မီဒီယာတွေရဲ့ စောင့်ထိန်းရမယ့်ဝတ္တရား// ဒေါက်တာခင်မောင်ညို //

မီဒီယာတွေနဲ့ ပတ်သက်ပြီးပြောရရင် သူတို့ဟာ အမှန်တရားတွေဖြစ်ရပြီး ပြည်သူရော အစိုးရပါ ယုံကြည်စေဖို့ ကြိုးစားထားတဲ့ စာမျက်နှာတွေ ဖြစ်ရပါတယ်။

ဒါပေမဲ့ ဂျာနယ်လစ်အချို့ဟာ `ဘက်လိုက်ရမယ်´ ဆိုတဲ့ အယူအဆကို လွဲမှားစွာ လက်ခံကြတာရှိတယ်။ တကယ်တော့ ဒါဟာ မှားယွင်းပြီး ဂျာနယ်လစ်ကျင့်ဝတ် (Ethic) နဲ့ မညီညွတ်ပေဘူး။

ကျွန်တော်တို့တစ်တွေဟာ ခေတ်မီတိုးတက် ဖွံ့ဖြိုးသောခေတ်ကို ရောက်နေပြီဖြစ်တယ်။ ခေတ်မီတိုးတက် ဖွံ့ဖြိုးတယ် ဆိုတာဟာ `ရုပ်ပိုင်း´ ဆိုင်ရာသက်သက်ကို ပြောတာ မဟုတ်ပါဘူး။

စမတ်ဖုန်းလှလှ၊ တက်ဘလက် ကောင်းကောင်း၊ လင်ခရုဇာ မော်တော်ကားကြီးတွေ စီးပြီး အဲယားကွန်းအခန်းထဲမှာ ကာရာအိုကေ ဆိုကြ၊ ဘီယာသောက်ကြတာကို ခေတ်မီတိုးတက်တယ်လို့ မဆိုသာဘူး။ လူမှုရေးကျင့်ဝတ်၊ အတွေးအခေါ်တွေကလည်း ခေတ်မီတိုးတက်ရပေမည်။

ကိုယ်ကျင့်တရား စောင့်ထိန်းဖို့တာဝန်

.

ဂျာနယ်လစ်တွေမှာ အရည်အသွေးတွေ ရှိရမယ်ဆိုတဲ့ အချက်ဟာ အမှန်ပဲဖစ်ြတယ်။ ဂျာနယ်လစ်တွေဟာ -

  • လေ့လာဆန်းစစ်ရမယ်
  • မှတ်တမ်းတွေ ထားရှိရမယ်
  • အကြားအမြင် များရမယ်
  • မျက်စိဖွင့် နားစွင့်ထားရမှာ ဖြစ်တယ်။

ဒါတွေကို ရုပ်ပိုင်းအရည်အသွေး၊ တစ်နည်း Technical Scale လို့ ဆိုနိုင်တယ်။

သူတို့မှာ အရေးပါတဲ့ နောက်ထပ် အရည်အချင်း တစ်ခုတော့ လိုတယ်။ အဲဒါကတော့ ကိုယ်ကျင့်တရား စောင့်ထိန်းမှုပါပဲ။ သူတို့ဟာ အမှားအမှန် ဝေဖန်ပိုင်းခြားတတ်ရမယ်။ မမှန်တဲ့ အပြုအမူတွေကို ရှောင်ရမယ်။ သူတို့တွေဟာ တတ်နိုင်သမျှ အမှန်ဘက်က ရပ်တည်ကြရမှာ ဖြစ်တယ်။ Always try to do what is right လို့ ဆိုထားပါတယ်။ အမှန်တရားရဲ့ ချန်ပီယံ (Champion of the truth) ဖြစ်ရပါမယ်။

ကျွန်တော်တို့ သိထားရမယ့် အချက်ကတော့ ဂျာနယ်လစ်တွေရဲ့ အလုပ်ဟာ အင်မတန် အရေးကြီးတယ်။ သူတို့ရေးသားကြတဲ့ သတင်း အချက်အလက် အကြောင်းရာတွေဟာ လူတော်တော်များများဆီကို ရောက်တယ်။ သူတို့ရဲ့ ရေးသားတဲ့ အကြောင်းအရာ၊ သူတို့ရဲ့ သဘောထား၊ သူတို့ရဲ့ အပြုအမူတွေဟာ လူထုကို လွှမ်းမိုးလေ့ရှိတယ်။ ဆိုလိုတာက ဂျာနယ်လစ်ဇင်ဆိုတာဟာ လူထုတွေကို လွှမ်းမိုးရာ အားကောင်းတဲ့ လက်နက်ကြီးတစ်ခုလို ဖြစ်နေတယ်။ (စာထဲပေထဲမှာ ဓားသွားထက် ကလောင်သွားထက်တယ်လို့တောင် တင်စားကြဖူးတယ်)

အုပ်စုဖွဲ့လိုသူ ဂျာနယ်လစ်အချို့ကတော့ `ဘက်လိုက်ရမယ်´ ဆိုတဲ့ အယူအဆကို လက်ခံကြတာ ရှိတယ်။ တကယ်တော့ ဒါဟာ မှားယွင်းပြီး ဂျာနယ်လစ်ကျင့်ဝတ် (Journalist Ethic) နဲ့ မညီညွတ်ပေဘူး။

သူ့မှာ အစွမ်းအစတွေကနေ လွှမ်းမိုးစရာ သြဇာတွေ ပါဝင်လာတယ်။ ဒီလိုပါဝါတွေ၊ သြဇာအာဏာတွေ ပါဝင်လာတာနဲ့ တစ်ပြိုင်နက် တစ်ဖက်ကလည်း တာဝန်ယူရတယ် ဆိုတဲ့ (responsibility) ရှိတယ်ဆိုတာကို မေ့ထားလို့မရဘူး။

မိမိတို့တည်နေရာနဲ့ ပတ်သက်ပြီး တာဝန်ယူမှုကို မေ့ထားလို့မရဘူး။

ဘာတာဝန်တွေ ရှိလဲ။

ဂျာနယ်လစ်ဟာ -

  • မျှတရမယ်
  • ဘက်မလိုက်ရဘူး
  • အမှန်ကို ပြောရမယ်
  • အချုပ်အနှောင် မရှိရဘူး

တကယ်လို့ ဂျာနယ်လစ်တွေဟာ ကိုယ်ကျင့်တရား စောင့်ထိန်းခြင်း မရှိကြရင် လူအများကြီး (အများ အများကြီး) ကို နစ်နာစေနိုင်ကြောင်း သတိပြုသင့်တယ်။

သူတို့ဟာ မိမိရတဲ့ သတင်းပင်ရင်း (သတင်းပေးသူ၊ ဌာန၊ အဖွဲ့အစည်း) တွေကိုလည်း ထိခိုက်တယ်၊ မိမိ ရေးသားနေတဲ့ ဂျာနယ်မဂ္ဂဇင်း၊ သတင်းစာများကိုလည်း ထိခိုက်တယ်။ စာဖတ်သူတွေကို ထိခိုက်သလို အဲဒီ စာဖတ်သူတွေနဲ့ ဆက်နွှယ်နေတဲ့ လူမှုအသိုက်အ၀န်းကိုလည်း ထိခိုက်စေတတ်တယ်။

ယနေ့မှာ ၆၆ (ဃ) လို ဥပဒေပုဒ်မတွေကိုလည်း သတိထားရမှာ ဖြစ်တယ်။

မှန်တာကိုပြောတာ

-

ဂျာနယ်လစ်တွေဟာ သတင်းတွေကို အသေအလဲလိုချင်ကြတာ သဘာဝပဲ။ ဒါပေမဲ့ သတင်းရဖို့အတွက် မလိမ်ပါနဲ့။ သင်ဟာ သတင်း အချက်အလက် အကြောင်းအရာတစ်ခုကို ရရှိဖို့အတွက် သတင်းပင်ရင်း (source) ဖြစ်တဲ့ လူတစ်ယောက်ကို မိတ်ဆက်စကားပြောတဲ့အခါ -

  • သင့်အမည် (ကလောင်အမည်ကိုပါ) ရှင်းလင်းစွာ ပြောပြပါ
  • သင့်ရဲ့ ကိုယ်စားပြုရာ မီဒီယာ စာနယ်ဇင်းအမည်ကို ပြောပြပါ
  • သင်ဟာ ဒီသတင်းအတွက် အချက်အလက်တွေကို ရှာဖွေနေတာကိုလည်း ပြောပြပါ။

သတင်းရရှိဖို့အတွက် ကျွန်တော်ဟာ ဆရာဝန်ပါ။ ဒါမှမဟုတ် အစိုးရအရာရှိပါလို့ ဟန်မဆောင်ပါနဲ့။ မမှန်တာတွေကို သတင်းပင်ရင်းအား လုပ်ကြံမပြောကြပါနဲ့။ တားမြစ်ထားတဲ့ နေရာကို ၀င်ရောက်လိုတာနဲ့ လိမ်ညာမှုတွေ၊ မဟုတ်မမှန်တာတွေကို မလုပ်ရပါဘူး။

တတ်နိုင်သမျှ ပြေလည်အောင် မှန်ကန်တဲ့နည်းကို သုံးဖို့လိုတယ်။

သတင်းယူဖို့အတွက် ကက်ဆက်ကိုတော့ ယူသွားပါ။ ကာယကံရှင် ခွင့်မပြုဘဲ အသံဖမ်းယူခြင်းမပြုပါနဲ့။ ခွင့်ပြုချက်ကို အကျိုးအကြောင်းနဲ့ ပြောဆိုပြီး တောင်းခံပါ။ သင်လိမ်လည်တာကို သိရှိသွားပါက သင့်ရဲ့ မီဒီယာဟာလည်း သိက္ခာကျမှာ ဖြစ်တယ်။ သတင်းပင်ရင်းတွေ၊ ကာယကံရှင်တွေဟာ သင့်ရဲ့သတင်းစာကို နောက်ထပ် သတင်းတွေရရင် ပြောတော့မှာ မဟုတ်တော့ဘူး။

အမြဲတမ်း ထိန်းသိမ်းရမယ့် ကိုယ်ကျင့်တရားထဲမှာ ပါဝင်တာကတော့ သတင်းတွေကို ရေးတိုင်း အမှန်တွေကိုသာ ရေးဖို့ပါပဲ။ တတ်နိုင်သ၍ သတင်းကိုတိကျစေရန် ကြိုးစားပါ။ မိမိရဲ့ သတင်းဟာ ပြည့်စုံဖို့လိုတယ်။ မျှတဖို့လိုတယ်။ တစ်ဖက်စောင်းနင်း မဖြစ်ဖို့ ကြိုးစားရပေမယ်။

အမှန်တရားကနေ သွေဖီသွားခြင်း မရှိပါစေနဲ့။

မိမိရေးနေတာဟာ `ကောလာဟလ´ ဟုတ်မဟုတ် ဆန်းစစ်ပါဦး။

တကယ်လို့ မိမိရေးလိုက်တဲ့ သတင်းဟာ မှားနေတယ်ဆိုတာကို နောင်အခါမှ သိတယ်ဆိုလို့ရှိရင်လည်း နောက်တစ်ကြိမ်မှာ အမှားပြင်ဆင်ချက်ကို မိမိရဲ့သတင်းစာဂျာနယ်မှာ ထည့်ပေးရန် မမေ့ပါနဲ့။ ဒါမှ စာဖတ်သူတွေကို အမှန်ကိုသိမှာ ဖြစ်တယ်။

သတင်းနဲ့ပတ်သက်တဲ့ သင့်ရဲ့ခံစားချက်တွေကို မတင်ပြရပါဘူး။ သင့်ရဲ့ခံစားချက် ဘယ်လိုရှိနေပါစေ သတင်းထဲမှာ ထည့်မရေးဖို့ သတိရကြပါ။ လူအားလုံးရဲ့ အမြင်ကိုသာ တင်ပြရမှာဖြစ်တယ်။

အချို့ဂျာနယ်လစ်တွေကတော့ သူတို့ရဲ့ သဘောထား (opinion) တစ်လှေကြီးကို သတင်းနဲ့အတူ ရောထွေးထည့်တတ်ကြတယ်။ တစ်ခါတစ်ရံလည်း ဂျာနယ်လစ်တွေဟာ မိမိတို့ သတင်းစာ၊ ဂျာနယ်ကို ထောက်ပံ့ထားတဲ့ အဖွဲ့အစည်းရဲ့ သဘောထားကိုလည်း စောင်းပေးတတ်သေးတယ်။

သတင်းကို ၀ါဒဖြန့်ချိရေးအတွက် သုံးတတ်တာကို ရှောင်ဖို့လိုတယ်။

နိုင်ငံရေးသမားတွေဟာ တစ်ဦးကိုတစ်ဦး အပုပ်ချဖို့ သတင်းစာတွေကို သုံးတတ်တယ်။ ဒီအတွက် ရှောင်ဖို့လိုတယ်။ သူတို့ပြောတာ မှန်နေတာကို သိသော်မှ တစ်ဖက်က သဘောထားမပါဘဲ ပုံနှိပ်ခြင်းမပြုရပါဘူး။

ဆိုးတာက လူအများစုဟာ ဂျာနယ်လစ်ရေးပြတဲ့ သဘောထား (opinion) ကို သတင်းအချက်အလက်လို့ မှတ်ယူတတ်ကြလို့ပါပဲ။ စာထဲပါတာတွေကို အမှန်လို့ထင်တဲ့ လူအများကြီးရှိတယ်။ ဒါကို ဂျာနယ်လစ်ရဲ့ ကျင့်ဝတ်အရ ရှောင်ကျဉ်ရမှာ ဖြစ်တယ်။

သင့်ရဲ့သတင်းဆောင်းပါးမှာ သင့်ရဲ့သဘောထားအပြင် အခြားသော သူတွေရဲ့ သဘောထားတွေလည်း ပါတတ်သေးတယ်။ အယ်ဒီတာတွေရဲ့ သဘောထားတွေ၊ ငွေကြေး ထောက်ပံ့ထားသူ (sponsor) တွေရဲ့ သဘောထားတွေ ဒါမှမဟုတ် သြဇာအာဏာရှိသူတွေရဲ့ သဘောထားတွေ ပါလာတတ်တယ်။

ပိုဆိုးတာက မမှန်တာတွေကို လုပ်ကြံရေးဖို့ အားပေးသူတွေတောင် ရှိတတ်တယ်။ ဒါကို ရှောင်လို့မဖြစ်နိုင်တဲ့ အခြေအနေတွေ ရှိတတ်ပါတယ်။ ဒါပေမဲ့ စဉ်းစားပါ။ သင်ရေးတာတွေဟာ သင့်ရဲ့လုပ်ငန်းကို ထိခိုက်တယ်။ သင့်ရဲ့ profession ကိုလည်း ထိခိုက်နိုင်တယ်။ သင့်ရဲ့ လူမှုအသိုက်အ၀န်းကိုလည်း ထိခိုက်စေနိုင်ကြောင်း သတိပြုသင့်တယ်။

ဒါတွေအားလုံးဟာ သင့်မှာ တာဝန်ရှိတယ်ဆိုတာကို မမေ့ပါနဲ့။

အချို့ ကော်လံစားတွေတော့ ရှိပါတယ်။ သူတို့ရဲ့စာတွေမှာ သူတို့ရဲ့သဘောထားတွေ အများကြီးပါတတ်တယ်။ ဒီလိုလူတွေရဲ့ စာတွေကို သီးသန့် တစ်နေရာမှာထားပါ။ သတင်းတွေ၊ သတင်းဆောင်းပါးတွေနဲ့ မရောထွေးစေပါနဲ့။

သို့သော် ကော်လံစားတွေရဲ့ သဘောထားတွေဟာ မမှန်တဲ့ အချက်တွေနဲ့ တစ်စုံတစ်ယောက်ကို အထောက်အကူပြုနေလို့ မရဘူး။ လူတစ်ယောက်ယောက် အဖွဲ့အစည်း တစ်ခုခုကိုလည်း ထိခိုက်လို့ မရပါဘူး။

သူတို့ရဲ့သဘောထားအမြင်ကို ဖြန့်ဖြူးဖို့ မီဒီယာကို သုံးလို့မရဘူး။

သင်ဟာ သတင်းအချက်အလက်တစ်ခုကို မှားယွင်းစွာ ဖော်ပြပြီး တစ်စုံတစ်ယောက်ကို နစ်နာစေတယ်ဆိုပါက အသရေဖျက်မှု Libel လို့ ခေါ်တယ်။

ဒီအတွက် တရားရုံးကို သင်နဲ့သင့်ရဲ့ သတင်းစာ ဂျာနယ်တွေ ရောက်သွားနိုင်တာကို သတိပြုပါ။

အချို့က ငွေကြေး မြောက်မြားစွာ တောင်းတတ်တယ်။

သင့်ရဲ့ သတင်းစာ ဂျာနယ်ဟာ နာမည်ပျက်ရုံမက မွဲသွားတဲ့အထိ ကျဆင်းသွားနိုင်တယ်။

အသရေဖျက်မှုဟာ တစ်နိုင်ငံနဲ့ တစ်နိုင်ငံ ကွာခြားပါတယ်။

ဂျာနယ်လစ်ရဲ့တာဝန်ဟာ ပြည်သူနဲ့ အစိုးရအကြား ပေါင်းကူးလုပ်ပေးတယ် ဆိုတာ မမေ့ပါနဲ့။ Fake News လို့ခေါ်တဲ့ သတင်း အတုအယောင်တွေကို ဖန်တီးတဲ့ထဲမှာ သင်မပါစေပါနဲ့။

အမှုတွေကိုတော့ ရင်မဆိုင်ရတာ အကောင်းဆုံးပါ။ အကောင်းဆုံး ဂျာနယ်လစ် တစ်ယောက်ဖြစ်အောင် ကြိုးစားဖို့ အချိန်ရောက်လာပြီ ဖြစ်တယ်။

ဒေါက်တာခင်မောင်ညို

The Ladies News

Vote: 
No votes yet
Reader Choice: 

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.