ရှမ်းအရှေ့ရှိ ပြည်သူ့စစ်များ မူးယစ်ဆေးဝါး တိုးမြှင့် ထုတ်လုပ်နေမှု အပေါ် ဖြေရှင်းပေးရန် အန်အယ်လ်ဒီ အစိုးရအား လားဟူဖွံ့ဖြိုးရေးအဖွဲ့ LNDO တိုက်တွန်း

ရှမ်းပြည်နယ် အရှေ့ပိုင်းတွင် တပ်မတော်လက်အောက်ခံ ပြည်သူ့စစ်အဖွဲ့များမှ မူးယစ်ဆေးဝါး ထုတ်လုပ်မှု များပြားလာသည့် အပေါ် အရပ်သား အစိုးရသစ်ဖြစ်သည့် အန်အယ်လ်ဒီ အစိုးရအနေဖြင့် ဖြေရှင်းပေးရန် လိုအပ်ကြောင်း LNDO လားဟူအမျိုးသားများ ဖွံ့ဖြိုးတိုးတက်ရေးအဖွဲ့မှ တိုက်တွန်းကြောင်း ၄င်းအဖွဲ့မှ ထုတ်ပြန်သည့် မူးယစ်ဆေးဝါး ထုတ်လုပ်မှုဆိုင်ရာ အစီရင်ခံစာတွင် ဖော်ပြထားသည်။
 
ရှမ်းအရှေ့ရှိ ပြည်သူစစ်များက တောထဲတွင် မူးယစ်ဆေးချက်ရုံများ ထူထောင်ကာ ဘိန်းဖြူနှင့် စိတ်ကြွဆေးများ ထုတ်နေကြောင်း အောက်တိုဘာ လ ၂၇ ရက်နေ့ ရက်စွဲဖြင့် ထုတ်ပြန်ထားသော မူးယစ်ဆေးမှ အာဏာဆို သည့် အစီရင်ခံစာတွင် ဖော်ပြထားသည်။
 
ထုတ်ပြန်ချက်တွင် တပ်မတော်မှ ဖွဲ့စည်းထားပေးသည့် ပြည်သူ့စစ်များ သည် တောထဲ၌ မူးယစ်ဆေးချက်ရုံများကို ကာကွယ်စောင့်ရှောက်လျှက် မူးယစ်ရာဇာများအတွက် ဘိန်းဖြူနှင့်စိတ်ကြွဆေးများ ထုတ်နေခြင်းကြောင်း အစီရင်ခံစာထဲတွင် ဖော်ပြထားသည်။ ထိုမှ ထွက်ရှိလာသည့် မူးယစ်ဆေးဝါးများကြောင့် မြန်မာတစ်ပြည်လုံးရှိ လူအသိုင်းအ၀ိုင်း ၀န်းကျင်တွင် ပျက်စီးနေကြောင်း သတိပေးထားသည်။
 
သံလွင်မြစ် အရှေ့ဘက်ရှိ တောတောင်ထူထပ်သည့် ဒေသများ ထိန်းချုပ်နိုင်ရန်အတွက် ပြည်သူစစ်များ လိုအပ်ပြီး ပြည်သူ့စစ် အများစုမှာ လားဟူများဖြစ်ကြောင်း ဆိုသည်။ အဆိုပါဒေသတွင် အပစ်ရပ်စဲရေး လုပ်ထားသော်လည်း မြန်မာစစ်တပ်က ပြည်သူ့စစ်အင်အားကို တိုးချဲ့ခြင်းများရှိပြီး လွန်ခဲ့သည့် ၁၀ နှစ်ခန့်က ပြည်သူ့စစ်အဖွဲ့၆၈ ဖွဲ့ အင်အား ၂၃၀၀ ခန့် ရှိသော်လည်း ယခုအခါ ၈၇ ဖွဲ့ဖြစ်လာပြီင်္း အင်အား ၃၄၀၀ ခန့်ရှိကြောင်း ဆိုသည်။
 
LNDO ဒါရိုက်တာ ဂျာဖက်ဂျဂူက “ရှမ်းပြည်အရှေ့ပိုင်းကို ထိန်းချုပ်ရန် အတွက် မြန်မာစစ်တပ်သည် ပြည်သူ့စစ်ကို လိုအပ်တယ်။ ပြည်သူ့စစ်တို့၏ ကျိုးနွံမှုကိုရရန် အပြန်အလှန်အားဖြင့် မူးယစ်ဆေး ရောင်းဝယ်မှု မတားဆီးကြဘူး။ မူးယစ်ဆေး တိုက်ဖျက်ရေးထက် နယ်မြေ ထိန်းချုပ်ရေးက နေပြည်တော်အတွက် ပိုအရေးကြီးတယ်လေ” ဟု ထုတ်ပြန်ချက်တွင် ပြောထားသည်။
 
ပြည်သူစစ်တို့သည် ဘိန်းချက်ရုံပိုင်ရှင်တို့ထံ လက်ဝါးကြီးအုပ် ဘိန်းရောင်း ၀ယ်ရာတွင် လည်းကောင်း၊ ဘိန်းချက်ရုံများတွင် အရင်းအနှီးမြုပ်နှံခြင်းဖြင့် လည်းကောင်း၊ ဖြန့်ဖြူးမည့်သူများထံ ပို့ဆောင်ပေးခြင်းဖြင့် လည်းကောင်း အမြတ်များစွာ ရရှိနေသည်။ ဤနည်းလမ်းဖြင့် ရရှိလာ သည့် ငွေကြေးများ က ပြည်သူ့စစ်အဖွဲ့များကို ကြီးထွားစေကာ ပြည်သူစစ်ခေါင်းဆောင်များ ချမ်းသာစေကြောင်းဆိုသည်။ ယင်းအပြင် ဘိန်းစိုက်ပျိုးမှု များပြားခြင်း၊ မူးယစ်ဆေးဝါး ထုတ်လုပ်ရောင်းဝယ်မှု များပြားခြင်း တို့ကြောင့် လားဟူ တိုင်းရင်းသား မျိုးနွယ်စုများအတွက် ပျက်စီးမှုများ များပြာလာသည်ဟု ဆိုထားသည်။
 
NLD အစိုးရသစ်အနေဖြင့် မြန်မာစစ်တပ်နှင့် မူးယစ်ဆေးပတ်သက်နေမှုကို အမှန်အတိုင်းမြင်ပြီး မြန်မာပြည်ရှိ မူးယစ်ဆေးပြသ၁နာကို ကိုင်တွယ်၊ တိုင်းရင်းသားတွေ ပဋိပက္ခကို နိုင်ငံရေးနည်းဖြင့် ဦးစားပေးဖြေရှင်းရန်လည်း LNDO က တိုက်တွန်းကြောင်း ပြောသည်။
 
ဦးဂျာဖက်ဂျာဂူက “ဒီဖယ်ဒရယ်စနစ်နဲ့ သွားမယ်ဆိုရင် စစ်တပ်က အရပ်သား အစိုးရ လက်အောက်မှာ ရှိမှသာလျှင် ဒီဟာကို သူတို့ ကောင်းကောင်းမွန်မွန် လုပ်နိုင်မယ်လို့ ထင်တယ်။ ဘိန်းကိစ္စတင်မက တခြားအုပ်ချုပ်ရေး ကိစ္စတွေကို ထိထိရောက်ရောက် လုပ်နိုင်မယ်လို့ ထင်တယ်”ဟု ပြောသည်။
 
ယင်းက ဆက်လက်ပြီး အစီရင်ခံစာတွင် ဘိန်းစိုက်တောင်သူများ ဆင်းရဲကြပုံ၊ မူးယစ်ဆေးစွဲသူများ တိုးပွားနေကြောင်း၊ အစိုးရပိုင်းအနေဖြင့် မူးယစ်ဆေးဝါး ထ်ိန်းချုပ်ရေး စီမံချက်များ လုပ်ဆောင်နေသော်လည်း ဟန်ပြ မူးယစ်ဆေး ထိန်းချုပ်ရေး စီမံချက်များကြောင့် လားဟူလူ့အဖွဲ့အစည်းများ ပျက်စီးလာကြောင်း ဆိုသည်။
 
ဦးဂျာဖက်ဂျာဂူက “နောက်တစ်ခုက ဘိန်းစိုက်ပျိုးရေး လုပ်တဲ့နေရာ ဘိန်းစိ်ုက် တောင်သူတွေကို အတင်းအဓမ္မ မဟုတ်ဘဲနဲ့ အာမခံချက်ရှိတဲ့ အသက်မွေးဝမ်းကျောင်း တစ်ခုခုကို လုပ်ပေးမှသာလျှင် လူထုထိခိုက်မှု နည်းမယ်လို့ ယူဆတယ်။ အခုဆေးစွဲတဲ့ သူအများကြီးပဲ။ အခု ဖြတ်တဲ့နေရာ မှာလည်း ဟန်ပြသဘောလောက်ပဲ ရှိတယ်။ လုံးဝ မူးယစ်ဆေးဝါး စွဲသူတွေ ကို သေသေချာချာ ပြတ်တဲ့သဘောမျိုး မရှိဘူး။ အဲ့တော့ လုပ်ငန်းကို ပြည်သူ လူထုရဲ့ ပူးပေါင်းပြီး လုပ်မှသာလျှင် တစ်ဖက်က လူထုသဘောထားနဲ့ လူထုဆန္ဒ အစိုးရရဲ့အာဏာနဲ့ ပူးပေါင်းပြီး လုပ်မှာသာ မူးယစ်ဆေးဝါး စွဲသူတွေကို ကုသနိုင်မယ်လို့ ယူဆတယ်” ဟု ပြောသည်။
 
နိုင်ငံတကာ အလှူရှင်များမှ မူးယစ်ဆေး ထိန်းချုပ်ရေး အပါအ၀င် လုံခြုံရေးကဏ္ဍအတွက် အကူအညီများ တိုးမြှင့်ပေးနေခြင်းသည် ပဋိပက္ခကို တိုးပွားစေနိုင်ပြီး မူးယစ်ဆေး ရောင်းဝယ်မှုကို အားပေးရာရောက်ကြောင်း “မူးယစ်ဆေးမှ အာဏာ” အစီရင်ခံ စာထဲတွင် အသိပေး တိုက်တွန်းထားသည်။
 
ရှမ်းပြည်နယ်တွင် မူးယစ်ဆေးဝါးလုပ်ငန်းနှင့် ပတ်သက်ပြီး စောင့်ကြည့် လာသူ တစ်ဦးဖြစ်ခဲ့သည့် Shan Drug Watch ကို ထူထောင်ခဲ့သူ ဦးခွန်စိုင်းက “ကျွန်တော်က အခု ငြိမ်းချမ်းရေးလုပ်ငန်းစဉ် လုပ်နေတော့ မူးယစ်ဆေးဝါးအကြောင်း မလုပ်ဖြစ်တာကြာပြီ။ သူတို့ အတိုကောက် စတိတ်မန့် ဖတ်ရသလောက်က အရင်ကဖြစ်တာနဲ့ ဘာမှသိပ်မကွာ ဘူးလို့ ပြောလို့ရတယ်” ဟု သုံးသပ်သည်။ ရှည်လျားလှသည့် ပြည်တွင်းစစ် သမိုင်းတစ်လျှောက် တပ်မတော်နှင့် နီးစပ်သည့် ပြည်သူ့စစ်အချို့မှာ ဘိန်းဘုရင်အဆင့်အထိ တက်လှမ်းခဲ့ဖူးကြောင်း နိုင်ငံတကာ အသိုင်းအ၀ိုင်းမှ ဆိုခဲ့ဖူးသည်။
 
စိုင်းဟန်
The Ladies News
 

 

Vote: 
No votes yet

Add new comment