အုပ်ချုပ်ရေးဟာ တရားစီရင်ရေးကို လွှမ်းမိုးကြိုးကိုင်ဆဲပဲလား || သရ၀ဏ်(ပြည်) ||

မြန်မာနိုင်ငံမှာ ခေတ်အဆက်ဆက် လွတ်လပ်သော တရားစီရင်ရေး ဆိုတာ ရှားခဲ့သည်။ တရားစီရင်ရေးသည် ခေတ်အဆက်ဆက် အုပ်ချုပ်ရေး၏ လက်ဝေခံဖြစ်နေခဲ့သည်။ အစိုးရသည် ဥပဒေဖြစ်သည်။ အစိုးရက တရားဥပဒေကို အမိန့် များ၊ ညွှန်ကြားချက်များ၊ မျက်ရိပ်မျက်ကဲ ပြမှုများ၊ တိုက်ရိုက်စွက်ဖက်မှုများ၊ သွယ်ဝိုက် စွက်ဖက်မှုများ၊ ခြိမ်းခြောက် မှုများ၊ အာဏာပြမှုများဖြင့် ထိန်းကျောင်းသည်။ ထို့ကြောင့် လူတို့သည် ဥပဒေ၏ အထက်တွင် အုပ်ချုပ်ရေးရှိသည်ဟု အခိုင်အမာ ယုံကြည်ကြ သည်။ အမှုအခင်း တစ်ခုဖြစ်လာလာလျှင် ဥပဒေကြောင်းအရ တရားရင်ဆိုင်ရန် မကြိုးစားကြဘဲ ထိုအမှုကို လွှမ်းမိုးကျော်ဖြတ်နိုင်မည့် အာဏာရှိသူတစ်ဦးဦးဆီ ချည်းကပ်ကြသည်။
 
ဗိုလ်ကြီးတတ်နိုင်သူက ဗိုလ်ကြီးဆီသွားသည် ၊ ဗိုလ်မှူးတတ်နိုင်သူက ဗိုလ်မှူးဆီသွားသည်၊ ဗိုလ်ချုပ်တတ်နိုင်သူက ဗိုလ်ချုပ်ဆီသွားသည်၊ သူ့ ထက်ကြီးတာ တတ်နိုင်သူက သူ့ ထက် ကြီးသူဆီသွားသည်။ ဘာပဲဖြစ်ဖြစ် အများလက်ခံ ယူဆထားသည်မှာ ပို၍အကောင်ကြီးသူဆီ သွားသူက အမှုမှာ ပို၍ အရေးသာနိုင်သည် ဟူသော ယူဆချက်ဖြစ်သည်။ အမှုမှာ မှန်တာမှားတာ တရားတာ မတရားတာသည် ဒုတိယကိစ္စအဖြစ် ယူဆကြ တာ ၀မ်းနည်းဖွယ်ကောင်းလှသည်။ တရားစီရင်ရေး အတွက်တော့ မျှတမှုသေဆုံးခြင်းဖြစ်သည်။
 
ထိုသို့ မျက်နှာကြီးရာ ဟင်းဖတ်ပါဖြစ်နေသော ခေတ်ကြောင့် တရားဥပဒေ ဆိုသည်ကို မည်သူကမျှ အားကိုး ယုံကြည်စိတ် မရှိပေ။ မတတ်သာ၍ တရားရုံးသို့ လာရောက်ရသော်လည်း မည်သူကမှ တရားမျှတစွာ စီရင်လိမ့်မည်ဟူ၍ မယူဆ။ အာဏာအကပ်မရှိသူများအဖို့ ဒုတိယ အားကိုး အားထားပြုရာ ကယ်တင်ရှင်ကြီးမှာ ဒုတိယဘုရားသခင်ဟု ခေါ်ဝေါ်ကြ သော ပိုက်ဆံငွေကြေး ဖြစ်သည်။ ဥပဒေအရာရှိနှင့် သက်ဆိုင်ရာ တရားသူကြီးတို့အား ငွေပိုပေးနိုင်သူသည် တရားနိုင်သူ ဖြစ်ပေ၏။ ထို့ကြောင့် လူတို့သည် အမှုအခင်းဖြစ်လျှင် ဥပဒေအတိုင်းမရှင်းကြဘဲ ဥပဒေပြင်ပမှ ဟာမူရာဘီ ကိုဓဥပဒေများ (လက်စားချေဥပဒေဖြင့်) ကိုယ့်ဘာသာ ရှင်းကြရာမှ ဥပဒေစိုးမိုးမှု ပြိုကျပျက်စီးသွားလေသည်။ အဓိကမှာ ဥပဒေကို အမိန့်များ၊ ညွှန်ကြားချက်များဖြင့် ဖျက်ဆီးခဲ့ကြ ခြင်းကြောင့်ဖြစ်သည်။ မြန်မာနိုင်ငံတွင် ဥပဒေဆိုသည်မှာ အစိုးရဖြစ်သည်။ အစိုးရက ဖမ်းချင်ဖမ်းမည်၊ တရားစွဲချင်စွဲမည်၊ လွှတ်ချင်လျှင် လွှတ်မည်။
 
ယခုအခါ ဒေါ်အောင်ဆန်းစုကြည်နှင့် သမ္မတကြီးဦးထင်ကျော် တက်လာပြီဖြစ်သော ဒီမိုကရေစီ ခေတ်ကြီးသို့ ရောက်လာပြီဖြစ်သဖြင့် ထိုကဲ့သို့  တရားစီရင်ရေးကို အုပ်ချုပ်ရေးက ၀င်ရောက် စွက်ဖက်ခြင်းမျိုး လျော့နည်းသွားပြီဟု ထင်ကောင်းထင်မိပေမည်။ အချို့နေရာ အချို့တွင် ပြောင်းလဲကောင်း ပြောင်းလဲသွားသော်လည်း အုပ်ချုပ်ရေးက တရားစီရင်ရေးကိုဝင်စွက်နေသေးတာ ကြိုးကြားကြိုးကြား တွေ့ နေရသေးသည် ။ ဒီဇင်ဘာ ၂၇ ရက်နေ့က သတင်းတစ်ပုဒ်ဖတ်ရသည်။ နေပြည်တော် လွှတ်တော်အတွင်း ဒရုန်းလွှတ်တင်ရန် ကြိုးပမ်းခဲ့သူများကို စွဲဆိုထားသည့်အမှုများအား တရားလိုဘက်မှ ပြန်လည်ရုပ်သိမ်း ဟူသော သတင်းဖြစ်သည်။ အထက်ပါအမှုများအား ဒီဇင်ဘာ ၂၆ ရက်က ဇမ္မူသီရိမြို့နယ်တရားရုံး ရုံးချိန်းတွင် တရားလိုဖြစ်သူ အမှတ်(၅) စခန်းမှူး ရဲအုပ်ထွန်းထွန်းဝင်းက တရားခွင်အတွင်း ရုပ်သိမ်းခွင့် လျှောက်ထားခဲ့ကြောင်း သိရသည်။
 
ဤတွင်ပြောလိုရင်းမှာ အမှုရုပ်သိမ်းခြင်း မရုပ်သိမ်းခြင်းမဟုတ်၊ မည်သည့်အတွက် မည်သို့ ရုပ်သိမ်းရသည်ဆိုသည့် အခြင်းအရာ ဖြစ်သည်။ ရဲအုပ်ထွန်းထွန်းဝင်းက တရားရုံးတွင် လာရောက် လျှောက်ထားရာ၌ “ဒက္ခိဏခရိုင် ရဲတပ်ဖွဲ့မှူးရုံးမှ တရားခံလေးဦး၏ ပြုလုပ်မှုသည် နိုင်ငံတော်၏လုံခြုံရေးကို ထိခိုက်စေမည့် ရည်ရွယ်ချက် မတွေ့ ရှိရ၍လည်းကောင်း၊ မလေးရှား နိုင်ငံသူနှင့် စင်ကာပူနိုင်ငံသားတို့နှင့် ပတ်သက်၍ နှစ်နိုင်ငံချစ်ကြည်ရေးကို ရှေးရှု၍ လည်းကောင်း ဖုန်းဖြင့် ညွှန်ကြားလာသဖြင့် ရည်ညွှန်းပါအမှုမှ တရားခံလေးဦးသို့ စွဲဆိုထားသော အမှုအား ရုပ်သိမ်း ခွင့်ပြုပါရန် လျှောက်ထားအပ်ပါသည်” ဟုပါဝင်ပေသည်။ ဤတွင် အဓိကထောက်ပြစရာ ရှိလာသည်မှာ “ဖုန်းဖြင့်ညွှန်ကြားလာသဖြင့်” ဆိုသော စကားဖြစ်သည်။ ထိုစကားအရဆိုလျှင် မြန်မာနိုင်ငံ၌ ဥပဒေအရ မည်သို့ပင် ရှိစေကာမူ တစ်စုံတစ်ဦးက ဖုန်းဆက်ညွှန်ကြားလာပါက လုပ်ကိုင်နေသော ဥပဒေလမ်းကြောင်းများကို ပြောင်းပြန်လှန်၍ ရသည်ဆိုသော ၀န်ခံချက်ဖြစ်နေပါသည်။ ဤသည်မှာ တိုင်းပြည်ပျက်စီးကြောင်း တရားဖြစ်သည် ။ ဖြစ်ရမည်မှာ မည်သူကဖုန်းဆက်သည်ဖြစ်စေ၊ မည်သူက နှုတ်ဖြင့် အမိန့်ပေးသည်ဖြစ်စေ ဥပဒေအတိုင်းသာ ဆောင်ရွက်မည် ဆိုသော နည်းလမ်းဖြစ်သည်။
 
အကယ်၍အထက်အဆင့်ဆင့်မှ ဥပဒေကြောင်းကို ၀င်ရောက်စွက်ဖက်မည် ဆိုလျှင်လည်း တာဝန်ယူ တာဝန်ခံရမည့် ရုံးစာထုတ်၍ တိတိကျကျစာဖြင့် ရေးသား တောင်းဆိုမှု၊ ညွှန်ကြားမှုသာဖြစ်သင့်ပေ သည်။ ဥပဒေကို ကလေးကစားသလို ဖုန်းဆက်၍ ဒီကောင့်ကိုဖမ်းလိုက်၊ ဒီကောင့်ကိုလွှတ်လိုက် တော့၊ တရားမစွဲနဲ့တော့ဟု ပြုမူနေကြခြင်းသည် ယိုသူမရှက် မြင်သူရှက်ဆိုသလို အလွန်စက်ဆုပ် ရွံရှာဖွယ်ကောင်းလှပါသည်။ စစ်အာဏာရှင်စနစ် မပျောက်သေးသော လုပ်ရပ်များဖြစ်၍ ပြည်ထဲရေးဝန်ကြီးဌာနက ပြုလုပ်သည်ဖြစ်စေ၊ သမ္မတရုံးက ပြုလုပ်သည်ဖြစ်စေ ထိုနှုတ်မိန့်စနစ်ဖြင့် ဥပဒေလမ်းကြောင်းကို ပြောင်းလဲပစ်ရန် ကြိုးပမ်းမှုအား ကန့်ကွက်ရှုတ်ချပါသည်။ ဒေါ်အောင်ဆန်းစုကြည်နှင့် ဦးထင်ကျော်၊ ဗိုလ်ချုပ်မှူးကြီးမင်းအောင်လှိုင် တို့သည်လည်း မိမိလက်အောက်ငယ်သားများအား ထိုမူမမှန်သော နှုတ်မိန့်ညွှန်ကြားချက်များဖြင့် တရားစီရင်ရေးကို အုပ်ချုပ်ရေးက ၀င်ရောက်မစွက်ဖက်ဖို့ တိတိကျကျ သွန်သင်ဆုံးမထားဖို့ လိုပေမည်။
 
စင်ကာပူနိုင်ငံတွင် ၁၉၉၄ ဒီဇင်ဘာလကုန်က အမေရိကန်နိုင်ငံသား ဆယ်ကျော်သက်လူငယ် မိုက်ကယ်ဖေးဆိုသူက လမ်းဘေးတွင် ရပ်ထားသောကားများကို မှုတ်ဆေးဘူးဖြင့် ဖျန်းပက်ဖျက်ဆီး သောအမှု ဖြစ်ခဲ့ပါသည်။ ထိုအမှုတွင် စင်ကာပူတရားရုံးက တရားခံအမေရိကန်နိုင်ငံသား မိုက်ကယ်ဖေးကို ဒဏ်ငွေနှင့်အတူ ကြိမ်ဒဏ် ၆ ချက် ချမှတ်ခဲ့ပါပါသည်။ တစ်ကမ္ဘာလုံးက ကြိမ်ဒဏ်မပေးကြဖို့ တောင်းပန်သည်၊ သို့သော် စင်ကာပူကလက်မခံ၊ တရားရုံးစီရင်ချက်ကိုသာ အတည်ပြုသည်။ နောက်ဆုံးတွင် အမေရိကန်သမ္မတ ဘီကလင်တန်ကိုယ်တိုင် စင်ကာပူဝန်ကြီးချုပ် လီကွမ်ယုကို ဖုန်းဆက်၍ ၀န်ကြီးချုပ်အမိန့်ဖြင့် ကြိမ်ဒဏ်ကို ပယ်ဖျက်ပေးဖို့ မေတ္တာရပ်ခံသည်။ အမေရိကန်သမ္မတ ကိုယ်တိုင် တောင်းပန်သဖြင့် လီကွမ်ယုက နှစ်နိုင်ငံချစ်ကြည်ရေးကို ထောက်ထားသဖြင့် အလွန်စိတ်လျှော့ပြီး ကြိမ်ဒဏ် ၆ ချက်မှ ၂ ချက်လျှော့ပေးလိုက်သည်။ ကျန် ၄ ချက်ကတော့ သိကြားမင်း ဆင်းဖျက်တောင်မပြင်နိုင်၊ ဥပဒေအထက်တွင် ဘယ်သူမှမရှိဟု လီကွမ်ယုက နိုင်ငံတော်ကို ကြေညာသည်။ ၁၉၉၅ မေလ ၅ ရက်တွင် မိုက်ကယ်ဖေးကို ကြိမ်ဒဏ်ရိုက်သည်။ ဥပဒေအထက်တွင် နှုတ်မိန့်မရှိ၊ ညွှန်ကြားချက်မရှိ၊ ပြည်ထဲရေးမရှိ၊ လိုင်းဝင်၍မရဆိုတာ စင်ကာပူက တစ်ကမ္ဘာလုံးကို ပြလိုက်သည်။
 
အိန္ဒိယမှာ လက်မှတ်မပါဘဲ ရထားစီးသော အဘိုးကြီအဘွားကြီးက သူ့ သမက်သည် မီးရထားဝန်ကြီး ဖြစ်သဖြင့် လက်မှတ်ဝယ်စရာ မလိုဟု ပြော၏။ ထို့ကြောင့် ဒဏ်ငွေနှစ်ဆ အရိုက်ခံရ၏။ မည်သူကမှ ကြားမ၀င်။ မီးရထားဝန်ကြီး တိုင်းပြည်ကို သူ့ယောက်က္ခမများအတွက် ရုပ်သံမှ တောင်းပန်ရသည်။ အင်္ဂလန်တွင် မီးရထားလက်မှတ် မေ့လာသော ၀န်ကြီးချုပ်ကို လက်မှတ်စစ်က ဒဏ်ငွေချမှတ်ရာ ၀န်ကြီးချုပ်က ပြုံးပြုံးရွှင်ရွှင် ဒဏ်ငွေဆောင်သွား၏။ မဟုတ်တာလုပ်သော အမေရိကန်သမ္မတ ရစ်ချတ်နစ်ဆင် ၀ါးတားဂိတ် အရေးအခင်းဖြင့် ရာထူးမှပြုတ်သွား၏။ ထိုကိစ္စအားလုံးတွင် အုပ်ချုပ်ရေးမှ တရားစီရင်ရေးကို ဖုန်းဆက်၍ အမိန့်မပေးခဲ့ပါ။ ပေး၍လည်း မရပါ။ မြန်မာပြည်ကြီး တိုးတက်ဖို့ ထပ်၍ပြောပါမည်။ တရားစီရင်ရေးသည် အုပ်ချုပ်ရေး၏ လက်အောက်ခံ မဟုတ်ပါကြောင်း။
 
သရ၀ဏ်(ပြည်)
The Ladies News
 

 

Vote: 
No votes yet
Reader Choice: 

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.