပေးခဲ့ကြောင်း ဒုဝန်ကြီးဦးအောင်ထူးက ပြောသည်။

စီးပွားရေးဇုန် (A) အတွင်းမှ ပြောင်းရွှေ့ရသူများကို မြိုင်သာယာ ၃ ရပ်ကွက်တွင် (၂၅ပေ × ၅၀ ပေ) အကျယ်မြေကွက်ပေါ်တွင် ပြန်လည်နေရာချထားပေးခဲ့ပြီး ကျပ် ၂၅ သိန်းတန် အိမ်ရာများအား အစားထိုးဆောက်လုပ်ပေးခဲ့သည်။ ရွှေ့ပြောင်းမိသားစုအတွင်း အသက် ၆၀ ကျော်ပုဂ္ဂိုလ်၊ ဆင်းရဲနွမ်းပါးမှု မျဉ်းအောက်ရောက်သော မိသားစုဝင်များအတွက် လူမှုရေးအရ ထောက်ပံ့ပေးခြင်း၊ လုပ်ငန်းခွင်အသစ်သို့ သွားလာနိုင်ရန် ခရီးစရိတ် ၃ လစာ ထောက်ပံ့ပေးခြင်းတို့
ဆောင်ရွက်ပေးခဲ့သည်။

ပြောင်းရွှေ့နေရာချထားခြင်းခံရသော ဒေသခံများ၏ ဘဝထူထောင်ရေး အလုပ်အကိုင်အခွင့်အလမ်း အတွက် ရန်ကုန်တိုင်းဒေသကြီးအစိုးရအဖွဲ့၏ ဦးဆောင်မှုဖြင့် JICA မှ ပညာရှင်များ၊ လူမှုဝန်ထမ်းဦးစီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာန၊ အထွေထွေအုပ်ချုပ်ရေးဦးစီးဌာနတို့နှင့် ပူးပေါင်း၍ စက်ပြင်သင်တန်း၊ ကားမောင်းသင်တန်း၊ လျှပ်စစ်ပစ္စည်းပြုပြင်သင်တန်း၊ ကွန်ပျူတာသင်တန်း အစရှိသည့် အသက်မွေးဝမ်းကျောင်း အထောက်အကူပြုသင်တန်းများကို ၎င်းတို့၏ ဆန္ဒနှင့်အညီ တက်ရောက်သင်ယူနိုင်ရေးအတွက် စီစဉ်ဆောင်ရွက်ပေးခဲ့ကြောင်းလည်း ဒုဝန်ကြီး ဦးအောင်ထူးက ဆက်လက်ပြောကြားခဲ့သည်။

ဇော်မင်းထွန်း

The Ladies News

Vote: 
No votes yet

Add new comment