မောင်ဟစ်နှင့် ကိုကြွက် // မောင်ဟစ် //

တောသား မောင်ဟစ် ရန်ကုန်ရောက်လာပါသည်။ ပလက်ဖောင်းပေါ် လျှောက်ရင်း အကောင်ကြီးကြီး တစ်ကောင်ကို တွေ့သည်။
 
`ဒီကောင် ဘာကောင်လဲ´
 
`ကြွက်ကြီး´
 
ပလက်ဖောင်းပေါ် မောင်ဟစ်ဘေးက လူတစ်ယောက် အော်လိုက်မှ မောင်ဟစ် လန့်သွားလေသည်။ မောင်ဟစ်တို့သည် အမဲလိုက် ၀ါသနာ ပါသော သူငယ်ချင်းတွေနဲ့အတူ အမဲလိုက်ရာတွင် နောက်လိုက်အဖြစ် ပါဝင်ဖူးသည်။ ချေဟုလူတွေရေးသော ဂျီဆိုသည့် သတ္တ၀ါကို အမဲလိုက် ဖူးသည်။ ကြောင်ဟုခေါ်သော တောကြောင်ကို အမဲလိုက်ဖူးသည်။ လယ်ကွင်းထဲတွင် လယ်ကြွက်ကြီးများကိုလည်း တွင်းကိုပေါက်တူးဖြင့် ပေါက်၍ လယ်ကြွက်တွေကို ရဖူးသည်။ ကြွက် အသည်းသည် ကြက် အသည်းနီးပါး ရှိသည်။ စားလို့ အင်မတန်ကောင်းသည်။ ခုတွေ့ရသော ကြွက်သည်ကား အမွှေးများ ဖွာရာကြဲနေသည်။ မောင်ဟစ် ရေကျော်နား ရောက်တော့ နောက် ကြွက်တစ်ကောင် ထွက်လာသည်ကို တွေ့ရပြန် သည်။ ထိုစဉ် ကြောင်တစ်ကောင်ကလည်း တစ်ဖက်က ထွက်လာသည်။ ကြွက်တော့ ကွိပြီဟု မောင်ဟစ်တွေးမိသည်။
 
`ဟယ်´ ကြောင်သည် ကြွက်ကိုကြည့်ပြီး ရပ်ကာ နောက်ပြန်ပြေးသွား ပါတော့သည်။
 
`ဘာဖြစ်လို့ပါလဲ´
 
မောင်ဟစ် အသံထွက်သွားသည်။
 
ဤတွင် တစ်ဖက်က `ရန်ကုန်ကြွက်ဖြစ်လို့ပေါ့ဗျ´ ဟု ပြန်ပြောသံကို ကြားရသည်။
 
ပလက်ဖောင်းပေါ်တွင် ဘယ်သူမှမရှိ။ ဘေးဘီမှာ တစ်ကောင်တစ်မြီးမှ မရှိ။ တစ္ဆေပဲ ခြောက်နေပြီလား။ သို့သော် ရှေ့နားတွင် တစ်ကောင်တော့ ရှိနေသည်။ သူက စောစောက ကြောင့်လန့်ပြေးသွားသော ကြွက်ဖြစ်လေ သည်။ ပလက်ဖောင်းပေါ်က ကြွက်သည် မောင်ဟစ်ကို သေသေချာချာ ကြည့်နေသည်။
 
သူ စကားပြောတာလား။
 
`ငါပြောနေတာကွ´
 
သူက ဆက်ပြောသည်။
 
`မင်း တောသား၊ ရန်ကုန်ကြွက်ကို မမြင်ဖူးဘူး မဟုတ်လား´
 
`ဟင်၊ မင်းက ငါ့ကို တောသားလို့ပြောတယ်။ မင်းကကော၊ စုတ်ပြတ်နေ တဲ့ ကြွက်စုတ်ပဲ´
 
`ငါက ကြွက်စုတ်မဟုတ်ဘူး။ မြေကြွက်´
 
`တို့ဆီက ကြွက်တွေက အင်မတန် သားနားတယ်ကွ။ မင်းက စုတ်နေ တဲ့ကြွက်စုတ်ပဲ´
 
`ခင်ဗျားတို့ တောက စပါးတွေကို ခိုးစားတဲ့ လယ်ကြွက်တွေဗျ။ ကျုပ်တို့ အမျိုးတွေပဲ။ ကျုပ်တို့က တောမှာ ရေကြီးလို့ မြို့တက်လာတာ´
 
`အင်း၊ ရေကြီးရင် ကြွက်တွေ အတော်ဒုက္ခရောက်တယ်´
 
`ဟုတ်ပါ့။ တိရစ္ဆာန်ချင်းအတူတူ ရေကြီးရင် ခွေးတွေ ခေါင်မိုး ရောက်အောင် တက်နိုင်တယ်´
 
`ခွေးကလူတွေနဲ့ အတူတူနေတာကိုး။ လူတွေလုပ်တာကို လုပ်တတ်တယ်´
 
`အင်း၊ ကျုပ်လည်း ကြားဖူးပါတယ်။ လူတွေ ပြောပြောနေကြတယ်။ ပဲခူးရေကြီးတယ် ဆိုတာ´
 
`မင်းတို့ ကြွက်တွေက အတော် ကြွက်ရေလည်တာပဲ´
 
`မလည်လို့ရမလား။ ကားစာဖြစ်သွားမှာပေါ့။ မြို့ပေါ်က ကြွက်တွေဟာ အကင်းပါးရတယ်´
 
`ဒါနဲ့ မင်းက ဘယ်မှာနေတာလဲ၊ တောက ကြွက်တွေလို တွင်းထဲနေ တာလား´
 
`တောက ကြွက်လိုတွင်းနက်ထဲမှာ မနေဘူး။ ပလက်ဖောင်းဘေးက ဖောက်ပြီး အောက်ထဲ ၀င်လိုက်ရင် ရတယ်။ ကျုပ်အိမ် လိုက်လည်ပါလား။ ခင်ဗျားနဲ့ စကားပြောရတာ ကောင်းလို့´
 
`ငါ့ကိုယ်ခန္ဓာကြီးနဲ့ ဘယ်လိုဝင်လို့ရမလဲ´
 
`ကျွန်တော် လုပ်ပေးပါ့မယ်ဗျာ။ ဟချလောင်း၊ ခင်ဗျားဟာ ကျုပ်ထက် တောင် ငယ်သွားပြီ။ ဒီအထဲ ၀င်ရအောင်´
 
`မင်းတို့က အတော်အားရှိတာပဲ။ ကွန်ကရိတွေကိုတောင် ဖောက်နိုင်တယ်´
 
`အထင်မကြီးပါနဲ့ ကျုပ်တို့က အားသိပ်ရှိတာ မဟုတ်ဘူး။ ဒါပေမဲ့ စည်ပင်က ဘိလပ်မြေတွေက ဘယ်တော့မှ အချိုးမပြည့်ဘူး။ ကျုပ်တို့ ဖောက်လို့ရတယ်´
 
`ငါတွေ့တော့ သူတို့ အမြဲတမ်း အသစ်ခင်းနေတယ် မဟုတ်လား´
 
`ဟုတ်ပါတယ်။ ခင်းတဲ့လူက ခင်းတယ်။ ဖျက်တဲ့လူက ဖျက်တယ်။ ၀ါယာကြိုးမြှုပ်တာတို့၊ ရေဆင်းပေါက် ဖောက်ရတာတို့၊ သစ်ပင်စိုက် တာတို့ အများကြီးဗျ။ သူတို့ လုပ်ရတယ်။ ခုလည်း ရေမကြီးအောင်ဆိုပြီး ရှိတဲ့မြောင်းကို ဖြို၊ နောက် အုပ်ထပ်စီတယ်´
 
`မင်းတို့ ဒုက္ခမရောက်ဖူးလား´
 
`မရောက်ပါဘူး။ ဖြိုပြီး တော်တော်နဲ့ ပြန်လုပ်တာမှ မဟုတ်တာပဲ။ ကျုပ်တို့ ကြွက်ဆွေမျိုးတွေ အဆင်ကိုပြေလို့ပဲ´
 
`မင်းတို့ ကြွက်တွင်းတွေကြောင့် တို့ပလက်ဖောင်းတွေ အစဉ်ပျက်နေတာ တော့ ဆိုးတယ်။ မင်းတို့ဟာ လူသားတွေရဲ့ ရန်သူပဲ´
 
`ကျွန်တော်တို့ဟာ အမှိုက်ပုံတွေကို ရှင်းပေးတယ်´
 
`ကြွက်တွေကနေ ပလိပ်ရောဂါကို ရတယ်´
 
`ဒါတော့ နောင်ကြီးရာ၊ ပလိပ်ရောဂါဆိုတာ အရင်ခေတ်က ဖြစ်တာပါ။ ခုခေတ် ပလိပ်ရောဂါကိုတော့ ပိုးသတ်ဆေးတွေ အေးအေးဆေးဆေး နိုင်တယ်။ ခင်ဗျားတို့ ကြောက်ရမှာက ၀က်တွေနဲ့ ကြက်တွေဗျ´
 
`ဘာဖြစ်လို့လဲ´
 
`၀က်က H1 N1 ဖြစ်တယ်။ ကြက်တွေက H5 N1 ဖြစ်စေတယ်ဗျ´
 
`၀က်နဲ့ကြက်က လူတွေစားတာပဲမို့ ဖြစ်တာ။ မင်းတို့ ပလက်ဖောင်းကြွက် တွေကိုတော့ ဘယ်သူမှ မစားဘူးလေ။ ဒီတော့ ကြက်ငှက်တုပ်ကွေးတို့ ၀က်တုပ်ကွေးတို့ မဖြစ်ဘူးပေါ့´
 
`ခင်ဗျားတို့ ကြွက်သားကို အမြဲစားနေကြတာပဲ´
 
`တောက လယ်ကြွက်ကို စားတယ်။ ဒီက မင်းတို့ကြွက်ကတော့ ရွံစရာ တောင် ကောင်းသေးတယ်´
 
`ခင်ဗျား ဒီဘက်ကို ညဘက်လာကြည့်ပါလား ကြွက်ဖမ်းတဲ့သူတွေ တွေ့မယ်´
 
`စည်ပင်သာယာက ကြွက်လာဖမ်းတာလား´
 
`ဘယ်ဟုတ်ပါ့မလဲ။ ကျုပ်တို့ကို ကော်မာရှယ်အတွက် ဖမ်းတာ´
 
`ကော်မာရှယ် ဟုတ်လား´
 
`ဟုတ်တယ်။ ကြွက်တွေကို အမြောက်အမြား ဖမ်းဆီးပြီး ဒိုင်သွင်းတာ၊ ခင်ဗျားမသိဘူးထင်တယ်´
 
`မဟုတ်တာဗျာ´
 
`မနက်တစ်နာရီလောက်ဆို ဒီကြွက်ဖမ်းတဲ့သူတွေ အဖွဲ့လိုက် ရောက် လာကြတယ်။ သူတို့မှာ မီးခိုးမှုတ်ပြောင်းတွေ ပါတယ်။ ကြွက်တွင်း တွေထဲကို မီးခိုးတွေမှုတ်ထည့်ပြီး ထွက်လာတဲ့ကြွက်ကို နှာသီးကို ဖြတ်ရိုက်ပြီး မသေမရှင်လုပ်ဖမ်းတယ်´
 
`ရက်စက်လိုက်တာ´
 
`အဲဒါကို ကျုပ်တို့ပြောတာပေါ့။ သတ်ချင်လည်း သတ်လိုက်ပေါ့။ ခုတော့ ရောင်းတဲ့အခါ ကြွက်သေဆို မယူလို့တဲ့။ ကြွက်ကို မသေမရှင် ရိုက်တာတဲ့´
 
`အဲဒီကြွက်တွေကို ဘာလုပ်လဲ´
 
`ခင်ဗျားတို့ စားတယ်လေ´
 
`ကျုပ်တစ်ခါမှ မစားဖူးဘူး´
 
`ခင်ဗျား ပေါက်စီစားလား´
 
`စားတယ်´
 
`၀က်သားပေါင်းကော စားလား´
 
`စားတယ်´
 
`ဘဲသားမုန့်ကော စားလား´
 
`စားတယ်´
 
`၀က်သားလိပ်´
 
`စားတယ်´
 
`ဒါနဲ့များ တစ်ခါမှ မြို့ကကြွက်သား မစားဘူးဆို´
 
မောင်ဟစ်လန့်သွားပါသည်။
 
မောင်ဟစ် ရန်ကုန်ရောက်တော့ တောမှာမရှိသည့် အစာမှန်သမျှ တ၀ကြီး စားသည်။
 
ပေါက်စီ၊ ၀က်သားပေါင်း၊ ဘဲသားမုန့်၊ ၀က်သားလိပ် အားလုံး စားပစ်သည်။
 
တောက သူငယ်ချင်းတွေကို သနားသွားသည်။ ဒီကောင်တွေ ဒီလို အရသာရှိတဲ့ အစာတွေ မစားဖူးကြရှာဘူး ဟူ၍ မောင်ဟစ် တွေးကာ သနားမိသည်။ သူတို့လာရင်လည်း ဆိုင်သွားကျွေးသည်။
 
`ကဲ ခင်ဗျားနဲ့ စကားပြောနေတာ ကြာပြီ။ ခင်ဗျားပြန်ပေတော့´
 
`ကောင်းပြီ။ အပြင်ရောက်ရင် နဂိုအတိုင်း ဖြစ်အောင် မန်းပေးလိုက်ပါဦး´
 
အပြင်ရောက်တော့ ကိုကြွက်က အပ်ချလောင်းဟူ၍ မန်းပေးလိုက်သည်။ မောင်ဟစ် အပြင်ရောက်မှ အသက်၀၀ရှူကာ ပုဇွန်တောင်ပန်းခြံထဲကို ၀င်လိုက်သည်။ ထိုစဉ် တစ်စုံတစ်ယောက်က မောင်ဟစ်ပခုံးကို ကိုင်လိုက်သည်။
 
`ဟေ့လူ၊ အ၀တ်တွေမရှိဘဲ ပန်းခြံထဲမှာ ဘာထိုင်လုပ်နေတာလဲ´
 
မောင်ဟစ် မျက်လုံးဖွင့်ကြည့်လိုက်တော့ ရဲတစ်ယောက်ကို တွေ့ရသည်။ မောင်ဟစ်သည် မိမိကိုယ်ကို ကြည့်လိုက်ရာ အောက်ခံဘောင်းဘီ လေးကိုသာ တွေ့ရသည်။
 
`ဘာဖြစ်တာလဲဗျာ´
 
`ဘာဖြစ်တာလဲဗျာ´
 
`ဘာဖြစ်ဖြစ် ရဲစခန်းလိုက်ခဲ့´
 
အသာအယာ မလိုက်သွားလျှင် လက်ထိပ်နှင့်ခေါ်မှာကို သိသော မောင်ဟစ်လိုက်သွားပါသည်။
 
`မင်း ဘယ်လိုဖြစ်တာလဲ ပြောပြ´
 
`ကျွန်တော် လမ်းလျှောက်ထွက်တယ်။ လမ်းမှာ ကွမ်းယာဆိုင်ဝင်ပြီး ကွမ်းဝယ်ဖို့လုပ်တော့ ဘေးကလူက ဒီမှာတန်းစီနေတဲ့ လူတွေ အများကြီး၊ ခင်ဗျားလိုချင်ရင် ကျုပ်ဆီက တစ်ယာယူသွားဆိုပြီး ပေးလိုက်တယ်´
 
`သူ ပိုက်ဆံယူလား´
 
`မယူဘူး။ ဘယ်လောက်ကျလဲ မေးတော့ အချင်းချင်းတွေ မယူပါဘူးလို့ ပြောတယ်။ ကျွန်တော် ကွမ်းစားပြီး လမ်းလျှောက်လာတာ အိပ်မက်တွေ မက်ပြီး ဒီရောက်လာတာပဲ´
 
`ခင်ဗျားကို ဆေးခတ်လိုက်တာ။ ခင်ဗျားကို ကွမ်းယာပေးတဲ့သူ ဘယ်သူလဲ မှတ်မိလား။ ဒီပုံတွေကို ကြည့် ဘယ်ပုံလဲတွေ့လား´
 
စခန်းမှူးက ဓာတ်ပုံတွေပြသည်။
 
`အင်း၊ ဒီတစ်ယောက်ပဲ´
 
`ချက်ကြီးကိုး။ ဒီကောင် သကြားလုံးနဲ့ မိန်းကလေးတွေကို ဖျက်ဆီး တာများပြီ။ ခုတော့ ဒီကောင် ကွမ်းယာကို သုံးနေပြီ။ ချက်ကြီးဆီက ခင်ဗျား နာရီနဲ့ ပိုက်ဆံအိတ်ရရင် ဖုန်းဆက်လိုက်မယ်´
 
`ဟုတ်ကဲ့၊ ကျွန်တော့်အတွက် ပုဆိုးနဲ့ အကျီ င်္ကော´
 
စခန်းကလူတွေအားလုံး ပြုံးနေကြသည်။
 
`ဟိုမှာ´
 
တော်သေးတာပေါ့။ ကွန်ညက်ရောက်နေလို့။
 
`ဆရာဟစ် နောက်တစ်ခါ တစ်ယောက်တည်း လျှောက်မသွားနေနဲ့´
 
`အေးပါ´
 
`ဆရာဟစ် မကြောက်ဘူးလား´
 
`ဘာကြောက်ရမလဲ´
 
`စခန်းမှူး ပြောသွားတယ်။ ဒီကောင် သကြားလုံးနဲ့ မိန်းကလေးတွေကို ဖျက်ဆီးတာများပြီ။ ခုတော့ ဒီကောင် ကွမ်းယာသုံးနေပြီ။ ဆရာဟစ် ကံကောင်းလို့´
 
`ဘာဖြစ်လို့´
 
`ဒီကောင်တွေ ယောက်ျားလေးတွေကို ဖျက်ဆီးတော့မှာပေါ့။ ကံသီပေလို့၊ ဆရာဟစ်က ဘီလူးကျွန်းသားမိုလို့ အရုပ်ဆိုးပေလို့´
 
`ဗြဲ´
 
မောင်ဟစ်
The Ladies News
 
 
 

 

Vote: 
No votes yet
Reader Choice: 

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.